Skip to Content

Sunday, June 23rd, 2024
میلیتاریزه‌كردنی شار ….. ئه‌حمه‌د ڕه‌سوڵ ژاژڵه‌یی

میلیتاریزه‌كردنی شار ….. ئه‌حمه‌د ڕه‌سوڵ ژاژڵه‌یی

Closed
by April 25, 2011 گشتی

 

 به‌ درێژایی مێژووی نوێی ده‌سه‌ڵاتدارێتی سیاسی,، به‌گشتی ده‌توانین بڵێین هه‌موو ده‌سه‌ڵاتێكی سته‌مگه‌ر و دیكتاتۆر و خۆسه‌پێن (جا ئه‌و هێزه‌ چ له‌ ڕێگای هه‌ڵبژاردن، شۆڕشی جه‌ماوه‌ری، شۆڕشی چه‌كداری و پارتیزانی یان كۆدێتای سه‌ربازیه‌وه‌ ده‌سه‌ڵاتی گرتبێته‌ ده‌ست)، سه‌ره‌تا به‌ داگیركردن و به‌ حزبیكردن و به‌ موڵكی خۆ زانینی هه‌موو پله‌ و پایه‌ گرنگ و حه‌ساسه‌كانی وڵات بۆ سه‌رۆك و سكرتێر و كه‌سانێكی زۆر كه‌می ده‌وروبه‌ری و دواتریش زۆربه‌ی (ئه‌گه‌ر نه‌ڵێین هه‌موو) پۆسته‌ ئیداری و خۆجێیی و حكومی و ناحكومیه‌كانیش بۆ خه‌ڵكانی گوێڕایه‌ڵ و ملكه‌چی خۆیان ده‌ستپێده‌كات، وه‌ به‌كارهێنانی هه‌موو ئه‌و پله‌ و پایه‌ و پۆستانه‌ بۆ به‌هێزكردن و قه‌به‌كردنی حزب هه‌م له‌ ڕووی ماددی و دارایی، هه‌م له‌ ڕووی چه‌ندێتی به‌شه‌رییه‌وه‌ به‌ شێوه‌یه‌كی نایاسایی و هه‌ندێجاریش به‌ داتاشین و ملشكاندنی یاسایی بۆی، هاوكات تاڵانكردن و هه‌ڵلوشینی بڕێكی زۆری پاره‌ و داهاتی گشتی بۆ خه‌زێنه‌ی حزب و تاكه‌كه‌سه‌كانی سه‌ره‌وه‌ی حزب و سه‌رۆك و سكرتێر و بنه‌ماڵه‌كانیان.
      لێره‌شه‌وه‌ دامه‌زراندنی له‌شكرێكی چه‌كداری گوێڕایه‌ڵ و ملكه‌چ (له‌ پێناوی موچه‌ و بژێویدا) و ئاماده‌ بۆ جێبه‌جێكردنی هه‌موو بڕیارێكی سه‌رۆك وبنه‌ماڵه‌ و كه‌سانی ده‌وریان له‌ كوشتار و گرتن و لێدان و ترساندن و تۆقاندنی كۆمه‌ڵگا و ڕۆژ به‌ ڕۆژ به‌رته‌سككردنه‌وه‌ی زیاتری ئازادی سیایسی و ڕاده‌ربڕین و چاپ و بڵاوكردنه‌وه‌و سه‌ركوتی ده‌نگی ناڕه‌زایه‌تی، وه‌ هه‌موو ئه‌مانه‌ش هاوته‌ریب له‌گه‌ڵ ماشێنێكی زه‌به‌لاحی ڕاگه‌یاندن كه‌ ته‌نها له‌سه‌ر ستایش و پیاهه‌ڵدانی سه‌رۆك و بنه‌ماڵه‌ و مێژوویان و به‌ پیرۆزكردنیان ئیشده‌كات. ئه‌م میدیا كۆنتڕۆڵكراوه‌ له‌ جێگای نمایشكردنی هه‌مه‌ڕه‌نگی و ده‌نگه‌جیاوازه‌كان و گه‌یاندنی زانیاری و هه‌واڵی ڕاست له‌ باره‌ی هه‌رشتێكه‌وه‌ كه‌ په‌یوه‌ندی به‌ ژیانی خه‌ڵك و ئاینده‌ و چاره‌نوسی وڵاته‌وه‌ هه‌بێت، خه‌ریكی ماكیاژكردنی ده‌سه‌ڵات و گه‌وجاندنی به‌شێكی دڵپاك و ساده‌ی میلله‌ت ده‌بێت له‌سه‌ر ده‌ستی سوپایه‌ك له‌ ئیعلامی نابه‌رپرسیار و مشه‌خۆر به‌سه‌ر سامانی گشتی وڵاته‌وه‌. ده‌بێت دان به‌وه‌دا بنێین كه‌ ئه‌م ئیعلامیه‌ توتیئاسا و قوڕمیشكراوانه‌ كاریگه‌ری ترسناكیان هه‌یه‌ هه‌م له‌ خۆڵكردنه‌ چاوی به‌شێكی گه‌وره‌ی خه‌ڵك و هه‌م له‌ ئاڕاسته‌كردن و لێخوڕینی ده‌سه‌ڵات به‌ره‌و كه‌ڕی و كوێری و ملهوڕی.
      هه‌موو ئه‌وانه‌ی سه‌ره‌وه‌ له‌ مێژووی ده‌سه‌ڵاتدارێتی كوردیدا له‌دوای ڕاپه‌ڕینه‌وه‌ به‌ ئاشكرا و به‌ڕوونی ده‌بینرێن.
      له‌ ڕابردوودا شه‌ڕی نێوان ئه‌م دوو هێزه‌ خۆ به‌یه‌كه‌وه‌ گرێداوه‌ی ئێستای ده‌سه‌ڵاتداری كوردستان له‌سه‌ر پاره‌ و كورسی، ئه‌گه‌ر هۆكاری خیانه‌تیان بووبێت به‌رامبه‌ر كورد و بێڕێزی و سوكایه‌تی بووبێت به‌ خۆیان و مێژوویان و وه‌ هه‌م زه‌بری كوشنده‌ له‌ڕه‌وتی  مێژووی خه‌بات و قوربانیدانی خه‌ڵكی كوردستان بۆ ڕزگاری، ئازادی و دیموكراسی بووبێت، ئه‌وا ئێستا گه‌وره‌ترین ناپاكی و دڕنده‌یی هاوبه‌شیان ئه‌نجامده‌ده‌ن و به‌ئاشكرا شه‌ڕی خۆیان دژ به‌ كۆمه‌ڵگا و خواست و داواكانی، دژ به‌ ئازادی و چاكسازی بنه‌ڕه‌تی و دیموكراسیه‌ت ڕاده‌گه‌یه‌نن له‌ ڕێگای ته‌نینی كوچه‌ و شه‌قامه‌كان به‌ جاسوس و پڕكردنی شار و شارۆچكه‌كانی كوردستان له‌ هێزی چه‌كدار و بڵاوكردنه‌وه‌ی شه‌ق و زلله‌ و كوته‌ك وه‌شێنه‌كانیان به‌ ناو خه‌ڵكیدا بۆ ترساندن و بێده‌نگكردن و ده‌مگرتن و لێدان و فڕاندن و ئه‌شكه‌نجه‌دان و له‌زیندان توندكردنی گه‌نجانی ناڕازی و خوێندكاران و مامۆستایان و نوسه‌ران و میدیاكاران و چالاكانی مه‌ده‌نی و سیاسی و ئازادیخوازانی كورد.
      ڕێگرتن له‌ ناڕه‌زایه‌تی هێمنانه‌ و قه‌ده‌غه‌كردنی خۆپیشاندان و بێسه‌روشوێنكردن و په‌لاماردانی هه‌ره‌ وه‌حشیانه‌ و هیستیریانه‌ی ده‌سه‌ڵات له‌ ڕیگه‌ی سخوڕ و ده‌ست و پێوه‌ند و ئه‌ڵقه‌له‌گوێكانیه‌وه‌ بۆ هه‌ر كه‌سێك كه‌ بچوكترین ئاماژه‌ی ناڕه‌زایه‌تی و خۆپیشاندانی تیا ببینن (وه‌ك ئه‌وه‌ی له‌ هه‌ولێر ڕووده‌دات)، هه‌روه‌ها وه‌ڵامدانه‌وه‌ی خۆپیشاندانی مه‌ده‌نیانه‌ی خه‌ڵك و داواكانیان به‌ خوێنڕشتن و ڕه‌شبگیری و ڕاونان و ده‌ستنه‌پاراستن و ژێرپێنانی یاسا و پشتگوێخستنی هه‌موو په‌یماننامه‌ نێوده‌وڵه‌تیه‌كانی په‌یوه‌ست به‌ مافی مرۆڤ و مافی ده‌ربڕینی ئازادانه‌ی بیروڕا و مافی خۆپیشاندان (وه‌ك ئه‌وه‌ی له‌م دواییانه‌دا له‌ سلێمانی ڕووده‌دات)، هه‌موو ئه‌مانه‌ كه‌وتنی دوا ماسكه‌كانی ده‌سه‌ڵاتن كه‌ هه‌تا ئێستا توانیبێتی هه‌ندێ‌ خه‌ڵكی ساده‌ی پێفریوبدات ، وه‌ ده‌ركه‌وتنی ڕووی ڕاسته‌قینه‌ی ده‌سه‌ڵاتدارانی سه‌ركوتگه‌ر و خۆسه‌پێنه‌ له‌ كوردستان.
      وه‌ڵامدانه‌وه‌ی ناڕه‌زایه‌تی و داواكانی خه‌ڵك به‌ ده‌سته‌واژه‌كانی “ده‌ستی ده‌ره‌كی، ئه‌جێندای سیاسی دژ به‌ ئه‌زمون و دژ به‌ ئاسایش و سه‌قامگیری، ئاژاوه‌گێڕ و تێكده‌ر” ، هه‌روه‌ها مامه‌ڵه‌كردن له‌گه‌ڵ ده‌نگهه‌ڵبڕینی خه‌ڵك له‌ پێناوی گۆڕانكاری ڕیشه‌یی و ئازادی هه‌مه‌لایه‌نه‌ و دیموكراسیه‌تی ڕاسته‌قینه‌ و دادی كۆمه‌ڵایه‌تی به‌ زمانی ئاگر و ئاسن و گرتن و لێدان و زیندان، ده‌ركه‌وتنی نییه‌تی ده‌سه‌ڵاته‌ له‌ خۆسه‌پاندن و درێژه‌دان به‌م حیزبسالاری و قۆرخكردنه‌ی ده‌سه‌ڵات و ئابوری و درێژه‌دان به‌و هه‌لومه‌رجه‌ی كه‌ ئینسانی كورد هه‌ر سواڵكه‌ر و چاوله‌ڕێی حزب بێت بۆ وه‌ده‌ستخستنی هه‌ره‌ لانیكه‌می حه‌ق و بژێوی خۆی. ده‌ركه‌وتنی ڕۆشنی ئه‌و وێنه‌یه‌ی یه‌كێتی و پارتیه‌ له‌ سه‌ر سیاسه‌ت و به‌ڕێوه‌بردن و ئازادی و دیموكراسی هه‌یانه‌. ده‌ركه‌وتنی خواستی یه‌كێتی و پارتییه‌ بۆ درێژه‌پێدانی گاڵته‌كردن به‌ دادوه‌ری و سوككردنی زیاتری ژیان و كه‌رامه‌تی مرۆڤی كۆمه‌ڵگای ئێمه‌.
      بڵاوبوونه‌وه‌ و ته‌نینی ڕێگا و بانه‌كان به‌ جه‌للاد و چه‌كبه‌ده‌سته‌ نهێنیه‌كانی ده‌زگا هه‌واڵگریه‌كانی حزب به‌ جلوبه‌رگی مه‌ده‌نیه‌وه‌، پڕكردنی سه‌را و گۆڕه‌پانه‌كان به‌ داربه‌ده‌ست و به‌ سه‌ربازگه‌كردنی فه‌زای گشتی دوا هه‌نگاوه‌ كه‌ ده‌سه‌ڵات ده‌ینێت، ئه‌م هه‌نگاوه‌ش ئه‌وكاته‌یه‌ كه‌ ده‌سه‌ڵات ناڕه‌زایه‌تی و خۆپیشاندانی لێده‌بێته‌ دێوه‌زمه‌ و وه‌ك مۆته‌كه‌ ته‌ماشای تاك به‌ تاكی ئه‌و كۆمه‌ڵگایه‌ ده‌كات و دوا هه‌نگاوه‌ له‌ دژایه‌تیكردنی ئازادی.
      میلیتاریزه‌كردنی شار و شارۆچكه‌كانی وڵات دوا قۆناغه‌ كه‌ هه‌ر ده‌سه‌ڵاتێكی دیكتاتۆر له‌ ته‌مه‌نی خۆیدا پێیده‌گات. به‌ درێژایی مێژوو ته‌مه‌نی ئه‌م قۆناغه‌ی ده‌سه‌ڵاتی سته‌مگه‌ر و خۆسه‌پێن دژ به‌ ئازادی و خه‌ڵك نه‌یتوانیوه‌ درێژخایه‌ن بێت.

     ئه‌پرێلی 2011
      سوید
      Shadman.ahmad77@yahoo.com

Previous
Next
This site is registered on wpml.org as a development site.