Skip to Content

Thursday, May 23rd, 2024
لومۆند دیپلۆماتیک بە زمانی کوردی

لومۆند دیپلۆماتیک بە زمانی کوردی

Closed
by April 2, 2011 کتێبخانە

ماوەی ساڵێک زیاترە رۆژنامەی بەناوبانگی فەڕەنسی لومۆند دیپلۆماتیک بە زمای کوردی ٠هەردوو دیالێکتی سۆرانی و کرمانجی) دەردەچێت. دوای دەرچوونی بە زمانی کوردی کۆنسولیەی فەڕەنسی لە هەولێر مێزگردێکی تایبەتی بۆ رێکخست و ئەو پرۆژەیەی وەکو هاوکارییەکی کولتوریی گرنگی نێوان فەڕەنسا و کوردستان وەسف کرد. کەنالی رەسمی دەوڵەتی تورکیاش دەرچوونی لومۆند دیپلۆماتیکی وەکو رووداوێکی گرنگ راگەیاند کە سەنگی زمانی کوردی دەسەلمێنێ.

لومۆند دیپلۆماتیک مانگنامەیەکی فەڕەنسیە و لە ساڵی 1954 ەوە لە لایەن هیوبێرت بۆڤ-مێری یەوە دامەزراوە. سەرەتا وەکو پاشکۆی رۆژنامەی لومۆندی فەڕەنسی دەردەچوو. له ‌1996 وه‌کو کۆمپانیایه‌کی سه‌ربه‌خۆ خۆی راگه‌یاند. ئەمڕۆ لومۆند دیپلۆماتیک لە سەرانسەری جیهان بە 27 زمان دەردەچێت و لە هەر وڵاتێک پاشکۆی رۆژنامەیەکی ئەو وڵاتەیە کە لەگەڵ لومۆند دیپلۆماتیک کۆنتراکتی هەیە و بە پێی پێوەری رۆژنامەگەریی پرۆفێشنال کاردەکات. لە کوردستان وەکو پاشکۆی هەفتەنامەی رووداو دەردەچێت.

“دوای ده‌رچوونی لومۆند دیپلۆماتیک به ‌زمانی ئینگلیزی لە ساڵی 1999 (وەکو پاشکۆی ضە گاردیەن)، زانای زمانه‌وانی و فه‌یلوسوفی ئه‌مریکی نۆوم چۆمسکی ده‌نووسێ: لومۆند دیپلۆماتیک تاکه‌ رۆژنامه‌‌ی باوه‌ڕپێکراو و خاوه‌ن  به‌هایه‌ و ده‌رچوونی به‌ زمانی ئینگلیزی هه‌واڵێکی زۆر گرنگه‌ بۆ هه‌موو ئه‌وانه‌ی که‌ هیوادارن له‌ جیهان تێبگه‌ن و به‌ره‌و باشتر بیگۆڕن . هه‌روه‌ها نووسه‌ر و ره‌خنه‌گری به‌ریتانی جۆن بێرجێر ده‌ڵێ: بۆ ئه‌وه‌ی، له پشته‌وه‌ی شێواندنی زانیاریه‌کان، له‌و شتانه‌ تێبگه‌ین که له‌ جیهان رووده‌ده‌ن، خوێندنه‌وه‌ی به‌رده‌وامی لومۆند دیپلۆماتیک زۆر گرنگه‌ ،

“ئه‌وه‌ی ئه‌و به‌هاو هه‌ڵسه‌نگاندنه‌ نایابانه‌ له‌ لایه‌ن ئه‌و بیرمه‌ند و که‌سایه‌تیه‌ رۆشنبیره‌ جیهانیانه‌ به‌ لومۆند دیپلۆماتیک ده‌به‌خشێ، ته‌نها ئه‌وه‌ نیه‌ که‌ لومۆند دیپلۆماتیک رۆژنامه‌یه‌کی سه‌ربه‌خۆ و ره‌خنه‌گره‌‌ و له‌سه‌ر بنچینه‌ی فاکت و به‌ڵگه‌‌ وتار و راپۆرته‌کانی داده‌ڕێژێ، یا ئه‌وه‌ی که له‌سه‌ر ناوچه‌ و بابه‌تگه‌لێک ده‌نووسێ که‌ رۆژنامه‌‌نووسی تر ده‌ستی بۆ نابه‌ن، به‌ڵکو هاوکات له‌گه‌ڵ ئه‌مانه‌، هه‌روه‌کو هارپه‌رز مه‌گه‌زین ده‌نووسێ،  لومۆند دیپلۆماتیک سه‌رچاوه‌یه‌کی جه‌وهه‌ریه‌ بۆ بیرکردنه‌وه‌ی ئه‌لته‌رنه‌تیڤئامێز و چاره‌سه‌ری داهێنه‌رانه.

“خوێندنه‌وه‌ و به‌دواداچوون و لێکۆڵینه‌وه‌ و گه‌ڕان و راڤه‌کردن ئه‌و خاسیه‌تانه‌ن که نووسه‌ر و رۆژنامه‌نووسی لومۆند دیپلۆماتیکیان پێده‌ناسرێته‌وه‌. بۆ گه‌یشتن به‌و ئامانجانه‌ی که لومۆند دیپلۆماتیک ماوه‌ی زیاتر له په‌نجا ساڵه‌ کاریان له‌سه‌ر ده‌کات، ئه‌و پشت به نووسه‌ر و رۆژنامه‌نووس و چالاکوانی به‌توانا و پسپۆڕ و شاره‌زا له‌سه‌رانسه‌ری جیهان ده‌به‌ستێ.  مه‌به‌ستی سه‌ره‌کیی ئه‌وانه‌ی کار له‌گه‌ڵ لومۆند دیپلۆماتیک ده‌که‌ن، ته‌نها خستنه‌ڕووی زانیاری نیه‌ ده‌رباره‌ی دیارده‌ و رووداو و شته‌کان له‌سه‌ر ئاستی جیهانی، به‌ڵکو له‌گه‌ڵ ئه‌و زانیاریه‌ و به پشتبه‌ستن به‌ پرۆسه‌یه‌کی ورد و عه‌قلانیی به‌دواداچوون و گه‌ڕان و لێکۆڵینه‌وه‌ و راڤه‌کردن، لومۆند دیپلۆماتیک پرسیار ده‌وروژێنێ، پرسیاری گونجاو که‌ وه‌ڵامدانه‌وه‌یان ده‌بێته‌ هۆی دروستبوونی گفتوگۆ، دروستبوونی دیالۆگ، لومۆند دیپلۆماتیک خوێنه‌ر داوه‌ت ده‌کات بۆ بیرکردنه‌وه‌ و تێگه‌یشتنی قووڵ و ره‌خنه‌گر و داهێنه‌رانه‌. بۆیه‌ خوێنه‌ری لومۆند دیپلۆماتیک ئه‌و که‌سانه‌ن که‌ به‌ نووسینی کاڵوکرچ و سه‌ره‌ڕۆ و ناپابه‌ند به‌ فاکت و به‌ڵگه‌ و سه‌رچاوه‌ی باوه‌ڕپێکراو رازی نین. ئه‌وان له‌ خوێندنه‌وه‌ی لومۆند دیپلۆماتیکه‌وه‌ ئه‌وه‌ به‌ده‌ست ده‌هێنن که زۆربه‌ی رۆژنامه‌ و کۆمپانیا گه‌وره‌کانی میدیا نه‌یانتوانیوه‌ پێی بگه‌ن. ئه‌و خاسیه‌ته‌ی لومۆند دیپلۆماتیک له‌م سه‌رده‌مه‌ ئاڵۆزه‌ی ته‌کنه‌لۆژیای زانیاری، سه‌رده‌می ئینته‌رنێت و جیهانگیری که ‌بونیادی کار و رێکخستن و په‌یوه‌ندییه‌کانی مرۆڤی له‌ سه‌رانسه‌ری جیهان گۆڕیوه‌،  له‌ هه‌موو کاتێک زیاتر پێویسته‌.”

بۆ خوێندنەوەی ژمارەکانی لومۆند دیپلۆماتیک بە زمانی کوردی، سەردانی وێبسایتی رۆژنامەکە بکەن:
www.monde-diplomatique-kurde.com
بۆ ئابوونە: پەیوەندی بکەن بە:
info@monde-diplomatique-kurde.com

 

 

Previous
Next
This site is registered on wpml.org as a development site.