بەڕاست ئاژانسى ئاكا نیوز سەربەخۆو بێلایەنە…. سمكۆ عەبدولكەریم
بەڕاست ئاژانسى ئاكا نیوز سەربەخۆو بێلایەنە
سمكۆ عەبدولكەریمئازادى و سەربەخۆى و بێلایەنى ، هەندىَ جاریش ئەهلى ئەو چەمكانەن بوونەتە دورشمى زۆربەى هەرە زۆرى رۆژنامەو گۆڤار و دەزگاو سەنتەرەكانى هەرێمى كوردستان ، ئەوە عەیبەیەكى زۆر گەورەیە ، كاتى خۆى ویستم راپۆرتێك لەسەر ئەوە ئامادەبكەم ، بەڵام جگە لە سەرنووسەرى رۆژنامەیك لە نێو ئەو هەموو رۆژنامەو گۆڤارانەى كە لە سەرى سەرە نووسیویانە رۆژنامەیەكى سەربەخۆ ، ئازاد ، بێلایەنە ، هیچ كامێكیان ئامادە نەبوون وەڵام بدەنەوە ، لە كاتێكدا زۆربەیان ئەگەر نشڵێم هەموویان بە شێوەیەكى ناراستەوخۆ لە لایەن لایەنێك یان كە سێكى مەعنەوى پاڵپشتى و ئاراستە دەكرێن ، كەسیش ناتوانىَ نكۆلى لەوە بكات ، كە رۆژنامە هەیە تەنیا لەبەر یەك هۆ داخراوە ، دواتر بە چەند سەعاتێك بڕیارى دەركردنى رۆژنامەیەكى تر دراوە. زۆرجاریش رۆژنامەیەك كراوەتە قوربانى پڕۆژەیكى تر، بەراست ئەو دەزگایە ئەگەر سەربەخۆ و بێلایەنە گۆڤارەكەى بۆ بە بیست و چوار سەعات داخرا .
هەرچەندە من پێم وانییە هەموو ئەو بڵاوكراوە و دەزگاو سەنتەرانە بۆیان نییە یان ناتوانن هەڵگرى بەشێك لەو ئازادى و سەربەخۆیى و بێلایەنییە بن ، دەتوانن ، بەڵام نەك بەو ئەندازەیەى ئەوان بانگەشەى بۆ دەكەن .
لە چەند رۆژى رابردوودا دەزگاى ئاراس كە دەزگایەكە ناڕاستەوخۆ لە لایەن سەرۆكى حكومەتەوە پاڵپشتى ماددى و مەعنەوى دەكرىَ ، دامەزراندنى ئاژانسێكى دەنگوباسى بە ناوى ( ئاكا نیوز) راگەیاند ، هەرچەندە ئەوە یەكەم هەوڵى لەم جۆرە نییە .
لە دواى راپەرینەوە حكومەتى هەرێمى كوردستان لە رێگەى وەزارەتى رۆشنبیرى چەند جارێك ئاژانسى دەنگوباسى كوردستانى (ئا, د, ك) خستۆتە كار ، بەڵام نەك لە شێوەى پڕۆژە ، بەڵكو تەنیا وەك ئاژانسێكى سادەو سەرپێى كە كارى تەنیا گەیاندن و دابەشكردنى هەواڵ و چالاكییەكانى حكومەتى هەرێمى كوردستان بووە بەسەر كەناڵە راگەیاندنەكانى نێوخۆ لەو سەردەمەدا ، هەر بۆیە ئەم ئاژانسانە هەمیشە تەمەن كورت و بىَ ئەنجام بوونە .
ئەوەى زیاترجێگاى هەڵوەستە لەسەركردنە و ئەوە دێنىَ دووقسەى زیاترى لەسەر بكرىَ دەستەواژەكانى سەربەخۆیى و بیلایەنییە كە لە مەراسیمى راگەیاندنى ئاژانسى ئاكا نیوزدا راگەێندرا ، بەو مانایەى ئەم ئاژانسە سەربەخۆ و بێلایەنەو لە لایەن دەزگاى چاپ و بڵاوكردنەوەى ئاراس وەك دەزگایەكى سەربەخۆ و كۆمەڵە رۆژنامەنووسێكى بێلایەنەوە دامەزراوە ، ئەمە بێویژدانی و مەترسییەكى گەورەیە لەبەردەم بونیادنانى دامەزاراوەى سەربەخۆ و بێلایەن لە ئایندەدا ، یان ئەوەتا ئێمە خراپ تێگەیشتوین یان ئەوەتا ئەوان خراپ نووستون .
لە كاتێكدا گومان لە بێلایەنى و سەربەخۆیى هەموو ئەو رۆژنامانەش هەیە كە بەو ناوەوە بانگەشە دەكەن ، چجاى ئەوەى دەزگایەكى وەك ئاراس كە بانگەشەى سەربەخۆیى و بێلایەنى دەكات كە پێویست بەوە ناكات لەم رووەوە قسەى زیاترى لەسەر بكرىَ ، هەموو لایەك باش دەزانین ئەم دەزگایە چۆن و بە چ شێوەیەك دامەزراوە و كێش پاڵپشتى دەكات ، لە كاتێكدا ئەگەر ئەم ئاژانسە سەربەخۆو بێلایەنە بۆچى لە لایەن سەرۆكى حكومەتەوە راگەێندرا ، كە بێشك ئیمكانیاتەكەشى هەر لە لایەن خودى سەرۆكى حكومەتەوە بۆ دابین كراوە .
باشترین شت ئەوەیە هەموو ئەو دەزگاو بڵاوكراوانە ، لە جیاتى ئەوەى خۆیان وەك دەزگاو بڵاوكراوەیەكى سەربەخۆ و بیلایەن و ئازاد بناسێنن ، چاكتر وایە جەخت لە سەر راستگۆیى لە پیشەكەیاندا بكەنەوە و هەر ئەوەش بكەنە ئامانجى كاركردنیان ، چونكە لەم روەوە هەموو لایەك دەتوانن راستگۆ بن ، كەچى دەبینین ئەوان هەر لە سەرەتاوە بە بانگەشەكردن بۆ سەربەخۆیى و بێلایەنى ئەو راستگۆیەیان لە دەستدا .
دواتر ئەم ئاژانسە بەو مەبەستە دامەزراوە هەواڵە كوردییەكان لە بوارى سیاسى و كەلتورى و كۆمەڵایەتى بگەێنێتە جیهانى دەرەوە ، چونكە وەك ئاماژەى پێكراوە پێشتر نەگەیشتون ، ئەگەر گەیشتبێتیش بە شێواوى بووە .
ئەمەش ئەو ئاماژەیەیە هەر لەسەرتاوە دەریدەخات كە ئاژانسى ئاكا نیوز لاینگرە ، سەربەخۆیەكەشى هەر ئەوەندەیە تا بەهۆى هەڵەیەكەوە ، وەك چەندین پڕۆژەى تر لەبار دەبرێت و دەوەستێندرێت .
دەزگاى ئاراس ئەم پڕۆژەیەى بە هاوبەشى لە گەڵ ئاژانسى چاپەمەنى ئەلمانیا (DPA ) لە چوارچێوەیەكى زۆر تەسك گەلالە كردوە ، پڕۆژەیەكى كوردستانى وەك خۆى ئاماژەى بۆ كردوە ، بەڵام لە چوارچێوەیەكى تەسكى حیزبیدا .
دەكرىَ بڵێن هیچ پڕۆژەیەكى كوردستانى بەبىَ بەشدارى و راوێژى هەموولایەك سەركەوتو نابىَ ، ئەمەش یەكىَ لەو گرفتانەیە كە لە ئایندەدا ئەو ئاژانسە رووبەرووى دەبێتەوە ، بەو مانایەى ئەگەر مەبەستیشى بێت وەك ئاژانسێكى سەربەخۆ و بێلایەن خۆى پیشان بدات ، ناتوانىَ چونكە هەر لە سەرەتاوە بەو ئاراستەیە دەستى پێكردوە كە كە پڕۆژەیەكى حیزبییە .
