گفتووگۆ لەگەڵ عەبدوڵڵا مەحمود

عەبدوڵا مەحمود لەسەرکردایەتی حزبی کۆمۆنیست وردەکارییەکان دەخاتەڕوو:
نەوشیروان مستەفا بۆ حزبی کۆمۆنیست: ئێوە چونەتە قولەی قاف و حساب بۆ کەس ناکەن، ئێمە بەعسمان ڕوخاندووە ئێوە چین؟
هاوڕێیانی ئێمە دەپرسن کاک نەوشیروان بۆچی ئاو و کارەبای بارەگاکانی حزبتان بڕیوە، لە وەڵامدا دەڵێت: ئاو و کارەبای خۆمانە و نایدەین بە ئێوە
نەوشیروان بە ڕاشکاوی دەڵێت کەکە گیان ئێمە گوشاری ڕژێمی بەعس و ئیرانمان لەسەرەو لێمان قبوڵ ناکەن ئێوە لێرەبن و دەبێ جوغرافیای ژێر سایەی ئێمە جێبهێڵن
ئەوە داهێنانی یەکێتی بوو کە وەفد دەست بەسەر بکەن، لە کاتێکدا هەرگیز بەعس بەو هەموو دڕندەیی و خوێن ڕێژیەی بۆ یەکجاریش وەفدی یەکێتی یان پارتی کە بۆ مفاوەزات دەچون دەستبەسەر نەکردووە
یەکەمین لایەن کە خۆپیشاندانی خەڵکی بە ئاژاوەگێرو دەستی دەرەکی تاوانبار کردو ئامادەیی نیشاندا بۆ هاوکاری دەزگا ئەمنیەکان! بزوتنەوەی گۆڕان بوو
لە تەمەنی ٣٦ ساڵەی یەکێتیدا، زیاتر لە ٣٣ ساڵ زۆریک لە سەرانی بڕیاربەدەستی ئیستای بزوتنەوەی گۆڕان بەشدارن لە کارنامەی یەکێتی و ئەو هەموو پیشێلکاریانەی دەرهەق بە ئازادی سیاسی و ئازادی بیروباوەرڤکراون.
حزبی شیوعی، زەحمەتکێشانەکان و حزبی سۆسیالستی دیموکراتی کوردستان؟ پارتی کارو پارتی چارەسەر…تاد، فڕیان بەسەر مارکسییەوە نییە
رزگار رەزا چوچانی / سوید
www.nuche.net

عەبدوڵا مەحمود بەدەر لەوەی وەک نوسەرێک دەناسرێت، چەندین بەرپرسیاریەتی هەبووە لەناو حزبی کۆمۆنیستی کرێکاری کوردستان، لەوانە سەرنوسەری بڵاوکراوەی بۆپێشەوە کە زمان حاڵی کۆمیتەی کوردستانی حزبی کۆمۆنیستی کریکاری بوو لە ساڵی ٢٠٠٥ تا هیرشی یەکێتی بۆسەر ئەو حزبە لە تەموزی ٢٠٠٠ دا، هەروەها بەرپرسیاریەتی سیاسی رادیۆ و جێگری سکرتێری کۆمیتەی کوردستان و سکرتیری کۆمیتەی کوردستان و جێگری سکرتیری کۆمیتەی ناوەندی جزی کۆمۆنیستی کرێکاریی کوردستان بووەو ئیستاش لەسەرکردایەتی ئەم حزبەیە، لەم دیمانەیەی گۆڤاری سیڤیل دەگەڕێتەوە بۆ کاتی کێشەکانی یەکێتی لەگەڵ حزبەکەی و ناوەرۆکی کۆبونەوەکانی ئەو حزبە، لەکاتی کێشەکان لەگەڵ نەوشیروان مستەفا و چۆنیەتی دەستبەسەرکردنی نوێنەرەکانیان بۆ حیوار لەلایەن یەکێتی یەوە بۆ سڤیل ئاشکرا دەکات و رایدەگەیەنێت کە ئێستا حزبەکی ناچێتە ناو هیچ هاوپەیمانێتیەکی چەپەوە.
ڕزگار رەزا چوچانی: لەدەرەوەی ئەوەی وتراوە تاکو ئێستا، بۆخۆت بەکورتی چی خوێندنەوەیەکت بۆ کێشەکانی کۆمۆنسیت و یەکێتی هەیە، لەکاتێک کەسێک سەرپەرشتی هێرشەکانی دەکرد کە دەکرێت بڵێین لە بڕوای چەپەوە نزیک بوو؟.
عەبدوڵا مەحمود: کێشەکانی نێوان حزبی ئێمەو یەکێتی جیاوازی و دیدو ململانی سیاسی بوو. هەتا وشەی کێشە زۆر بەدروست نابینم، ئێمەو یەکێتی دوو حزبی سیاسی و چینایەتی سەر بەدوو بزوتنەوەی کۆمەڵایەتی و چینایەتی جیاواز بووین، بزوتنەوەی بۆرژا ناسیونالیستی کوردو بزوتنەوەی کریکاری و سۆسیالیستی، کە هەرلایەکمان دیدی بۆ کێشەکانی خەڵکی کوردستان، رێگاچارەسەرەکان، لەیەک جیاوازو دژ بەیەک بوون. ئەمەش لەژێر سایەی هەرسیستەم و کۆمەڵگایەکی جێکەوتوو، وە هەر حکومەت و دەوڵەتیک کە بانگەشەی دیموکراسی بکات، نیشانەی تەندروست بوونی ئەم سیستەم و دەوڵەت و وڵاتە دەکات.
ئەمە سەرچاوەو ڕیشەی بە کێشەکردنی ئەم جیاوازییە بوو لە لایەن یەکێتی و نیشتمانی و بۆرژوازی کوردەوە. هۆکارەکەشی بەسادەیی ئەوەبوو نە یەکێتی و نە هیچکام لە حزبەکانی سەر بەم ولادەتە، مۆدێرن نین.
یەکێتی نیشتمانی لە گەشەو پێشڕەوی حزبی ئێمە، لە پێشوازی خەڵکی کوردستان لە سیاسەت و رێگاچارەکانی ئێمە، لە راوەستاوی سازشهەڵنەگری ئێمە،… نیگەران بوو. وە ئامادە نەبوو ئەوە قبوڵ بکات، کە هێزێکی سیاسی مۆدێرن و سۆسیالیست لە کوردستاندا مەیداندار بێت و لە مەیدانی سیاسیدا، ململانیی لەگەڵ بکات. هاوکات کۆماری ئیسلامی ئێران کە زۆر نارەحەت بوو لە حزوری سیاسی حزب و سیاسەتەکانی و دەمێک بوو مەئموریەتی سنوردارکردنەوەو لێدانی ئیمەی، بە یەکێتی ڕاگەیاندبوو، یەکێتیش کە لە خۆشخزمەتیدا، کەمی نەهێناوە، ئەمەی لە ئێران بەجدی گرتبوو. هەر بۆیەش دواتر کۆماری ئیسلامی سوپاس و دەسخۆشانە لە رۆژنامەی رەسمی” کەیهان و بەهار”ی خۆیدا، ئاراستەی یەکێتی دەکات لە پای هێرشی چەکدارانەی بۆسەر حزب.
دیارە حزبەکانی بزوتنەوەی ناسیونالیستی کورد، بەدرێژایی تەمەنی سیاسییان، هەرگیز ئامادەنەبوون بە سانایی و سادەیی، مل بەبوونی هیزی سیاسیتر بدەن لە مەیدانی سیاسیدا، وە لەدەرەوەی بازنەی ئەوان ئامادەیی پەیدابکەن، زوربەی هەرەزۆری کێشەی نیوان حزبەکان و جەنگی ناوخۆیان، ریشەی لەو واقعیەتەدا بووە.
حزبی کۆمۆنیستی کریکاری کوردستان، لە کاتی دامەزراندنیەوە، تا کاتی هێرشی چەکدارانەی یەکێتی بۆسەر بارەگاو هەڵسوڕاونی، هەمیشە ڕووبەڕووی گێچەڵ و شەرپێفرۆشتنی یەکێتی و حزبە دەسەڵاتدارەکانی کوردستان بووە.
دواین هێرشی یەکێتی نیشتمانی کوردستان لە تەموزی ٢٠٠٠ دا، سەرەتا بە شکاتنامەیەکی یەکێتی لەلایەن نەزەر عەلی ئەکبەری راویژکاری یاسایی وەزارەتی ناوخۆیانەوە، لە دادگا دەستی پێکرد.
شکاتنامەکەیان ئەوە بوو کە حزبی کۆمۆنیست باسی جیابوونەوەی کوردستان و ریفراندۆم، یەکسانی ژن و پیاو، جیایی دین لە دەوڵەت….دەکات. یەکێتی بەو هەنگاوەی نیشانیدا کە بیروباوەری سیاسی جیاواز، رێگاچارەی جیاواز بۆ واقعی سیاسی کوردستان، دەداتە دادگاو دەیەوێت بەیاسا ئەمانە یاساغ بکات. کاتێک یەکێتی نیشتمانی لەبەرامبەر بزوتنەوەی ئازادیخوازی و رادیکالیزمی کۆمەڵگاو وەڵامی کارسازو مەدەنیانەی حزبی ئێمەدا، زوو ناچارکرا، سکاڵاکەی لەدادگا بکێشێتەوە.
دوای ئەوە یەکێتی لە بەرامبەر كێیە لە ئاستی کۆمەڵایەتی و سیاسیدا، پاشەکشەی پێکرا، دیسان کەوتەوە گێچەڵ کردن بە حزب و ئەمجارەیان بیانووی بردنەدەرەوەی بارەگای جەکداری حزبەکانی بەدەستەوە گرت، ئەمە لەکاتێکدا کە حزبی ئیمە خۆی خوازیاری بردنەدەرەوەی بارەگای چەکداری حزبەکان و بە تایبەتیش حزبە دەسەڵات بەدەستەکان و ئۆردوێک لەپاسەوانی چەکداری بارەگاو بەرپرسەکان بوو، کە لەهەموو گۆشەو کەناریكی شاردا، دەبینران و ژیانی ئاسایی زۆریك لە خەڵکیان شێواندبوو. واوەتر لەوەش ئێمە خوازیاری جیگرتنەوەی دەسەڵاتی میلیشیایی ئەحزاب بووین بە دەسەڵاتی دەوڵەتی و یاسایی و پێناسەکراو و رەسمی.
حزبی ئێمە کە خاوەنی هیزی چەکدار نەبوو، جگە لەپاسەوانی چەند بارەگایەکی خۆی، بەڵام دیسان پێشوازیمان لێکردو ڕامانگەیاند کە ئەوە خواستی ئێمەیەو هیوادارین ئەم هەنگاوەی ئێوە بەئاقاری بردنەدەرەوەی بارەگای چەکداری حزبەکان بیت و لە پێشدا ئەو حزبانەی کەزۆرێک لە شاریان میلیتاریزە کردووە دەست پێبکەن. دیارە ئێمە لامان ڕۆشن بوو کە ئەمە بیانوو وە پیلانێکە لەدژی حزوری سیاسی و رەوتی بەرەوپێشەوەچوونی حزب و سیاسەت و نەخشە و رێگاچارەسیاسیەکانیدا. چونکە دەسپێکردن بۆ داماڵینی شار لە بارەگای چەکدارو دیاردەی چەکداری دەبوو لە هیزو حزبی چەکدارو دەسەڵاتی چەکدارەوە دەست پێبکات، نەک حزبی ئێمە، بەڵام دیسان وتمان ئێمە پشتیوانی و دەکەین وهەنگاوی بەکردەوە دەنێین بۆ جێبەجێکردنی ئەم بریارە!..
دیارە بەر لەوەی ئەم بریارە لە لایەن هیچ حزبێکەوە بچیتە بواری جێبەجێکرنەوە یان تەنانەت حزبەکان ئامادەیی و ڕەزامەندی لەسەر بدەن، رۆژ بەرۆژ گوشارەکان لەسەر حزبی ئێمە زیاد دەکران و تا بەوە گەیشت دەست ببەن بۆ کۆنەپەرسترین شێوازی سەردەمی شەری ئاغاواتی، لە چەشنی بڕینی ئاوو کارەبا، بڕینی هێڵی تەلەفۆن لە بارەگاکانی حزب و ریكخراوە جەماوەرییەکانی نزیک لەحزب و پاشانیش تەنینی دەوروبەری بارەگاکانی حزب بە هیزی چەکدارێكی زۆرو چاودێری کردنی هاوڕییان و ئەو کەسانەی سەردانی حزبیان دەکرد و پاشان کەوتنە گرتنی هەموو ئەوانەی بەمەبەستی سەردان دەهاتن بۆ نوسینگەو بارەگاکانی حزب.
تەواوی سەرکردایەتی یەکێتی نیشتمانی و جێبەجێکەری نەخشەو پیلانەکە بە سەرپەرشتی نەوشیروان مستەفا کە ئەوکات جێگری تاڵەبانی بوو، هەموو سەرکردایەتی یەکێتی نیشتمانی دەخاتە بەردەم لێپرسراوەتی. بە تایبەتیش کە هیچ کەسێک لەسەرکردایەتی یەکێتی لەدژی ئەم تاوانکارییە، نەوەستانەوەو نوزەیان لێوە نەهات. تا ئەو جێگایەی کە نەوشیروان کەسێکی چەپ بێت، خودی نەوشیروان دانی ناوە بەوەدا کە هەرگیز مارکسی نەبووە و دانی نازناوی چەپ بە نەوشیروانەوە، هیچ ڕاستیەکی تیا نییە.
ڕزگار رەزا چوچانی: باسی ئەوە هەیە نوێنەرانی ئێوە بۆ چارەکردنی کێشەکە، سەردانی بەڕێز نەوشیروان مستەفایان کردووە، لەوێ دەست بەسەر کراون، تا واژۆی رەزامەندیان کردووە کە سلێمانی جێ دەهێڵن، بۆچی بەو واژۆ رازی بوون؟، تۆ بزانی هیچ شتێکی نەشیاو بەرانبەر نوێنەرانی ئێوە وتراوە؟ بۆچی چوون و ئەنجامەکەیان چی بوو؟.
عەبدوڵا مەحمود: بەمەبەستی بەرگرتن بەو نەخشەو پیلانەی یەکێتی و بۆ بەرگرتن لەوەی کەس خوێنی لێبێت، وە بۆ بەرگرتن بەو دۆخە نائارامەی دەوری بارەگاکانی حزب و رادیۆ وحزب، حزبی ئیمە وەفدیكی خۆی ناردە لای نەوشیروان مستەفا کە ماڵیان دراوسێی بارەگای رابەری حزب بوو، وەفدی ئێمە ئامادەییان نیشان دابوو بۆ گواستنەوەی بارەگای رابەری حزب، لەو کاتەدا کە ئەمە هەڵوێستی بەرپرسانەی حزب بوو، هەر ئەوکات پولێک هاوڕێی ئیمە لە ناوسەیارەیەکدا کە لە بازار دەگەڕانەوە، لە بۆسەیەکی لەبەرنامە بۆ داڕێژرادا، لە چەندین لاوە دەدرێنە بەر دەستڕێژی چەکدارەکانی یەکێتی هەر لەوێدا سێ هاوڕێمان گیان لەدەست دەدەن و هاوڕیەکی تریشمان بەناوی ” شێخ عەبدول” کەدەست بەرزدەکاتەوە دەدەنە بەردەستڕیژو بە دیلی دەیکوژن. هاوکات هاوڕێیەکی ترمان بە قەناس لەسەر یەکێک لە بارەگاکانی ڕابەری دەکوژن، تەنانەت ئەو وەفدەی حزب لە کاتی هاتنەدەرەوەیان لە ماڵی نەوشیروان مستەفا دا، بە تەقە ئیستیفزاز دەکەن. جێگەی بەبیرهێنانەوەیە یەکێتی رێگەی نەدا کەسو کاری ئەو گیانبەختکردوانە پرسە دابنێن و تەنانەت ریگەیان نەدا خاک سپاریان بکەن و خۆیان بەعس ئاسا لە تاریکی شەو دوور لە چاوی کەس و کارو هاوڕی و ئازیزانیان، ژێر خاکیان خستن.
رۆژیک دوای ئەم تاوانکارییە ئاشکرایە، یەکێتی داوای لە حزب کرد کە وەفدیک بنێریت بۆ قسەوباس، ئەوە بوو حزب وەفدێکی نارد بۆ دانیشتن لەگەڵیان، کەچی لەگەڵ گەیشتنیان بۆ شوێنی دیاریکراو بەوەفدی ئێمە رادەگەیەنن کە دەست بەسەرن، وەفدی حزب دەست بەسەر دەکەن و مەرجی ئەوە دادەنێین کە دەبێ حزب هەموو بارەگاکانی، رادیۆکەی لە ماوەی هەفتەیەکدا بگوازنەوە، وەفدی حزب و دەستبەسەرکراو، دیسان لەروانگەی بەرگرتن بە خوین ڕێژی یەکیتی رایدەگەیەنن کە ئامادەن بارەگاکان بگوازنەوە بەو مەرجەی تەواوی هیزە چەکدارەکانی دەوری بارەگاکان و رادیۆ چۆڵ بکەن… کەچی دیسان بەر لەوادەی دیاریکراو بۆ چۆڵکردنی بارەگاکان، یەکێتی خۆی هەڵی کوتایە سەر بارەگانی حزب و رادیۆ و رێکخراوە جەماوەریەکانی نزیک حزب لەوانە سەنتەری بەرگری لە مافەکانی ژنان، سەنتەری پارێزگاری مناڵان، بەزۆری چەک داخستن و چەندین ژنی پەنادراویان خستە سەر شەقامەکان کە یەکێکیان بەزووی لەلایەن کەس و کارییەوە کوژرا، هاوکات گرتن و راوەدوونانی کادرو ئەندامانی حزب بەردەوام بوو.

رزگار رەزا چوچانی: نەچویتە ناو ئەو وردەکاریەی سەردانی نوێنەرانتان بۆلای بەڕێز نەوشیروان، ئایا چی باسکرا؟ گەشتن بەچی بنبەستێک وا لەهاتنە دەرەوەیان لەماڵی ئەو ئسیتفزاز کران؟ ئەو ئیستفزازیە چی بوو؟.
عەبدوڵا مەحمود: ئامانج لەسەردانی وەفدی ئێمە بەرگرتن بوو بە شەڕێکی نەخوازراو کە یەکێتی ئامادەسازی و نەخشەی بۆداڕشتبوو،هێزی بۆ کۆکردبۆوە، دەستی دابووە گرتن و ڕاوەدونان و.. تاد. وەفدی حزب پێکهاتبوون لە (عوسمانی حاجی مارف، تاهیر حەسەن، فواد سادق) لەسەرەتای دیداری ئەم وەفدەی حزبدا لەگەڵ نەوشیروان مستەفا، هاوڕێیانی ئیمە دەپرسن کاک نەوشیروان بۆچی ئاو و کارەبای بارەگاکانی حزبتان بڕیوە، نەوشیروان لە وەڵامدا دەڵێت: ئاو و کارەبای خۆمانە و نایدەین بە ئێوە.
پاشان گفتۆگۆکان دەست پێدەکەن و نەوشیراون لەسەرەتادا سەبارەت بە کۆکردنەوەی ئەم ‌هێزە لەدەوری بارەگاکانی حزب بە گشتی و بارەگاکانی ڕابەری بە تایبەتی دەڵێت. ئێوە چونەتە قولەی قاف و حساب بۆ کەس ناکەن، ئێمە بەعسمان ڕوخاندووە ئێوە چین؟ دەمانەوێ بارەگاکانتان ببەنە دەرەوەی شارەکان …هاوڕێیانی حزب لە وەڵامدا دەڵێن بردنە دەرەوەی بارەگای چەکدار و دامالێنی شارەکان لە چەک و دیاردەی چەکداری خواستی ئێمەو داوای ئێمەیە و ئێمە وروژاندومانەو بەرزمان کردۆتەوە، بەڵام بۆچی لە ئێمەوە دەست پێدەکەن کە خاوەنی هێزی چەکدار نین جگە لە ‌هێزی پاریزگاری چەند بارەگایەک، لەوەڵامدا و لە ژێر گوشاری هاوڕێیانی حزبدا کە داوا دەکەن ڕاشکاوانە ڕایبگەیەنن، نەوشیروان بە ڕاشکاوی دەڵێت کەکە گیان ئێمە گوشاری ڕژێمی بەعس و ئیرانمان لەسەرەو لێمان قبوڵ ناکەن ئێوە لێرەبن و دەبێ جوغرافیای ژێر سایەی ئێمە جێبهێڵن… بەم جۆرە نەوشیروان دان دەنێت بەو ڕاستیەدا کە ئەوان خەریکن پلانی ڕژێم و داوای کۆماری کۆنەپەرستی ئیسلامی بە وەکالەت جێبەجێدەکەن.
ئاخر قسەی ئەوە دەبێت کە بارەگاگانمان چۆڵ بکەین و هەنگاوی بەکردەوەش دەست پێبکرێت. هاوڕێیان کە دەزانن ئەوان مەئموریەتی ئێران و ڕژێم جێبەجی دەکەن و سورن لەسەر شەڕخوازی… ئامادەیی دەردەبڕن بۆ گواستنەوەی بارەگاکان بۆ شوێنی تر و داوا دەکەن کە یەکێتیش ‌هیزەکانی بکشێنێتەوە لەدەوری بارەگاکانی حزب و رادیۆ، لەوکاتەدا دەبێت بە تەقەو هاوکات بەرپرسی ئاسایشی گشتی ئەوکاتە دکتۆر خەسرەوخاڵ خۆی دەکات بەماڵی نەوشیروانداو دەڵێت مەفرەزەیەکی حزب تەقەیان لە هێزێکی ئێمە کردووە و برادەرانی ئێمەش ناچار بوون وەڵامیان بدەنەوەو ٤ لە هاوڕێیانی حزب کوژراون، ئەم درۆیە لە کاتیکدا دەکەن کە خەڵکی شوێنی رووداوەکە شاهیدن کە یەکێتی بەر لەوەی سەیارەی حزب بدەنە بەردەم دەستڕێژی گوللە، سەیارەی حەریق، ئیسعاف، سڵنگیان.. ئامادەکردووە، ئەمەش نیشان دەدات کە بەرنامەیەکی بەنەخشەو لە پێشدا داڕێژراو بووە بۆ لێدان لە هاوڕێیانی حزب و بەدوایانەوە بوون و ئەو شوێنەش دیاری کراوە بۆ لێدان چونکە شوێنی گەڕانەوەو هامۆشۆی رۆژانەی هاوڕێیان بوو.
ئیستفزازەکە ئەوە بوو کاتێک هاوڕییان لە ماڵی نەوشیروان دێنە دەرەوە، بە چەكی جۆراو جۆر تەقە ئاراستەی بەرپێی هاوڕێیان دەکەن تا ناچاریان بکەن بشڵەژێن و رابکەن و بچنە ناو بارەگای رابەری حزب کە بەرامبەر ماڵی نەوشیروان مستەفا بوو، کە دەبینن هاوڕێیانی ئێمە بێباکن لەم سیناریۆیە ئەو کاتە تێدەگەن کە ئەم سیناریۆیانە بۆشن.

رزگار رەزا چوچانی: وتت رۆژی دوای کارەساتەکە نوێنەرانی ئێوە دەستبەسەرکران لەکوێ لەلایەن کام دەزگای یەکێتی دەستبەسەرکران؟ ئایا لە کاتی چونی نوێنەرانتان کام بەرپرسی یەکێتیان بینی لەکاتێک ئەوان بۆ کۆبونەوە چوون؟ کێ ئەو بڕیارەی پێوتبوون لە سەرکردەکانی ناو یەکێتی؟.
عەبدوڵا مەحمود: دوای دانیشتن لەگەل نەوشیروان مسەتەفا، رۆژی دواتر لایەن یەکێتیەوە داوا دەکرێت وەفدێکی ڕابەری حزب ئامادەی کۆبونەوەیەک بێت بە مەبەستی دانانی پلان و دیاریکردنی هەنگاوی بەکردەوە بۆ گواستنەوەی بارەگاکانی حزب و وردەکاریەکانی، حزب وەفدێک کە پێکهاتبوون لە” تاهیر حەسەن، سامان کەریم، فوئاد سادق” رادەسپێری بۆ گفتوگۆ لەگەڵ یەکیتی. شوێنی کۆبونەوەکە ئاسایشی گشتی دەبێ.
سەرەتا بەرپرسی ئاسایشی گشتی یەکێتی سەیفەدین لەگەڵیان دادەنیشێت، دوای نیو سەعاتیک لە دانیشتنەکە هاوڕێیان گوێ بیستی میلهێنانەوە دەبن لە حەوشەی ئاسایش. ئاسایشەکان هەوڵدەدەن پاسەوانەکانی وەفدی رابەری حزب چەک بکەن و دەبێت بە کێشمەکێش، هاوڕێیانی ئێمە مل نادەن و تا پێیان ڕادەگەیەنن کە چەکەکانتان دانەنێن ئەوا ڕابەری حزب دەگرین و… بەمە هاوڕێیان ناچار دەبن چەکەکانیان دابنێن.
وەفدی رابەری حزب بەوەی کە کەس لێیان ناپرسێت و هەراو دەنگە دەنگ دەبیستن تێدەگەن کە ئەمەش پلانێکە لە دژیان، بە سەیفەدین دەڵێن چییە ئێمە دەست بەسەرین؟ لە وەڵامدا دەڵێت نا شتی وانییەو کە دەڵێت وانییە، هاوڕێیانی ئیمە دەڵین دەی باشە ئێمە دەرۆین، لە وەڵامدا دەڵیت نابێ و ئێوە میوانی ئێمەن و تا دواتر بەسەراحەت پێیان دەڵین کە ئێوە دەست بەسەرن و تا بەڵێنی چوڵکردنی بارەگاکانی حزب لە ماوەی سێ ڕۆژدا نەدەن، لێرە دەبن پاش کێشمەکێشیکی زۆر بە ئامادەیی مستەفای سەید قادرو محەمەد حسین و سەیفەدین ولەسەر هەفتەیەک دەیبڕێننەوە بۆ گواستنەوەی بارەگاکانی حزب و چۆڵکردنی جوغرافیای سەوزی یەکێتی. هاوڕێیانی ئێمە لە سەعات ١٠ بەیانییەوە تا ١٠ شەو لە ئاسایش دەهێڵنەوە. ئەمەش داهێنانێکی نوێی یەکێتی بوو کە وەفد دەست بەسەر بکەن، لە کاتێکدا هەرگیز بەعس بەو هەموو دڕندەیی و خوێن ڕێژیەی بۆ یەکجاریش وەفدی یەکێتی یان پارتی کە بۆ مفاوەزات دەچون دەستبەسەر نەکردووە.
ماوەتەوە بڵێم تەنانەت لەو مۆڵەتی هەفتەیەشدا ڕاستگۆ نەبوون و هەموو بارەگاکانی حزب  رادیۆ و رێکخراوەی سەربەخۆی ئافرەتان و سەنتەری پارێزگاری ژنان و سەنتەری مناڵان و…. هەموویانیان بەزۆر چەک و هێزی میلیشیایی داخست و بە سەدان کادر و ئەندام و دۆستی حزبیان زیندانی کردو ‌هێندە قارەمان بوون! ژنی سەروتەمەن ٦٠ ساڵ و مناڵی ٨ ساڵەشیان دەستگیر کرد. لەوکاتەوە بەدواوە هەموو چالاکی و هەلسوڕانێکی یاسایی حزب یاساغ کراوە لەسەر کەمترین جموجۆڵی سیاسی هاورێیانمان توشی زیندانی و شکنجەو راوەدونان بونەتەوە، هەموو بڵنگۆکان، هەموو هۆڵ و قاعەکانی سمینار گێران، هەموو مەودایەک بۆ هەڵسوڕان کە لەژێر دەستی یەکێتی و هاوکات پارتیدا بووە لەحزب قاچاغ کراون.
زوربەی زۆری جێبەجێکەرانی ئەم پیڵانە چەپەڵە ئێستا دەڵێن دەیگۆڕین! و بانگەشەی ئازادی و عەدالەت و شەفافیەت و…دەکەن.

رزگار رەزا چوچانی: وەک سەرەتا لەپرسیارێک وتمان ئێستاش بەشێوەیەکی تر بڵێینەوە ئایا جێهێشتنی وڵات لەلایەن سەرکردایەتیەکەیەوە، خۆدزینەوە نەبوو لەبەرپرسیارەتی بەرانبەر کادرو هەڵسوڕاوانتان لەکوردستان ئەوانەی کە نەیاندەتوانی وڵات جێبهێڵن؟.
عەبدوڵا مەحمود: سەبارەت بە ڕۆشتنی هاوڕێیانی حزب بۆ دەرەوەی وڵات پێویست دەکات لە چوارچێوەی دۆخی ئەوکاتەدا بۆی بڕوانرێت، ئەوکاتە کۆچی بە لێشاوی لاوان و خەڵکی کوردستان بۆ دەرەوەی وڵات، دیاردەیەکی زۆر بەرچاو بوو، لە چواچێوەیەدا هاوڕێیانی ئێمەش لەو حاڵەتە بەدەر نەبوون، هەروەها دۆخی سەرکوتی یەکێتی لەسەر هاوڕێیانمان و ڕێگریەکانی پارتیش لەهەولێر بۆ هەڵسوڕانمان، دۆخێکی نەفسی ناخۆشی بۆ زۆرێک لە هاوڕێیانمان دروست کردبوو، ئەمە دوو هۆکاری سەرەکی بوون بۆ رۆشتنی ژمارەیەکی بەرچاو لە کادرو ئەندامەکانی حزب  بۆ دەرەوەی وڵات، دیارە لەناو ئەو شەپۆلی رۆشتنەدا ژمارەیەک لە هاوڕێیانی ڕابەریش رۆشتن، بەڵام بەشێکی بەرچاویش لە کادرانی رابەری و لە کوردستان مانەوە، بۆیە من هیچ ڕاکردنێک لە بەرپرسیارێتی نابینم، بەڵام دەکرا ئەمەش بەم شێوە بەرچاوە ڕونەدات، بەگشتی ئەم رۆشتنە لەگەڵ ئەوەدا بڕیاری شەخسی کادرو ئەندامان خۆیان بوو، بەڵام بۆشایەکی بەرچاوی لە چاڵاکی و هەڵسوڕانی حزبدا، پێکهێنا.

رزگار رەزا چوچانی: بەڵام ئەگەر هەرەشە لەسەر سەرکردەکانی کۆمۆنیست هەبوبێ، خۆ ناکرێ بڵێین هەڕەشە لەسەر کادرەکانی ناوەندیان نەبووە؟ یان ناکرێ بڵێین کۆمۆنیست تەنها ئەو کادرانەبوون کە چونە دەرەوە، ئەی ئەو کادیرانەی تر بۆ مانەوە چۆن
خۆیان پاراست لەهەڕەشە؟ جارێکی تر ئەپرسم جێهێشتنی ئەو کادیرانەو قاعیدەی حزبەکەتان ناو دەنێی چی؟.
عەبدوڵا مەحمود: هەڕەشە لەسەر هەموو ئەندام و کادرانی حزب هەبوو، بەڵام دیارە بە پلەی یەکەم گوشارەکان لەسەر کادرانی ڕابەری حزب بوون، بەڵام کادرانی رابەری حزب کە کوردستانیان جێهێشت لە پەنجەکانی دەستێک زیاتر نەبوون و ژمارەیەکی زۆر لە هاوڕێیانی حزب لە کادرو ئەندامانی حزب، سەرباری گوشارەکان، رێگریەکان، زیندانی رۆژانەی هەڵسوڕاون، بەڵام درێژەیان بە هەڵسوران و چالاکیەکانی حزبدا و دەنگی ئازادیخوازی و کۆمۆنیزمی کریکاریییان لە کۆمەڵگادا بەرز ڕاگرت، دیارە وەکو پێشتریش وتم لەهەموو حاڵەتێکدا، ئەم ڕۆشتنە بەو ئاستەی روویدا، لەگەڵ ئەوەدا دڵخوازی حزب نەبوو، وە بڕیاری حزب نەبوو، بەڵام تەسمیمێکی دروست نەبوو، چونکە سەرباری گوشارەکان و ئەم دۆخە ناخۆشەش کە بۆ هەڵسوارنی حزب پێک هاتبوو، بەڵام مەودای کاری حزبی و هەلسوڕان، تاڕادەیەک مابوو، هەموو ئەو هاوڕێیانەی کوردستانیان جێهێشت، بە مانەوەیان لە کوردستان و لەپاڵ هاوڕێیانی کوردستاندا، دەیتوانی زووترو زیاتر کۆسپەکان، رێگرییەکان، ڕابماڵێ و حزب بە قەدو قیافەو ئامادەیەکی زیاترەوە لە مەیدانەکەدا، دەوری گێڕابا.

رزگار رەزا چوچانی: کە بەیەکجاری کوردستانتان بەرەو تاراوگە بەجێهێشت، چۆن دەکرێ لەوێوە سەرپەرشتی کاری رێکخستن بکەن؟.
عەبدوڵا مەحمود: وەکو پێشتریش وتم، ئێمە بەیەکجاری کوردستانمان جێنەهێشت، هەروەها دەوریەکی زۆر کورتی چەند مانگە نەبێت کە حزب لە ڕێگای هەیئەتیكی تەنفیزیەوە لە تورکیاوە کاروباری حزبی دەبرد بەڕێوە، باقی کاتەکەی تر، هەموو کاروباری حزب و بەرێوەبردنی حزب لە سەڵاحیەتی هاوڕێیانی داخلی حزبدا بوو.

رزگار رەزا چوچانی: ئەی دوای ئەوەش کە نەوشیروان مستەفا بەو شێوەی کادران و نوێنەرانی ئێوەی بەڕێکرد، چی وایکرد لەسەر یەک سفرەی سیاسی کۆبنەوە جارێکی تر؟. مەبەست تەعامولی سیاسیانە لەگەڵ خۆپیشاندانەکان؟، کە هەردوولا لەیەک ئەنجومەن نوێنەرتان هەبوو کەپێی دەوترا ئەنجومەنی کاتی مەیدانی ئازادی.
عەبدوڵا مەحمود: ئەو خۆپیشاندان و نارەزایەتیانەی کوردستان، دەستکردی نەوشیراون یان ئەوەی کە پێێ دەوترێت ئۆپۆزیسیۆن نییە، بەڵکە بەرهەمی دوخێکی نەخوازاوە کە دەسەڵات لەکوردستاندا ٢٠ ساڵە، درێژەی پێدەدات و زاڵیکردووە. ٢٠ ساڵە یەکێتی و پارتی لە کوردستاندا دەسەڵاتیان بەدەستە، لە ژێر سایەی ئەم دەسەڵاتەدا، قڵشتێکی چینایەتی گەورە پێکهاتووە، کەمایەتیەکی حزبی و سەرمایەدار ژیانیكی شاهانەیان بۆ خۆیان و دەورو بەریان پێكهێناوەو زوربەی زۆری کۆمەڵگاش، تائیستا موحتاجی ئاو و کارەبا و خزمەتگوزاریەکانن، وە رۆژ بەڕۆژ هەژارتر و برسی تر دەبن، کرێی کریكاران بەشی بەرێوەچونی ژیانیان ناکات و ئەگەر رۆژێک کاریان نەبێت، بەیانیەکەی خۆیان و خیزانەکانیان، برسی دەمێنەوە، ئۆردوی بیكاران فراوانتر دەبێت، رۆژانە لاوان بە خێڵی بێکارانەوە پەیوەست دەبن، خواستەکانیان خنکێنراوە، جەنگی پیاو سالاری و دەسەڵات لە دژی ژنان بۆ ساتیک چییە وچان نادات، رێژەی قەسابی کردنی ژنان و ئاماری ناچارکردنی ژنان بۆ خۆسوتاندن، روو لەهەڵکشانە، پەرلەمان! یاسایی فرە ژنی پەسەند دەکات، ئازادی سیاسی و ئازادی رۆژنامەگەری، لە ژێر هەڕەشەدایە..تاد. ئەم دۆخە رۆژ بەرۆژ تورەیی خەڵکی زیادکردووە متمانەی بەدەسەڵات نەماوە.
بەدیاریکراویش لە دوای کەوتنی بەعسەوە، چەکی ئەوەی کە بەعس لەسەر سنورەکانەو هەرەشەیە لەسەر کوردستان، نەما و دۆخێکی تایبەتی هێنایە ئاراوە، کە خەڵکی کوردستان بە متمانە بونێکی زیاترەوە بێنە مەیدان و ناڕەزایەتی دەرببڕن، وە بڕوا بەوەی کە خۆیان دەتوانن ئاڵوگۆر پێکبهێنن، زیاتر بوو. میدیا بە فراوانییەکی زیاترەوە مەیدانداری کرد، تەنانەت بنبەستی حزبەکانی دەسەڵات لە تێگەیشتنی دروست بۆ ئەو دۆخەو نەتوانینی وەڵامدانەوەیان بەم ڕوداوانە بووە سەرچاوی لێکترازان، جیابونەوەی بەشێکی زۆری سەرکردایەتی یەکێتی لە یەکێتی و کادران و پاشان لەتبوونی جەماوەرەکەی، کە دواتر بوو بە گۆڕان بەرهەمی ئەم دۆخە بوو.
خۆپیشاندانەکانی ساڵانی٢٠٠٥،٢٠٠٦، کە زۆرێك لە شارەکانی کوردستانی گرتەوە لە کەلارەوە بۆ رانیە، لە سلێمانیەوە بۆ ئاکرێ، تادەگات بە هەڵەبجە سوتاندنی مۆنیمێنتی هەڵەبجە، کاتیک بوون کە زۆریك لە بەرپرسەکانی ئێستای گۆران قارەمانانە لە دژی خەڵکی خۆپێشاندەر بوون و لە ناوچەی سەوزدا زۆرترین بەرپرسیارێتان هەبوو، وە ئەوکاتە گۆڕانێک بوونی نەبوو.
خۆپیشاندانەکانی ئەم دوایەی کوردستان درێژەی هەمان نارەزایەتی نەپساوەی نارەزایەتی و خۆپیشاندانەکانی ساڵانی رابردووەو، شۆرش و ڕاپەرینەکانی وڵاتانی دنیای عەرەب، تەکانیكی تردییدا بە خەڵکی کوردستان و کەشێکی شۆرشگێڕانەی هێنایە ئاراو جەسارەتی دا بەخەڵکی کوردستان ئەمجارە بەدەنگێکی بەرزتر و بەورەیەکی زیاترەوە، بێنە مەیدان و خۆپیشاندان و کۆبونەوەکانیان بکەن.
بۆیە ئەم خۆپیشاندانانە دەسکردی ئۆپۆزیسیۆن نین، یەکەمین لایەن کە خۆپیشاندانی خەڵکی بە ئاژاوەگێرو دەستی دەرەکی تاوانبار کردو ئامادەیی نیشاندا بۆ هاوکاری دەزگا ئەمنیەکان! بزوتنەوەی گۆڕان بوو. بەڵام بۆ خۆبەستنەوە بەم بزوتنەوەیە دواتر پێوەی پەیوەست بوون بێ ئەوەی بە ناوی بزوتنەوەی گۆڕانەوە هێچ پشتیوانیەکی رەسمی ڕابگەیەنن. پاشانیش هەموو حزب و لایەنە سیاسیەکانی نەیاری دەسەڵات هەوڵیان دەدا کە مۆری خۆیان بدەن لەو بزوتنەوەیە و بەشدار بوون تیایدا.
ئەنجومەنی مەیدانی ئازادیەکان، هەموو لایەنە نەیارەکانی دەسەڵاتی تیا بوو، لەگەڵ کەسانی بێلایەندا، بەڵام هیج ریكەوتنێکی پێش وەخت نەبوو، وە کەس بەناوی حزبی خۆیەوە، لەو ئەنجومەنەدا نەبوون و کەسیش لەوێ پلاتفۆرمی حزبی نەهێنابوو، وە دەنگی نارەزایەتی و داواکاری گۆرانکاری و دروشمەکانی ئازادی و بەرابەری و خواستی لاوان و کە خواستی ئێمەش بوو مەبنای ئامادەیی بەرچاومان بوو لە سەراکان و ناو ئەنجومەنەکان، نە هیچ شتێکی تر، وە ئەم بزوتنەوەیە موڵکی هیچ کەس و لایەنێکی دیاریکراو نەبوو، وە بەشداری ئیمە و هەوڵەکانی دەوری بوو لەوەی کە بەرچاو ڕۆشنی بدات بەبزوتنەوەکە و هاوکات ڕێگە بگریت لەوەی لایەنێک یان گروپیک بەلارێیدا ببەن، وە هەموو هەوڵی ئێمە ئەوە بوو ڕێگە بگرین لەوە ئاسۆی بزوتنەوەی ناسیونالیستی و باڵەکانی ئەم بزوتنەوەیە بکەنە مەبنای سات و سەودا و بەلاڕییدا ببەن.
وە ئێمە هیچ ڕیکەوتنیكمان لەگەڵ ئەو لایەنانە نەبوو کە لە ئەنجومەنەکاندا بوون، خواستەکانی خۆپیشاندەران و خەڵکی کوردستان بۆ ئێمە مەبنای ئامادەییمان بوو، دیارە لەناو هەموو بزوتنەوەیەکی جەماوەریدا، هەوڵی لایەنی سیاسی هەیە تەقلیدی خۆی زاڵ بکات و وە هەڵەو کەم کورتی دەبێت، گرنگ ئەوەیە هیزو لایەنی سیاسی پێشکەوتنخواز دەستەمۆی کۆنەپەرستی، نەبێت و سازش لەسەر خواستەکانی خەڵکی ناڕازی نەکات، ئێمە لەناو ئەو بزوتنەوە شۆڕشگێڕیەدا، بەرچاو ڕۆشن و بە دروشمی خۆمانەوە ئامادە بووین. ئامادەیی ئێمە بەکردەوە جێگای نارەحەتی زۆریەک لە لایەنەکانی ئۆپۆزیسیۆن بوو، کاتیك وتاربێژانی ئێمە وتەیان پێشکەش دەکرد، مایکی تەلەفزیۆنەکانیان لادەبرد، تا دەنگی ئێمە، ئامادەیی ئێمە بشارنەوە.

رزگار رەزا چوچانی: کامە نمونەتان لایە کادرێکی ئێوە قسەی کردبێت و مایکی تیڤی لابرا بێت لەبەردەمی؟ ئەی ئەوە ناو دەنێی چی لەکاتێک ئەوان رەخنەیان لەوە دەگرت دەسەڵات رێگای ئازادی بیروڕا نادات؟.
عەبدوڵا مەحمود: هەریەک لە هاوڕێیان نەوزاد بابان، تاهیر حەسەن، وەستا حسێن، وەستا سالار… ڕۆژانە لەسەرای سلێمانی کاتیک قسەوباسیان دەکرد، لە لایەن بزوتنەوەی گۆڕان و لایەنەکانی تری ئۆپۆزیسۆن مایکەکان لادەبرا بۆ ئەوەی روخسارو سیمای کۆمۆنیزم و ئازدیخوازی لە چاوی کۆمەڵگا و ڕای گشتی بشارنەوە. سەبارەت بە ڕەخنەی ئەم لایەنانە کە لەدەسەڵاتیان دەگرت، کە ڕێگای ئازادی بیروڕا نادات، دەبێ سەرەتا پێ لەسەر ئەوراستیە دابگرین، کە هەموو ئەم لایەنانە مزادەی سیاسی بەسەر خەڵکی کوردستان و ئازادییەوە دەکەن، کام لەم لایەنانە هەیە کێوێک لە سەرکوتی سیاسی نەبێت، لە تەمەنی ٣٦ ساڵەی یەکێتیدا، زیاتر لە ٣٣ ساڵ زۆریک لە سەرانی بڕیاربەدەستی ئیستای بزوتنەوەی گۆڕان بەشدارن لە کارنامەی یەکێتی و ئەو هەموو پیشێلکاریانەی دەرهەق بە ئازادی سیاسی و ئازادی بیروباوەر… کراون. ئەم بزوتنەوەیە کە سوکانەکەی بەدەستی یەكێتییە کۆنەکانە، لە دامێنی یەکێتی جیابونەتەوەو سەرنجدانێکی سادەش بە کەناڵەکەیاندا نیشان دەدات کە بۆچونی جیاواز، بیروباوەری جیاواز لەم کەناڵەدا رێگە لێگێراوە، ئەمە لە کاتێکدایە هێشتا دەسەڵات نیین، ئیسلامیەکانیش پێویستی بە نموونە هێنانەوە نییە، خودی ئیسلام زادەی نەزانی ئینسان و چەکی سەرکوتی ئازادییە و قودرەتی ئیلاهی! سەروەرو بڕیاردەرە نەک ئینسان و ئیرادەی ئینسان. بۆیە باسی ئازادی بیرورا، بۆ هەرکام لەم لایەنانە، بە ئەندازەی هاتوهاورای یەکێتی و پارتی سەبارەت بە ئازادی، ڕاستی لە بانگەشەکانیاندا هەیە.

رزگار رەزا چوچانی: حزبی کۆمۆنیست لەکاتێک دەست بەکار دەبێتەوە کە باس لە هاوپەیمانی چەپ دەکرێت جارو بار، پێت وایە کۆمۆنیستیش بچێتە ناو ئەو هەوڵانەوە؟.
عەبدوڵا مەحمود: سەرەتا دەبێ بڵیم دەست بەکاربوونەوەیەک لە ئارادا نییە، چونکە حزبی ئێمە هەمیشە ئامادەیی بووە و لە کاروچالاکی خۆی نەوەستاوە، تا دەستپێبکاتەوە. بەڵام ئەم دەورەیە و ئەم دۆخەی هاتە پێشەوە، بەو ئەندازەی لە قازانجی خەڵکە، بەو ئەندازەیەش دۆخێکی باشتری بۆ هەڵسورانی ئێمە هێنایە ئاراوەو بواری زیاتری بۆمان کردەوە، تا هەڵسورانی خۆمان لە ئاستێکی فراونتردا، نیشان بدین.
تا ئەو جێگایەی باسی چەپ و هاوپەیمانیەتی چەپ دەکرێت، دەبێ بپرسین چەپ چییە؟ بە چ بزوتنەوەوهێزیک دەوترێت چەپ؟  ناکرێت هەر حزب و لایەنێکی سیاسی وتی من مارکسیم، سوسیال-دیموکراسیم، کۆمۆنیستم، بەلشەفیم، یان وشەی کرێکار، چەوساوە، ناوی بوو یان بەناوەکەیەوە لکا، بە چەپ پیناسە بکریت. ئەگەر دەورانی بوونی بلۆک بەندیەکانی دنیا، ماویەکان، ترۆسکیەکان، کۆمۆنیزمی ئەوروپایی، لق باڵی جۆراوجۆری تر لە پاڵ سەرکەوتنی شۆرشی ئۆکتۆبەردا، یان لەژیر کاریگەری ئەودا بەهەموویان دەوترا چەپ، لەگەڵ کۆتایی هاتنی ئەم بلۆک بەندیەدا ئەم پێناسەیەش مانای خۆی لەدەست داوە.
چەپ لە راونگەی میتۆدی مارکس و کۆمۆنیزمی کریكارییەوە بە حزب و هێزیک دەوترێت، کە دژی سەرتاپای نیزامی سەرمایەداریەو بۆ هەڵوەشاندنەوەی خاوەندارێتی تایبەتی بەسەر هۆیەکانی بەرهەم هێناندا، تیدەکۆشێت و کۆماری سۆسیالیستی و کۆمەڵگای بێچینی کۆمەنیستی ئامانجیەتی و لە ڕێگای بەسەرئەنجام گەیاندنی شۆڕشی کۆمەڵایەتی چینی کرێکاردا.
بەم پیناسە سادەو کورتەوە، مەبەستت لەکام چەپە؟ حزبی شیوعی، زەحمەتکێشانەکان و حزبی سۆسیالستی دیموکراتی کوردستان؟ پارتی کارو پارتی چارەسەر…تاد، ئەمانە فڕیان بەسەر مارکسییەوە نییە و بە حەجمی خۆیان حزبی و هێزو نوێنەری بۆرژوازی کوردو سەرمایەدارانی کوردستانن، بۆیە هیچ هاوپەیمانیەتیەک بۆ ئێمە لەگەڵ ئەمانە لە ئارادانییە. هەرگیز ناچینە هیچ هاوپەیمانیەتیەک لەگەڵ ئەم جۆرە حزب و لایەنانە، بەڵام کاری هاوبەش لەسەر مەسەلەیەک، پرسێک….مەنفی نییە لەگەڵیان.

رزگار رەزا چوچانی: ئەی بونی ئەو پارتە چەپانەی کە ئێستا هەن تاچەند کاریگەری لەسەر چالاکبون و فرەوانبونی زیاتری پارتی کۆمۆنیست دەبێت دوای دەست بەکار بونەوەی؟ پێت وایە ئەوان توانیبێتیان فەراغی مەیدانی نەبونی کۆمۆنیستیان پڕکردبێتەوە لەو ماوەدا؟ یان فەراغێکیان بۆ چالاکبونەوەی کۆمۆنیست هێشتبێتەوە؟.
عەبدوڵا مەحمود: بوون و نەبوونی ئەم حزب و لایەنە بەناو چەپانە، هیچ کاریگەرییەکی لەسەر چالاکی و هەڵسوڕانی ئێمە نییە، وە ئەمانە هەرگیز ناتوانن جێگەی حزب و لایەنێکی، مارکسی و کۆمۆنیست بگرنەوە. ئەمانە باڵ و لقی، بزوتنەوەت بۆرژوا- ناسیونالیستی کوردن و فڕیان بە بزوتنەوەی کۆمۆنیستی و مارکسەتەوە نییە.
کۆمۆنیزمی کرێکاری بەتایبەتیش حزبی ئەم بزوتنەوەیە، بەشیک و تەنها بەشێکە لە بزوتنەوەیەکی گەورەتری کۆمەڵایەتی، کە لە کۆمەڵگادا لە دژی نیزامی چەوسێنەری سەرمایەداری لە خەباتێکی نەپساوە دایە.

بیۆگرافیا
عبدالله‌ مه‌حمود
*له‌ شاری قه‌ڵادزێ له‌دایك بووه‌.
*له‌ سه‌ره‌تای ساڵانی 80 و تێكه‌ڵاوی كاری سیاسی بووه‌، وپه‌یوه‌ندی كردووه‌ به‌ كۆمه‌ڵه‌ی ڕه‌نجده‌رانی كوردستانه‌وه‌.
*به‌شداری به‌رچاوی بووه‌ له‌خۆپیشاندانی ساڵی 1982 قه‌ڵادزێ به‌بۆنه‌ی 18مین ساڵیادی بوردومانی ئه‌وشاره‌وه‌، یه‌كێك بووه‌ له‌ده‌ستگیركراوه‌كانی ئه‌و خۆپیشاندانه‌. ئه‌م خۆپیشاندانه‌ دوایی زوربه‌ی زۆری كوردستانی گرته‌وه‌.
*له‌ 1985به‌دواوه‌ تێكه‌ڵ به‌كاری ڕێكخراوه‌ چه‌پ و كۆمۆنیستیه‌كان ده‌بێت.
*له‌ ساڵی 1991 یه‌كێك بووه‌ له‌هه‌ڵسوڕاوانی بزوتنه‌وه‌ی شورایی شاری سلێمانی، یه‌كێك بووه‌ له‌دامه‌زرێنه‌رانی شوراكان. له‌لایه‌ن نوێنه‌رانی شوراكانه‌وه‌ هه‌ڵبژێردراوه‌ بۆ وه‌ڕێخستنی بزوتنه‌وه‌ی به‌گری له‌كوردستان له‌به‌رامبه‌ر گه‌ڕانه‌وه‌ی ڕژێمی به‌عسدا بۆ كوردستان.
*له‌ ساڵی 1992 وه‌ په‌یوه‌ندی كردووه‌ به‌ ڕێكخراوی یه‌كێتی خه‌باتی كۆمۆنیزمی كرێكاریه‌وه‌. كه‌یه‌كێك بوو له‌ ڕێكخراوه‌ چه‌په‌كانی ئه‌وكاته‌.
*یه‌كێك بووه‌ له‌ كادرانی دامه‌زێنه‌ری حزبی كۆمۆنیستی كرێكاریی عێراق و له‌یه‌كه‌م كۆنگره‌ی ئه‌و حزبه‌وه‌ تا 2008 ئه‌ندامی ڕابه‌رایه‌تی ئه‌و حزبه‌ بووه‌.
*یه‌كێك له‌ پێكهێنه‌رانی حزبی كۆمۆنیستی كریكاریی كوردستان بووه‌ كه‌ له‌ 15 مارسی 2008 ڕاگه‌یه‌نرا. ئێستاش یه‌كێكه‌ له‌ڕابه‌رانی ئه‌م حزبه‌.
*به‌جیا له‌كاری سیاسی وحزبی و سازدانی ده‌یان سیمینار له‌شاره‌كانی كوردستان، وتارو بابه‌ت له‌ زوربه‌ی ڕۆژنامه‌و گۆڤاره‌كانی كوردستاندا بڵاوده‌كاته‌وه‌.
تێبینی ئەم دیمانە لە گۆڤاری سڤیل چاپکراوە