Skip to Content

Thursday, March 28th, 2024
ئای چەند ئاسانە، كە دەڵێین پەكەكە تیرۆریستە…..ئەحمەد ئالتان

ئای چەند ئاسانە، كە دەڵێین پەكەكە تیرۆریستە…..ئەحمەد ئالتان

Closed
by April 30, 2009 گشتی

ئای چەند ئاسانە، كە دەڵێین پەكەكە تیرۆریستە

ئەم رووداوەش لەبەر ئەوەی كامیرای لێبوو بینیمان، سەرەڕای ئەوەی كامیراشیان بینیبوو هەر وایان كرد.
جا بیر بكەنەوە ئەو گوندانەی كە لەشاخەكاندان یان لە تاكە ماڵەكانن یانیش لە كۆڵانە تەسك و شاراوەكانی نێو شارەكاندان، كامیرای لێ نییەو هەر خوا خۆی دەزانێ چی بەو خەڵكە دەكەن.

نووسەر- ئەحمەد ئالتان        لەرۆژنامەی: "تەرەف "ی توركی وەرگیراوە
وەرگێڕانی لەتوركیەوە:        هوشیار حوسێن برایم – ساڵح سینۆ

ئەو دیمەنەتان سەیركرد؟
لە دەشتێكی فراوان، 50 تا 60 منداڵ خۆپیشاندانیان دەكرد، منداڵەكان بەردیان هاویشتە ئەو هێزە تایبەتیانەی كە بەچەك و تفاقی گرانی سەربازییەوە دەچوون بۆ دامركاندنەوەیان.
ئەگەر قەت ئەو هێزە نەچووبا بۆ ئەوێ چی دەبوو.
ئەو منداڵانە هەندێك هەراو قیژە قیژیان دەكردو بڵاوەیان لێدەكرد.
ئاخر ئەوانە منداڵی سێزدە چواردە ساڵی بوون و ئەو شوێنەی خۆپیشاندانیان ئەنجام دەدا چۆڵەوانییەك بوو.
نا، نابێت منداڵی كوردان خۆپیشاندان بكەن و لەو دەشتە هات و هاوار بكەن.
پۆلیس بەئاوی توندو چەك هێرشیان بردە سەر ئەو منداڵانە.

یەكێك لە پۆلیسەكان منداڵێكی چواردە ساڵی لاوازو بەلەنگاز دەگرێت و دەیهاوێتە ژێر پێی، بەنیازی كوشتن بەقۆنداخە تفەنگ دەكەوێتە سەر سەرو گوێلاكی ئەو منداڵە.
هیچ بیانوویەك نەبوو بۆ لێدانی، تەنیا ئەو قین و نەفرەتە نەبێت كە لەناخی ئەو پۆلیسەدا هەبوو بەرامبەر بە كوردان، بۆیە بە قۆنداخە تفەنگ كەوتە گیانی ئەو منداڵە.
لەوەش تراژیدیتر ئەوەبوو پۆلیسێكی دیكە دێت و دەستخۆشی لە پۆلیسی یەكەم دەكات.
ئەوە دڕندەیی پۆلیسێك و دووان نییە، بەڵكو دەوڵەت لە كوردستانی توركیا بەمشێوەیەیە.
ئایا گەر دەوڵەتێك لەبەرامبەر خەڵكی ئەو هەرێمە ئەوەندە بە قین و نەفرەت بێت، دەتوانێت ئەو خەڵكە بەڕێوە ببات؟
لەمەش زیاتر بۆچی بەڕێوەی ببات؟
بۆچی توركیا ئەوەندە پێداگیری دەكات بۆ بەڕێوەبردنی ئەو خەڵكە؟
گەر ئێوە منداڵەكانیان ئاوا لەگەڵ زەوی بكەن بەیەك و بەقۆنداخە تفەنگ سەریان وردو خاش بكەن و هێندە بەدوژمنیان دەبینن، چۆن دەتوانن لەسەر خاكی ئەوان بمێننەوە؟

ئەوەی سەیری ئەو دیمەنەی كردبێت راستەوخۆ دیمەنی ئەو سەربازە ئیسرائیلیانەی بەبیر دێتەوە كە چۆن منداڵێكی فەلەستینیان گرت و بە ئەنقەست دەستیان دوو پارچە كرد.
ئەو دیمەنانەمان بیر دەكەوێتەوە كە چۆن ئینگلیزەكان دەستڕێژیان لەخەڵكی هیندستان كرد بۆ ئەوەی نەهێڵن خۆپیشاندان ئەنجام بدەن.

ئەو دەوڵەتە, كوردەكان بە هی خۆی نازانێت.
هەر بۆیەشە وەك هێزێكی داگیركەر جموجۆڵ دەكات لەو هەرێمەدا.
مرۆڤەكانیان دەكوژێت و دەیانخاتە ناو بیرەكان، گوندەكان دەسوتێنێت، زیندانەكان پڕ لە گەورەو بچووك دەكات.

ئێستا كە لەهەموو كاتەكان زیاتر لە ئاشتی و ئارامی نزیك بووینەتەوە، هەڵدەستن سەری منداڵەكان وردو خاش دەكەن.
ئەم رووداوەش لەبەر ئەوەی كامیرای لێبوو بینیمان، سەرەڕای ئەوەی كامیراشیان بینیبوو هەر وایان كرد.
جا بیر بكەنەوە ئەو گوندانەی كە لەشاخەكاندان یان لە تاكە ماڵەكانن یان لە كۆڵانە تەسك و شاراوەكانی نێو شارەكاندان، كامیرای لێ نییەو هەر خوا دەزانێ چی بەو خەڵكە دەكەن.
ئەگەر ئەوان وایان لە ئێوە كردبا، سەری منداڵەكانتانیان بە قۆنداخە تفەنگ پانكردبایەوە، چیتان دەكرد؟

كێ ئەو مرۆڤانە بپارێزێ؟
ئێستا تێدەگەن ئەو شەڕە 25 ساڵە بۆچی بەردەوامە؟
ئایا تێدەگەن ئەو منداڵە كوردانەی سەرەڕای ئەوەی دەشزانن دەمرن، بۆچی بەشاخەكاندا هەڵدەگەڕێن؟
ئەگەر دەرنەكەون و بەشاخەكاندا هەڵنەگەڕێن چی بكەن؟
ئەگەر ئێوە گیان و ناموس و منداڵەكانیان نەپارێزن و گرەنتی نەكەن، ئەی ئەوانە بەكێ باوەڕ بكەن و پشتی خۆیان بەچی ببەستن؟
بێگومان بەشاخەكان هەڵدەگەڕێن و پشتی پێدەبەستن.

سیاسەتمەدارو رۆژنامەنووسان دەڵێن: پەكەكە تیرۆریستە.
هەركەس و منیش لەگەڵیاندا دەڵێین: با پەكەكە كۆتایی بەشەڕ بێنێت.
دیارە گوتنی (پەكەكە تیرۆریستە) زۆر ئاسانە.
باشە كاتێك كە (ژیتەم)* لەپشت سەرەوە مرۆڤەكان دەكوژێت، چییە؟
ئەو هێزە تایبەتانەی دەوڵەت، كاتێك بە قۆنداخی تفەنگەكانیان سەری منداڵانی كورد پان دەكەنەوە، چین؟
باشە ئەوەی دەیكەن، تیرۆر نییە؟
تۆ ئەگەر منداڵ و ژن نەناسیت و تیرۆریان بكەین، ئەو خەڵكە چی بكەن؟
ئەو مرۆڤانە چۆن خۆیان بپارێزن؟
دە وەرن ئەوەم پێ بڵێن.
پێم بڵێن ئەو مرۆڤانە چۆن خۆیان و ژن و منداڵەكانیان بپارێزن؟
گەر تۆ ئەو خەڵكە هەمووی بەدوژمن بزانیت و گوندەكانیان بسووتێنیت و ژنەكانیان هەتك بكەیت و پیاوەكانیان بخەیتە زیندان و سەری منداڵەكانیشیان پان بكەیتەوە، ئەوا ئەو خەڵكە دەچنە سەر شاخەكان، سەریش كەوتن.
پاشان دێیت و بەساڵان شەڕیان دەكەیت و دەبیتە هۆكاری كوشتنی زیاتریش.

كە دیمەنەكەم لە تیڤی بینی ئەو دڕندەییە تۆقێنەرەو دەستخۆشییەی پۆلیسم بەچاوی خۆم بینی، بیرم كردەوە، كە دەوڵەت هیچ ناتوانێت ئەو هەرێمە بەڕێوە ببات و تەنانەت مافی ئەوەشی نییە بەڕێوەی ببات.

تۆ دەچیتە ئەوێ و پێیان دەڵێیت من دەوڵەتی ئێوەم، باشە ئەمەیە دەوڵەتی ئەوان؟
سەربازە چەكدارەكانتان لەو شارانەی كە لە سەدا نەوەدیان كوردن، دروشمی من توركم دەڵێنەوە.
پەیامیان پێدەدەن كە بەچەك دەتانپڵیشێنینەوە، ئەوەیە دەوڵەتی ئەوان؟
ئەو دەوڵەتە چی دەوێت؟ شەڕی دەوێت یان ئاشتی؟
ئەگەر تۆ زوڵم لەهەموو كەسێك بكەیت، قەد ناتوانیت لەو شەڕە سەر بكەویت، لەمێژووشدا كەس بەو شێوەیە سەرنەكەوتووە.
تۆ دەتوانیت بەسەر سوپایەكدا سەربكەویت، بەڵام هەرگیز ناتوانیت لەبەرامبەر كۆمەڵانی خەڵكدا سەركەوتن بەدەست بێنیت.
ئاشتیتان دەوێت، ئاشتی بە پانكردنەوەی سەری منداڵان بەدی نایەت.
زاڵمەكان نە لەشەڕدا سەردەكەون و نە لە ئاشتیدا.
ئەو منداڵەم بینی كە چۆن بە قۆنداخە تفەنگ لەسەری درا.

ئەو خاكە تۆ ببیتە خاوەنی چییە؟ نەبیتە خاوەنی چییە؟
تەنانەت ببیتە خاوەنی ئەو خاكەش، خەڵكەكە نابێتە هی تۆ.

كێ سەری منداڵەكان نەشكێنێ و ئازاریان نەداو نەیانداتە بەر قۆنداخە تفەنگ، لەجیاتی ئەوە لەگەڵیان پێ بكەنێت و یاریان لەگەڵدا بكات، ئەو خەڵكە دەبێتە هی ئەو.
ئەو كاتە نەترسێ و پڕ بەدڵی خۆت بڵێ بەسەدان ساڵە ئەو خاكە ناوی كوردستانە.
لەگەڵ منداڵەكان دانیشەو گۆرانی بڵێ، شیعری ئەحمەد عارفیان بۆ بخوێنەوە.

 

* ژیتەم: دەزگای هەواڵگری سەر بە سەرۆكایەتی گشتی هێزە چەكدارەكانی جەندرمە، ئەو دەزگایە ناوبانگێكی زۆر شوومی هەیە لەناو كوردەكانی باكوری كوردستان، چونكە لەكوشتنی هەزاران خەڵكی بێتاوانی كورد بەرپرسیارە.

 

 

بۆبینینی تاوانی كوشتنی منداڵان لەتوركیا ئەم لینكە بكەرەوە:

http://www.roj.tv/news/126/ARTICLE/3334/2009-04-23.htm

 

ئۆرژینالی نووسینەكە بەزمانی توركی:

http://www.gazeteoku.com/popup.php?url=http://www.taraf.com.tr/

 

Previous
Next
This site is registered on wpml.org as a development site.