ئێمه ئه‌مه‌ریکامان خۆش ده‌وێت ، به‌ڵام ئه‌وان گوێمان پێناده‌ن……هیدایه‌ت مه‌لا عه‌لی
ئێمه ئه‌مه‌ریکامان خۆش ده‌وێت ، به‌ڵام ئه‌وان گوێمان پێناده‌ن
( نێچیرڤان بارزانی )له‌دوای ڕووخانی ڕژێمی به‌عسی سه‌ر‌کوتگه‌ر و داگیرکردنی عێراق له‌لایه‌ن( ئه‌مه‌ریکاوه) ئاڵوگۆڕێکی گه‌وه‌ره له ئاستی ناوخۆ و ناوچه‌که‌و جیهاندا هاته‌پێشه‌وه ، هاوکێشه‌ی سیاسی له عێراق به‌گشتی و کوردوستان به‌تایبه‌تی وه‌رچه‌رخانێکی بێ وێنه‌ی به‌خۆیه‌وه‌بینی ، داگیرکاری توانی پێناسه‌یه‌کی تازه به‌ڕووداو پێشهاته‌کان بدات و کاریگه‌ری ده‌وڵه‌تان و جێگاوڕێگای هه‌ریه‌کێک له هێزو بزوتنه‌وه کۆمه‌ڵایه‌تیه‌کان سه‌ر له‌نوێ دیاری بکاته‌وه ، له‌دوای ڕاپه‌ڕینی ئازاری ساڵی ( 1991 ) له کوردوستان و پێکهێنانی ( ناوچه‌ی ئارام ) له‌لایه‌ن( ئه‌مه‌ریکاوه) چه‌ند فاکته‌رێک ڕێگایان بۆ ئه‌وه خۆشکرد که ( یه‌کێتی و پارتی ) له‌هه‌ر قۆناغێکدا ئاسۆی به‌رژه‌وه‌ندییه‌کانی خۆیان به یه‌کێک له ده‌وڵه‌تانی ناوچه‌که‌وه ببه‌ستنه‌وه سه‌ره‌ڕای بوونی کێشه‌ی گه‌وره له نێوان( ئه‌مه‌ریکاو ) ئه‌و ده‌وڵه‌ته ناوچه‌یانه ، فاکته‌ری یه‌که‌م/ ئاڵۆزی هه‌لومه‌رجی سیاسی عێراق و ناوچه‌که ، فاکته‌ری دووه‌م / دابڕانی کوردوستان له کۆمه‌ڵگای نێوده‌وڵه‌تی به‌جۆرێک که کوردوستان نه‌بۆخۆی ده‌وڵه‌ت بوو نه‌سه‌ر به‌ده‌ڵه‌تێکیش بوو ، فاکته‌ری سێیه‌م / نه‌بوونی ستراتیژێکی ڕۆشن له‌لایه‌ن( ئه‌مه‌ریکاوه ) بۆ ڕابه‌ری کردنی جیهانی یه‌ک جه‌مسه‌رو ئاینده‌ی عێراق و چۆنیه‌تی هه‌ڵسوکه‌وت له‌گه‌ڵ ده‌سه‌ڵاتی به‌عس ، ، به‌ڵام له‌دوای داگیرکردنی عێراق له‌لایه‌ن ( ئه‌مه‌ریکاو ) ڕووخانی ڕژێمی به‌عس فه‌زایه‌کی سیاسی و کۆمه‌ڵایه‌تی و ئابوری واهاته پێشه‌وه که ئه‌مجاره‌یان ( ده‌سه‌ڵاتدارانی کوردوستان ) وه‌ک تۆڕی جاڵجاڵۆکه به‌رژه‌وه‌ندیه‌کانی خۆیان ببه‌ستنه‌وه به‌چاره‌نووس و به‌رژه‌وه‌ندییه‌کانی( ئه‌مه‌ریکاوه) ، ( ده‌سه‌ڵاتدارانی کوردوستان ) به‌جۆرێک ئه‌م قۆناغه‌یان پێناسه‌کردو کردیان به ئاسۆی خه‌ڵک که ڕێگایان نه‌هێشته‌وه بۆ ئه‌وه‌ی خه‌ڵکی کوردوستان چاره‌نووسێکیتر هه‌ڵبژێرێت به تایبه‌ت ( جیابوونه‌وه‌ی کوردوستان و پێکهێنانی ده‌وڵه‌تی سه‌ربه‌خۆ ) ، ( یه‌کێتی و پارتی ) به‌شێوه‌ک باسی فریادڕه‌سی( ئه‌مه‌ریکایان) ده‌کرد ته‌نانه‌ت ڕۆشنبیرو قه‌ڵه‌م به‌ده‌سته‌کانیشیان ئه‌مه‌ریکایان وه‌ک په‌پووله پیشان ده‌داو چاوپۆشیان ده‌کرد له هه‌موو ئه‌و تاوانانه‌ی که( ئه‌مه‌ریکا) به‌رانبه‌ر کۆمه‌ڵگای ئینسانی ئه‌نجامیداوه ، باسی بهرژهوهندی هاوبه‌ش و هاوچاره‌نووسی و هاوپه‌یمانیه‌تی تازه‌ی( ئه‌مه‌ریکا) و( ده‌سه‌ڵاتدارانی کوردوستان ) بابه‌تی سه‌ره‌تا و کۆتایی ڕاگه‌یاندنه‌کانیان بوو ، له ئاڵوگۆڕه‌کانی سه‌ر گۆڕه‌پانی سیاسی عێراق و کوردوستاندا که‌هه‌ر ڕۆژه‌و خه‌ڵکی کوردوستان هه‌ستیان به ترس و سه‌رکووتێکی تازه و دوو دڵیه‌ک ده‌کرد ، یه‌کسه‌ر وه‌ڵامی ( یه‌کێتی و پارتی ) ئه‌وه بوو که ئێمه (ئه‌مه‌ریکامان ) هه‌یه‌و تازه خه‌ڵکی کوردوستان چه‌وساندنه‌وه‌و پله دووی نابینن ، ده‌یانووت ئێمه شه‌ریکی بهرژهوهندی گه‌وره‌ترین هێزی دنیاین ، ئه‌م خۆڵکردنه چاوی خه‌ڵکه تا ئاستێک چووبوویه ناو ژیانی کۆمه‌ڵایه‌تی خه‌ڵکه‌وه که هه‌موو که‌س له ماڵه‌که‌ی خۆی دانیشێت و چاوه‌ڕوانی( ئه‌مه‌ریکای ) پارێزه‌رمان بێت تا مافه‌کانمان بۆ مسۆگه‌ر ده‌کات و له‌سه‌ر سینیه‌کی زێڕین پێشکه‌شمان ده‌کات ، سه‌ره‌ڕای بوونی ده‌نگی ناڕازی به‌داگیرکاری و خۆشباوه‌ڕی ( ده‌سه‌ڵاتدارانی کوردوستان ) به( ئه‌مه‌ریکا) ، سه‌ره‌ڕای سه‌رده‌ر‌هێنانی ده‌یان ڕووداو ڕووبه‌ڕبوونه‌وه که چاره‌نووسێکی تاریک و نادیاری بۆ خه‌ڵکی کوردوستان وه‌ک گڵۆپی سه‌وز هه‌ڵده‌کرد ، به‌رده‌وام ده‌بابه‌و بومبه‌کانی( ئه‌مه‌ریکا) وه‌ک په‌یامهێنه‌ری ئازادی و دیموکراسی نمایش ده‌کران و له ( بۆش ) ه‌وه بۆ ( ئۆباما ) سوێند دووباره ده‌کرایه‌وه ، به‌ڵام ماوه‌یه‌که شانۆی سیاسی عێراق و کوردوستان له‌په‌یوه‌ند به (ئه‌مه‌ریکاوه ) بۆ جێگایه‌ک ده‌ڕوات خه‌ریکه هاوکێشه‌ی هێز ئاڵوگۆڕێکی ڕیشه‌ی به‌خۆوه ده‌بینێت و ده‌سه‌ڵات و کورسی و داهاتی عێراق به‌جۆرێکیتر ئارایشت و ساز ده‌داته‌وه ، ئالێره‌دا که مه‌وقعیه‌تی به‌رژه‌وه‌ندییه‌کانی ( ده‌سه‌ڵاتدارانی کوردوستان ) ڕووله‌خوار ده‌بێت و( ئه‌مه‌ریکای) پشت و په‌نا له‌م قوڕاوه په‌لمان ڕاناکێشێت و خۆی وه‌ک سه‌یرکه‌ری گه‌مه سیاسیه‌کان پیشان ده‌دات ، ئیتر پردی ته‌حه‌موولی ( ده‌سه‌ڵاتدارانی کوردوستان ) ئه‌بچڕێت و ( نێچیرڤان بارزانی ) له‌و باره‌وه ده‌ڵێت ( ئێمه ئه‌مه‌ریکامان خۆش ده‌وێت ، به‌ڵام ئه‌وان گوێمان پێناده‌ن ، کاتێک ئێمه ئاماژه به‌وه ده‌که‌ین که ده‌مانه‌وێت پارێزگاری له خه‌ڵکه‌که‌مان بکه‌ین ، ئه‌وان وه‌ک کێشه‌یه‌کی لێ تێده‌گه‌ن ، وه‌کو تێکدانی سیاسه‌تیان له عێراق ) بۆ وه‌ڵام به‌م نیگه‌رانیه ( ڕۆبه‌رت هود ) وته‌بێژی وه‌زاره‌تی ده‌ره‌وه‌ی ( ئه‌مه‌ریکا ) له واشنتن ڕایده‌گه‌یه‌نێت ( که هاووڵاتیانی عێراقی بۆ چاره‌سه‌رکردنی کێشه‌کانیان ده‌بێ پشت به سیسته‌می ناخۆی عێراق ببه‌ستن نه‌ک ئه‌مه‌ریکا ) سه‌رچاوه‌ی هه‌واڵ بڕواننه ( ڕووداو ) ی ژماره ( 44 ) ی ڕۆژی ( 16/ 2/ 2009 ) ، بۆیه گرنگه خه‌ڵکی کوردوستان چاره‌نووسێکیتر هه‌ڵبژێرێت نه‌ک فریوودان و چاوه‌ڕوانی ئه‌مه‌ریکاو سیاسه‌ته‌کانی ، چاره‌نووسی پێکهێنانی ده‌وڵه‌تی سه‌ربه‌خۆو ژیانێکی ئینسانی بۆ خه‌ڵکی کوردوستان .
هیدایه‌ت مه‌لا عه‌لی
hidayat_malaali@yahoo.com
