كەمانێك ،دەخەینە سەر شانى هەرزەكارێك

 كەمانێك ،
 دەخەینە سەر شانى هەرزەكارێك .
   قوبادى جەلى زادە
 

 خودا بە دەستە زێڕینەكەى خۆى ، دان بۆ كۆترە سپییەكان رۆ دەكات .
 دەست بەسەرى پشیلە تینوەكان دادەهێنىَ , كاتىَ چۆڕێك ئاو نۆش دەكەن .
 باڵى زریان بە پەلكە زێرینە دەبەستىَ ، تا پەپوولەكان بە ئارامى تێپەڕن .
 
 چەك بۆ خودا هەڵدەگرم …
 ئیدى قەبولى ناكەم كەس ، مۆڕە لە خودا بكات.
 كەس تەقە لە سێبەرى خودا بكات .
 ئیدى قەبولى ناكەم كەس ،
  توێكلە مۆز ، فڕىَ بداتە بەر پىَ پیرۆزەكانى خودا !
 
 لەگەڵ خودادا ، دەچین بۆ بازار ،
 تەرازووى لاسەنگى بەقالەكان ، راست دەكەینەوە .
 دەچینە ناو پاێ ، بە تەنیشت ریشدارێكەوە دادەنیشین ،
 پشتێندى خۆكوژى لە كەمەریدا، خامۆش دەكەین .
 پیرێك چەك دەكەین ، كەمانێك دەخەینە سەر شانى نەوجەوانێك .
 سەر لە مزگەوت دەدەین ، بڕیارى ئاگربڕ ، رادەگەیەنین .
 عەبدەكان لە پیلانى كوشتنى خودا ، پەشیمان دەكەینەوە !