تكایه زمانه‌كه‌شمان گه‌نده‌ڵ مه‌كه‌ن
زمان یه‌كیكه له كۆڵه‌كه‌كانی نه‌ته‌وه . خاوێنكردن و گه‌شه‌پیدانی ، راژه‌یه‌كه‌و شێواندنی جۆرێكه له‌گه‌نده‌لی . كاتێ وشه‌یه‌كی بیانی ئه‌كه‌ویته ناو زمانه‌كه‌مان ، ئه‌بی بزانین چۆن به‌كاریده‌هێنین . زانینه‌كه‌ش بریتییه له‌وه‌ی ئاخۆ وشه‌یه‌كی به‌رامبه‌رو هاوواتامان هه‌یه؟یا ئه‌توانین وشه‌یه‌كی هاوواتای بۆداتاشین ؟ئه‌گه‌ر نه‌توانرا ، ئه‌وسا ئه‌بێ بزانین به‌كارهێنانی وشه بیانییه‌كه وه‌ك خۆی له‌گه‌ڵ سروشتی زمانه‌كه‌ماندا ئه‌گونجێ ؟ ئه‌گه‌ر نه‌گونجا ئه‌بێ به‌رگێكی خۆمالیی به‌به‌ر ئه‌و وشه‌یه‌دا بكه‌ین . ئه‌م كاره‌ش وه‌نه‌بێ ته‌نیا ئه‌ركی پسپورانی زمانبێ . هه‌ندێجار ره‌مه‌كی خه‌لكه‌كه‌ش ئه‌و ئه‌ركه ئه‌نجامئه‌دا .
فلیم نه‌ك فیلم
بۆنموونه ، كاتێ وشه‌ی FILM كه‌وته زمانی كوردییه‌وه ، خه‌ڵكه‌كه له‌خۆیانه‌وه كردیان به فلیم نه‌ك فیلم . چونكه فیلم له‌گه‌ل سروشتی زمانی كوردیدا ناگوزنجێ . له‌ناو هیچ وشه‌یه‌كی كوردیدا پیته‌كانی {ف . ی . ل } به‌دوای یه‌كدا نایه‌ن . به‌لام پیته‌كانی {ف . ل . ی } به‌دوای یه‌كدا دێن وه‌ك {فلیقانه‌وه ، فلیچقه ، ئه‌یفلیقێنێته‌وه }
ئه‌م به‌رگی خۆمالی له‌به‌ركردنه هه‌یه‌و پێویسته به‌پێی سروشتی هه‌ر زمانێك . عه‌ره‌ب وشه‌ی رێیدیۆی كردوه به رادیۆ ، بردن به برید ، ناساز به نشاز ، زه‌ینه‌ڵه كوسته به زین القوس ، فه‌له‌ستا ن به فلستین ، دیموكراتی به دیمقراتی .. هه‌موو پاشگریكی TION له ئنگلیزیدا ئه‌بێ به شن به‌لام له فه‌ره‌نسیدا ئه‌بێ به سیۆن . هه‌ندێ زمان ئه‌لین ئوستریا هه‌ندێكیتر ئوتریش .هه‌موو زمانه سلاڤییه‌كان به HISTORY ئه‌لین HISTORIA هه‌نگارییه‌كان ئه‌لین TORTENELEM ئنگلیز وشه‌ی BANK ی له BANKO ی ئیتالییه‌وه وه‌رگرتوه . بانكۆ به ئیتالی واتا {ره‌فه } به‌ر له په‌یدابوونی پاره ، له ئیتالیا دامه‌زراوه‌یه‌ك هه‌بوه شتی له خه‌لك وه‌رئه‌گرت و به ئه‌مانه‌ت له‌سه‌ر ره‌فه‌یه‌ك بۆیهه‌ڵئه‌گرتن به‌رامبه‌ر كرێیه‌ك . كه پاره په‌یدابوو ، دادمه‌زراوه‌كه بوو به بانكۆی پاره .
خۆش ئه‌وه‌یه ، ئنگلیزه‌كه خۆیشی ناڵی فیلم به‌لكو ئه‌لێ فیڵم كه یه‌كه‌مجار بۆ وێنه‌ی جووڵاو به‌كارئه‌هات Moving pictures دوایی بوو به‌زاراوه‌یه‌ك بۆ فلیمی سینه‌ما . له سلیمانی و هه‌ندێ شاریكه‌ش تا چل سالێك له‌مه‌وبه‌ر به ده‌هوڵ و زوڕناوه له‌سه‌ر عه‌ره‌بانه‌یه‌كی دووئه‌سپی جاڕی گۆڕینی فلیم ئه‌درا و جارچیه‌كه‌ش هه‌ر ئه‌یوت فلیم . یه‌كه‌مجار خوالیخوشبوو ره‌مزی قه‌زاز سینه‌مایه‌كی هاوینه‌ی دامه‌زران . كه كورسیه‌كان پڕئه‌بوونه‌وه ، حه‌سیری بۆرائه‌خستین ، له‌سه‌ربانی ماڵه دراوسیكانیشه‌وه خه‌لكی چوارمشقی بۆیدائه‌نیشتن و هه‌مووش ئه‌مانوت فلیم . كه فلیمه‌كه‌ش ئه‌پچڕا ، فلیمیكیكه‌ی پیشانئه‌داو هه‌ندێجار تا كاته‌كه ته‌واوئه‌بوو چه‌ند نیوه فلیمیك و چاره‌كه فلیمیكی پیشانئه‌دا و بڕۆو به‌خیرهاتی .
چوار پسپورو زمانزانی وه‌ك د. ئیحسان فوئادو عه‌بدوڵا شالی و جه‌مال عه‌بدول و محمه‌د ئه‌مین هه‌ورامانیش سالی 1985 له فه‌رهه‌نگه‌كه‌یاندا هه‌ر فلیمیان به‌كارهیناوه . جاریك له ته‌له‌فیزیونیكه‌وه بێژه‌ره‌كه هه‌ر ئه‌یوت فیلم ، وتیان ئه‌مه هیشتا زمانی پاكنه‌بۆته‌وه و یه‌كێك زیاتر خۆی بۆرانه‌گیراو به‌تووڕه‌ییه‌وه كه‌ناڵه‌كه‌ی گۆڕی و وتی هه‌ر زمانه‌كه‌مان مابوو گه‌نده‌لی بكه‌ن! جا بوئه‌وه‌ی به‌ر تووره‌بوونیكی له‌و جوِره نه‌كه‌وین ، با هه‌موومان بڵێین فلیم نه‌ك فیلم . به‌هیوای بینینی فلیمێكی خۆش .
