Skip to Content

Sunday, June 23rd, 2024
سێرچ …. ره‌حمان خانی

سێرچ …. ره‌حمان خانی

Closed
by April 15, 2011 ئەدەب

 

باران بوون  وه‌رینه‌ بیابانه‌وه‌!؟ نه‌هه‌نگی كه‌نداو لووشی دان ؟!كوێتان بۆ بگه‌ڕێین؟!  زستانێك و دوو و ده‌و بیست و سێ‌  زستانی ره‌به‌قه‌  چاومان كول بوو ،ده‌روونمان شه‌قار شه‌قار ،دڵمان كه‌یل ،زمانمان په‌ڵاس ، نزامان ئاسمانی كاس كرد ،ده‌سڕێك ، كیسه‌توتنێك،سوخمه‌یه‌ك ، سه‌ڵته‌یه‌ك ،كراسێكیان نه‌هێنایه‌وه‌ به‌رامه‌ی یوسف – ه‌كانی ئێوه‌ی لێ‌ بێ‌ ، پیره‌داره‌كانمان بۆ قومێ‌ عه‌تری غه‌ریبیتان له‌ ره‌گه‌وه‌ وشك بوون ،نه‌مامه‌كان  بێناز وره‌نگزه‌رد گه‌وره‌بوون ،كه‌چی له‌گه‌ڵ  پایزه‌په‌ڵه‌یێ‌ ، له‌گه‌ڵ هه‌ورێ‌  هه‌ر نه‌گه‌ڕانه‌وه‌ ته‌ڕیانكه‌ن ، نه‌هاتنه‌وه‌ خه‌ڵتانمان كه‌نه‌وه‌ له‌ ماچ ! چۆڕی ئۆقره‌مان لێ‌ بِڕاو كه‌س ئه‌دره‌سی ته‌واوی  ئێوه‌ی پێ‌ نه‌داین ! هه‌موو شتێ‌ له‌م كه‌لاوه‌ بێنازانه‌  بۆگرووزی هه‌ناسه‌ی ساردتانی  لێ‌ ده‌هات ، هه‌موو گوڵێ‌ له‌م به‌هاری بێ‌ نه‌رگزه‌جاڕه‌ی ئێوه‌  ره‌نگی زامتانی گرتبوو،  كوێتان بۆ بگه‌ڕێین ، له‌ چ په‌ڕه‌سێلكه‌یه‌ك بپرسین( هێلانه‌ی نۆغرۆ)ی ئێوه‌مان پیشاندا ؟!  كام گه‌رده‌لوول وخۆڵبارین بۆنی توتن وسمڵ ومێخه‌كبه‌نی ئێوه‌ی لێ‌ دێ‌ تا تێر لووتی تێ‌ بژه‌نین؟! كام رێچكه‌ی خوێن ، كام كوێره‌رێ‌ی فرمێسك ده‌مانهێنێته‌وه‌ سه‌ر برینه‌كانتان !؟ بڵێ‌ ی ئه‌و دووكه‌ڵانه‌ی له‌ لمستانه‌وه‌ هه‌ڵده‌چن نه‌مانهێننه‌وه‌ سه‌ر مه‌قاڵه‌ی دڵی هه‌ڵقرچاوی ئێوه‌!؟كوێتان بۆ بگه‌ڕێین!؟ فه‌یسبووكی چ گۆڕستانێكی بێ‌ كێل! یوتیوبی چ شاخێكی ئێسك وپروسكی بن ئه‌رز!؟سێرچی كوێ‌ بكه‌ین، ده‌سا ده‌بێ‌ ئه‌و وڵاته‌ سه‌ره‌وبن بێ‌ ،ده‌بێ‌ گڕكانێك بیابان ژێروژووركا ، بۆ ئه‌وه‌ی شاری كۆسته‌كانی ئێمه‌ ، هه‌زاران دێ‌ له‌ كه‌له‌ سه‌ر ،ده‌ستی په‌ڕیو،قاچی له‌ هه‌نگاو به‌ جێماو، جومجومه‌ی له‌ كفن یاخی كورد ده‌ركه‌وێ‌!!

Previous
Next
This site is registered on wpml.org as a development site.