Skip to Content

Thursday, September 29th, 2022

خۆپیشاندان توانی بونیادێكی نوێ بداته‌ كۆمه‌ڵگاو خه‌ڵك له‌خه‌وی غه‌فڵه‌ت به‌ئاگا بێنێ

Closed
by May 22, 2011 گشتی

 

له‌كوردستاندا نوخبه‌یه‌ك دروستبووه‌ نه‌وه‌یه‌كی هۆشیار دروستبووه‌ سڵ له‌وه‌ ناكاته‌وه‌ هه‌موو توانای خۆی بخاته‌گه‌ڕ بۆ چاكسازی و ڕیشه‌كێش كردنی گه‌نده‌ڵی , نه‌وه‌یه‌ك كه‌ ئاماده‌یه‌ تادوا هه‌ناسه‌ی ژیانی شه‌ڕی گه‌نده‌ڵی و ناعه‌داله‌تی بكات , نه‌وه‌یه‌ك كه‌ ده‌توانێ كۆمه‌ڵگا بجولێنێ و له‌وه‌ به‌ئاگای بێنێ كه‌ چیتر به‌سیاسه‌تی دیماگۆجیانه‌و گوفتارو په‌یمانی بێ بنه‌ما فریو نه‌خۆن , نه‌وه‌یه‌كی هۆشیار كه‌ توانیان ئیراده‌یه‌كی ئه‌وتۆ به‌خه‌ڵك ببه‌خشن كه‌ بۆ ڕوو به‌ڕوو بوونه‌وه‌ی ناعه‌داله‌تی و نایه‌كسانی و گه‌نده‌ڵی خۆڕاگرو نه‌فه‌س درێژ بن , لێره‌دا ده‌سه‌ڵات ده‌بێ بزانێ نه‌وه‌ی نوێ چی ده‌وێت و خه‌ونه‌كانی چین , بێگومان پرسیارێكی ساده‌یه‌و وڵامه‌كه‌شی زۆرئاسانه‌ , نه‌وه‌ی نوێ نایه‌وێ حیكایه‌تی كۆنی به‌گوێچكه‌دا بچرپێنی , نایه‌وێ سه‌ربورده‌و دیرۆكی كۆنی بۆ باس بكه‌ی , به‌ڵكو ئه‌و ده‌یه‌وێ باسی ئێستاو ئاینده‌ی بۆ بكه‌ی , ده‌یه‌وێ نه‌خشه‌ی دواڕۆژێكی پڕشنگداری بۆ بكێشی و خه‌ونه‌كانی بهێنیته‌دی , چونكه‌ نه‌وه‌ی هۆشیار ده‌زانێ هه‌ندێك حیكایه‌تی كۆن هه‌ن ده‌مێكه‌ باویان نه‌ماوه‌و مۆدێلیان به‌سه‌رچووه‌ , كه‌چی هه‌ندێك كه‌س كردوویانه‌ به‌ وێردی سه‌ر زمانیان و وه‌كو ئاسنی سارد هه‌میشه‌ ده‌یكوتنه‌وه‌ , ئه‌و حیكایه‌تانه‌ش بریتین له‌ خه‌باتی دێرین خه‌باتی حیزبایه‌تی خه‌باتی چینایه‌تی خه‌باتی شاخ و داخ , یان فڵانه‌ حیزب ئه‌وه‌نده‌ ساڵه‌ خه‌باتی هه‌یه‌ فڵانه‌ حیزب ئه‌وه‌نده‌ ساڵه‌ قوربانی داوه‌و وایكردووه‌و وای هێناوه‌و وای بردووه‌ , یان فلانه‌كه‌س ئه‌وه‌نده‌ هه‌ورازونشێوی بڕیوه‌و ئه‌وه‌نده‌ پێڵاوه‌ی دڕاندووه‌و ئه‌وه‌نده‌ دڕك له‌قاچی ڕاچووه‌و ئه‌وه‌نده‌ نانه‌ڕه‌قه‌ی خواردووه‌و ئه‌وه‌نده‌ له‌سه‌ر حه‌سیر نووستووه‌ , ئه‌م جۆره‌ قسه‌وباسانه‌ له‌ناو چین و توێژی گه‌نجاندا رۆژگاریان به‌سه‌رچووه‌ , چونكه‌ ئێستا نه‌وه‌یه‌ك دروست بووه‌ نایه‌وێ باسی ڕابردووی بۆ بكه‌ی, به‌ڵكو ده‌یه‌وێ پێی بڵێی من ئه‌مڕۆ وات بۆده‌كه‌م و  ئه‌وه‌ به‌رنامه‌كه‌مه‌و ئه‌وه‌ پڕۆژه‌كه‌مه‌و به‌جوانترین شێوه‌ خزمه‌تت ده‌كه‌م , به‌م نه‌خشه‌وپلانه‌ی كه‌ له‌به‌رده‌ستمدایه‌ ده‌توانم ده‌رگایه‌كی فراوانت بۆبكه‌مه‌وه‌ كه‌ تیایدا هه‌موو خه‌ون و خۆزگه‌كانت بێته‌دی , جیلی ئێستا له‌هه‌موو جیله‌كانی پێش خۆی زیاتر هه‌ست به‌ كێشه‌ كۆمه‌ڵایه‌تی یه‌كان ده‌كات , هه‌ست به‌ نه‌بوونی عه‌داله‌ت و نایه‌كسانی ده‌كات , بۆیه‌ به‌قووڵی بیر له‌ چاره‌سه‌ر ده‌كاته‌وه‌و به‌دوای چاره‌سه‌ریشدا ده‌گه‌ڕێ , گومانیشی تێدانیه‌ كه‌ نه‌وه‌ی نوێ ئیراده‌یه‌كی به‌هێزی تێدایه‌و ده‌توانێ كێشه‌كان دیاری بكات و چاره‌سه‌ریشیان بۆ بدۆزێته‌وه‌ , بۆیه‌ ئه‌وانه‌ی به‌ كه‌مبایه‌خه‌وه‌ ته‌ماشای گه‌نج و داخوازییه‌كانی گه‌نج ده‌كه‌ن له‌دیدێكی تۆتالیتارییه‌وه‌ بۆ ئه‌م نه‌وه‌ نوێیه‌ ده‌ڕوانن , چونكه‌ نه‌ له‌ڕووی سیاسی و نه‌ له‌ڕووی ئه‌خلاق و ویژدانیشه‌وه‌ هیچ ماقول نیه‌ ئه‌وه‌ زیاتر له‌مانگێكه‌ گه‌نجانی ئه‌م وڵاته‌ رۆژانه‌ ده‌ڕژێنه‌ ناو مه‌یدانی ئازادی و تا دره‌نگانی شه‌و له‌سه‌ر پێ ده‌وه‌ستن كه‌چی هیچ ده‌سه‌ڵاتدارێك ئاماده‌ نیه‌ سه‌ردانیان بكات و له‌داخوازیه‌كانیان بكۆڵێته‌وه‌ , جارێكیان نیلسۆن ماندێلا ئه‌وپیاوه‌ مه‌زنه‌ ئه‌و سه‌ركرده‌ نمونه‌ییه‌ كه‌ سه‌رۆك كۆماری باشوری ئه‌فریقیابوو , داروده‌سته‌كه‌ی پێیان ڕاگه‌یاند كه‌ له‌جیهانس بۆرك هه‌ندێك كرێكاری كارگه‌كان مانیان گرتووه‌و به‌ كارو موچه‌كانیان ڕازی نین , ماندێللا ده‌سبه‌جێ چوو سه‌ردانی كردن و له‌نزیكه‌وه‌ گوێی له‌داخوازیه‌كانیان گرت و بۆی جێبه‌جێ كردن , لێره‌دا ده‌پرسم ئایه‌ چی تێده‌چێ ئه‌گه‌ر ده‌سه‌ڵاتدارانی كوردیش له‌شوێنه‌ به‌رزه‌كان بێنه‌خواره‌وه‌و بچنه‌ نێو حه‌شاماتی خه‌ڵك و له‌ موعاناتی ئه‌و خه‌ڵكه‌ تێبگه‌ن , بۆچی له‌ژیانی ئێمه‌دا هه‌میشه‌ دیواری به‌رلین هه‌بێت له‌نێوان ده‌سه‌ڵات و خه‌ڵكه‌وه‌ , بۆچی ده‌سه‌ڵاتداره‌كانمان هه‌میشه‌ ڕۆڵیان هه‌یه‌ له‌ لاوازكردنی ئیراده‌ی گه‌ل و به‌هێز كردنی ده‌زگا حیزبییه‌كانیان , سیاسه‌تی ئه‌م ده‌سه‌ڵاتدارانه‌ وایكرد كه‌ حیزب به‌شێكی هێجگار گه‌وره‌ له‌ژیانی كۆمه‌ڵایه‌تی و ئابوری و فه‌رهه‌نگی ئێمه‌ داگیر بكات و بوار نه‌مێنێ كه‌ خۆی نه‌خزێنێته‌ ناویه‌وه‌ , خۆپیشاندان و ناڕه‌زایی ئه‌م خه‌ڵكه‌ش هه‌مووی ڕه‌نگدانه‌وه‌ی ئه‌و سیاسه‌ته‌ ناڕاست و نادروسته‌یه‌ , یه‌كێك له‌كێشه‌و گرفته‌ هه‌ره‌گه‌وره‌كانی ده‌سه‌ڵاتدارانی كورد بریتییه‌ له‌ نائاماده‌گی ئه‌و دیده‌ پلۆرالیزمه‌ی كه‌ له‌وڵاتانی دیموكڕاسی دا هه‌یه‌ , غیابی ئه‌و دیده‌ وایكردووه‌ له‌جیاتی گه‌شه‌كردن و پێشكه‌وتن هه‌میشه‌ له‌ پوكانه‌وه‌و پاشگه‌زبوونه‌وه‌دابین ,

Previous
Next