وتەیەکی هەق لەپێناوی ناهەقیدا …. سالار سۆفی
بۆچی ناومان لە سەر داواکارییەکانی هەندێک لە کوردەکانی ڕۆژهەڵات کێشایەوە؟
لە ئەنجامی نزیک بە ٢٠ ساڵ لە دەسەڵاتی حزبی لە هەرێمی کوردستاندا و گەندەڵییەکی هەمەجۆری کەموێنە ، سەرئەنجام خۆپیشاندانەکانی هەرێمی کوردستان بەگشتی و سەرای ئازادیی سلێمانی بەتایبەتی ، بوون بە هیوایەکی گەش بۆ گۆڕانکارییەکی پۆزەتیڤانە لە بەرژەوەندی خەڵکی کوردستان. لەلایەکی ترەوە ، وەک نیگەرانییەک لەلایەن هەندێک لە کوردەکانی ڕۆژهەڵاتی کوردستانەوە ، سەبارەت بە ئەگەری بوونی هەر جۆرە هەوڵێکی دەوڵەتی ئێران بۆ بەکارهێنان و سوودوەرگرتن لەم خۆپیشاندانانە لە بەرژەوەندیی خۆی، مەبەستیان بوو داوایەک ئاراستەی ئەنجومەنی کاتی سەرای ئازادی بکەن و دڵنیا بکرێنەوە لەو بابەتە.
دیارە وەستانەوە لە دژی هەر چەواشەکارییەکی ئێران و ئیسلامی سیاسی ، ئەگەر لە هەر شوێنێکدا هەبێت ، کارێکی گرنگە و شایانی پشتیوانییە و بە قازانجی ڕاپەڕینەکان و خەڵکی کوردستان تەواو دەبێت ، بۆیە ئێستاش و لە هەر کات و شوێنێکی تردا ، بەدەر لە ووردەکارییەکان ، ئەوە بە ئەرکی خۆمان دەزانین و پشتیوانیشی لێ دەکەین. هەمان بۆچوونمان بە ئەوانیش ڕاگەیاند.
بەداخەوە ، لە ئەنجامی بەدوواداچوونماندا و بە هاوکاری چەند هاوڕێیەک ، سەرەتا گومانێکمان لا دروست بوو سەبارەت بە ووردەکارییەکان. دواتر بە بەڵگەوە چەند ڕاستییەکی جیاواز لە مەبەستە ئاشکراکانمان بۆ دەرکەوت. لە ئەنجامی ڕووبەڕووکردنەوەی ڕاستییەکانیشدا ، ئەو ڕاستییەمان بۆ تۆختر بووەوە کە ئەگەر چی ئەو داوایە وەک ناوەڕۆک داوایەکی ڕەوایە ، بەڵام مەبەستی سەرەکیی هەندێک لە کەسەکان (نەک هەموویان) لەم داوایەدا ، تەنها وەستانەوە لە دژی ئەو ئەو چەواشەکارییانە نییە ، بەڵکو لە بنەڕەتدا هەوڵی پێشوەختیان هەبووە بۆ دژایەتیکردنی خۆپیشاندانەکان و ئامانجەکانی لەبەرژەوەندی دەسەڵاتێکی گەندەڵی حزبیدا، بە بیانووی بەرژەوەندیی نەتەوەیی، بە واتای وتنی “وتەیەکی هەق لەپێناوی ناهەقیدا”. ئەمەشیان بۆ ئێمە لەسایەی هیچ بارودۆخێکدا ، شایانی ئەوە نییە لێی بێدەنگ بین و خۆپیشاندانی خەڵکی کوردستان بە ناڕەزایەتییەکی جەماوەریی هاوچەرخ دادەنێین کە لە ئەنجامی پەنگخواردنەوەی ٢٠ ساڵ لە بێمافی و گەندەڵی و نادادپەروەریدا تەقیوەتەوە.
هەر بەم هۆیەوە ، لەگەڵ ڕێزی زۆرماندا بۆ ئەو کەسانەی بەبێئاگایی و بێمەبەست و بەپاکی لەگەڵ ناوەڕٶکەکەدا بوون، ئێمەش و چەند هاوڕێەکی تریش لە کاتی جیاوازدا ناوی خۆمان کێشایەوە و بێ پەردە ئەو ڕاستییانەشمان پێ ڕاگەیاندن کە لامان ئاشکرا بووبوون.
لە کاتێکدا ئێمە ئەم ڕاستییانە دەخەینە ڕوو، سووربوونی خۆمان لەسەر ڕێگریکردن لە دەستی ئێران و ئیسلامی سیاسی و هەر جۆرە دەستێکی ڕەشی دوور لە بەرژەوەندییەکانی خەڵکی کوردستان دووبارە دەکەینەوە ، لە هەر کاتێکدا کە هەوڵێکی لەو جۆرە لە ئارادا بێت.
هەر بەم بۆنەیەوە چاودێریکردنی وردی بارودۆخەکە و پارێزگاریکردنی پیشوەخت لە ئامانجەکانمان بە ئەرکی هەمووان دەزانین.
سالار سۆفی
12/03/2011
