Skip to Content

Saturday, January 29th, 2022

لەنێوان ( ئەو ) و ( من ) دا …!…سەروەر كەریم

Closed
by December 27, 2008 ئەدەب

 لەنێوان ( ئەو ) و ( من ) دا …!
 سەروەر كەریم
 Sarwar_kareem@yahoo.com

 ژیان هێماكانى خۆى بەزریان سپاردوەو ،
 بەهارى تەبەسسوم نایەتەبوون و ،
 مانگ وادەى ئاشفتەگیەتى و ،
 ڕووناكى خۆى نابەخشێتە كانیاوەكان و ،
 وێنەى جێژوانى دولبەران ناگرىَ و ،
 زاكیرەى خاڵى .. خاڵى كردووەو ،
 گوىَ بەنزاى عەشق نادات …
 لەگەڵ ئەستێرەكان سەما ناكات و ،
 بەبینینى دەریا توڕەدەبێت .
 ( ئەو ) خۆى هاوڕیىَ ئازارەو ،
 ئیرەیى بەڕەنگى ئەرخەوانى دەبات و ،
 دڵى لێوان .. لێو كردوە لەسەهۆڵ و،
 لەپاڕانەوەى مەستان بۆئەڤین تێناگات .
 ( ئەو ) وێناى ئەوینى وونكردووەو ،
 ئاشنانییە بەڕشتنى ئەسرینى هەورو ،
 بەگریانى ئاو زویر دەبىَ و ،
 سرووتەكانى خۆشنودى ئازارى دەداو ،
 هیچ ڕەنگىَ ناناسىَ !
 ( ئەو ) بەتەنیا ئاوازێكى نەژەنراوەو ،
 هیچ دانەرێك ناتوانێت نۆتەى بكات و ،
 دڵى بەستووى خاوبكاتەوە ..
 تا بوون لەسەراب ڕزگارى بێت .
 ( ئەو ) ى نامۆ بەئیرۆس ،
 بگەڕێتەوە باخەكانى ئیرەم و،
 دڵى بكاتەوە بەڕەنگى بەفرینى خۆیى و،
 ئابى تەمەن بگەڕێنێتەوەو ،
 دەریا لەتەشەنە قوتاربكات و ،
 هەڵوەداى بینینەوەى مانگ بێت .
 ئەودەمانە خەم دەبێتە خەندەو ،
 ( من ) ى پەرێشان و سەرابى ،
 ئاشنا دەبمەوە بەماڵى باران و ،
 سەما لەگەڵ هەناسەكانى بادەكەم .
 
 سلێمانى
 13/12/2008
 ماناى هەندێك ووشە :
 تەبەسسوم : زەردەخەنە
 ئاشوفتە : پەرێشانى و پەرێشان حاڵى
 ئەسرین : فرمێسك
 ئاب : مەبەست لەگەڕانەوەى ئەستێرەى بەختە
 تەشەنە : تینو
 

Previous
Next