وه‌ختێکی ئه‌به‌دی… حه‌سه‌ن ئه‌حمه‌د
هه‌موو ئێواره‌یه‌ک
له‌م په‌نجه‌ره ته‌م لێنیشتوه‌ی غوربه‌تا
وه‌ختێکی دره‌نگ
جه‌للاد ئـــــــــاسا
ئه‌ڕژێته سه‌را‌پای ئه‌م ژووره
ده‌ستی چرچ وپیری
به‌سه‌ر شان و ملی ته‌مه‌نێک له‌بێده‌نگیمدا دێنێ
منیش ســــــــــات ســــــــــــــــات
ئه‌ڕوانمه‌ئاوه‌نگی سێبه‌رێک
له‌کۆڵانی ئه‌گه‌ر و نه‌گه‌رێکدا
نا ئومێده نا فڕێدراوه
گه‌لێک جار ئه‌یبینم
له‌م په‌نجه‌ره‌گرژه‌وه
که‌سوبعه‌تی (با)ی له‌ئه‌زه‌له‌وه قامچی ڕێژ کرد
له‌م په‌نجه‌ره بێزه‌ینه‌ی زۆر ده‌مێکه
ئاش و ماشی به‌باڵنده‌کان به‌خشیوو
مارشی سه‌رکه‌وتن بۆ بزه‌ی لێوی جه‌نڕاڵه‌کان لێئه‌دا
ده‌تۆش ئاسکه شه‌رمنه‌که‌ی ئه‌م قه‌د پاڵه
بۆ ڕازاندنه‌وه‌ی ساته‌کانم
قه‌یه‌رێکه‌چاوه‌ڕوانی
سه‌مای په‌پووله‌م له‌سه‌ر ئه‌م دیواره ڕه‌ق و گرنجه‌ی من بنه‌خشێنی
هێدی هێدی
به‌ر له‌وه‌ی پرسیارێک له‌پشووی ئه‌م ڕێگایه‌بکه‌ی
وه‌ده‌ر که‌وه
له‌م سه‌وزه‌یه بێڕه‌نگ و مه‌ئویسه‌دا
دوور نییه ڕێده‌رنه‌که‌یتبه‌مل جه‌سته‌ی گوڵ
به‌سه‌ر ئه‌م چیرۆکانه‌ی به‌منداڵی بۆیان ده‌گێڕایته‌وه
به‌جێیان بێڵه
وه‌ختێکی زۆر دره‌نگه‌و
دایکم به‌ڕوویه‌کی میهره‌بانه‌وه
له‌نیزیک کانییه‌کی وشک
پاشته‌ی مۆم
له‌میحرابی پیریدا
ده‌ستی دوعـــــــــــــــــــــای له‌مناره‌کان گه‌لێک به‌رزتره!
هه‌موو وه‌ختێک له‌م به‌رداشی هێجوکه‌ره‌دا
خۆزگه‌کانی بۆ دووریم هه‌ڵده‌ڕێژێت
له‌م ژووره ڕاکشاوه‌ی مندا
هه‌ر به‌قه‌د له‌پی ده‌سته‌کانم
ڕۆشنایی له‌کاروان به‌جێماوه‌و
له‌سوچێکدا کسکۆڵه‌ی داوه
له‌ژێر پێڵوه‌کانیه‌وه‌ته‌ماشای مه‌رگی بێوه‌ختی خۆی ده‌کات
ده‌تــــــــۆش ئه‌ی که‌روێشکه مووسپییه هه‌تیو باره‌که
کۆرپه‌کانت فریای ئه‌و که‌شتیه‌خه
تا په‌نجه‌ره‌که ڕه‌دووی ئه‌م ئێواره‌یه‌نه‌که‌وتوه
بۆ دوا جــــــــــــــــــــــــــــار ماڵئاوای بکه
له‌م ژووره‌به‌جێمبێڵن
له‌م سێبه‌ری بییابانه‌دا من وچوار دیواری شان و مل ڕووت !!
من و وشه‌سه‌رما بردووه‌کانی ده‌ورم
من و کاتژمێره دوو ڕووه‌که‌م
منی ســــــــــــــــــڕ و جگه‌ره‌شکاوه‌کانم
بۆ ئه‌به‌دی له‌گه‌ڵ ئه‌م دره‌نگ وه‌خته‌دا ده‌مێنینه‌وه
به‌جێم بێڵن
به
ج
ێ
م
بێڵن…
