ســه‌وڵ …. سیروان ناشاد
چۆن ده‌توانین ماراسا به‌سه‌ر رایه‌خی دڕكه‌زییا بخزێینه نێو پێچه‌كانه‌وه كه‌شه‌ڵاڵی برینانین
به‌م قیبله‌نوما ژه‌نگاوییه‌وه چۆن له‌تاریكستانی ئه‌م ده‌ڤه‌ره هه‌ڵچووه رێ ده‌ركه‌ین
به‌م جه‌سته سوتاوه‌وه رۆژ چۆن ده‌كرێته‌وه
سواخم ده
تاقه‌تی بینینی ئه‌م هه‌موو درزه‌ت نییه له‌تریقه‌ی بێوه‌ژنان ده‌چێ
دامپۆشه ئه‌م له‌رزینه‌م زگماكییه
به‌نێو پێكوڵه‌و قالۆراندا (*)
ئه‌م پێیه شه‌قاره له سه‌ره‌نده‌كه‌ی گه‌رمێن ده‌چێ
نه‌نكم له‌سه‌ر چیخه‌كه‌دا جێی هێشت و چوو
له‌ژوورێكی دوای كپ بوونی غه‌ریزه‌كان ده‌چین
كفت و كه‌مجووڵه‌و كه‌وتوو
وه‌ك لاسكێكی مه‌ینه‌تبار به‌شنه‌یه‌ك ده‌شكێین
تۆپه به‌فرینه‌كانی وه‌همین به‌سه‌رخۆدا داده‌چۆڕێین
خۆڵه‌كه‌وه‌ی ده‌م ره‌شه‌بای قه‌ده‌رێكی لێڵین
پێكراوی نێو ته‌مێكی رێ ونكه‌رو هه‌ر به‌ئاسته‌م واده‌جوڵێین
بێئومێدی ئه‌و ده‌نكه په‌رسیله وه‌ریوانه‌ین
له‌چاوه‌ڕوانیی خۆره‌تاوێكدا ببنه ترێ
ساچۆن لێوی سارایه‌كی سه‌راباوی ئاودێر بكرێ‌‌و
به‌ماچێكی شێدار دڵی زه‌وی ئاشت كه‌ینه‌وه؟!
به‌م قرچه‌ی سوتانه ئه‌سه‌ف كه‌ناتوانین
كۆلاره‌كان به‌په‌تی خۆشنوودی هه‌ڵده‌ینه‌وه!
ئه‌ی پاشماوه‌ی مه‌رگه‌ساته‌كان
روو وه‌رگێڕه فریای بۆ كڕوزی نێڵه‌كانم ناكه‌وی
سیغاره ژه‌نگاویه‌كه‌ی رۆژگارم
سووتوی جغاره عاره‌بییه‌كه‌ی باپیره‌م
هاوڕێكانیش له‌بیابانێكی لماویدا جێیان هێشتین
ئیدی له‌م لمگه‌یه‌دا قیبله نوماكان كوێمان ده‌به‌ن؟!
جووته پۆڕێكی نابه‌ڵه‌د به‌یاسای قورسی راوچی
جووته ماسییه‌كی كه‌م ئه‌زموون به‌رده‌م تۆڕی خیانه‌ت
دووباڵنده‌ی په‌ڕ وه‌ریو له‌په‌رێزی داودا
دوو سوێسكه‌ی تازه جوقاو له‌نیشتمانی ته‌پكه‌دا
ته‌نها دووبزه‌ی مانگه شه‌و بێئاگا له‌ته‌می ڕێ….
چه‌تره‌كان داخه‌ن بارانێ درزه‌كان ته‌ڕكا
دڵۆپێ له‌گوناهانمان بچۆڕێ
ته‌عاروفێك له‌گه‌ڵا راهیبه‌یه‌كدا بكه‌ین
پیاسه‌یه‌ك له‌گه‌ڵا جۆگه‌له‌یه‌كی سه‌ره‌ڕۆ
هه‌نسكێك له‌كن كانییه‌ك هه‌ڵڕێژین
سه‌رگوزشته‌ی به‌ردێك هه‌ڵكۆڵین‌و
په‌شیمانیی تاوانێك بنێژین
چه‌تره‌كان داخه‌ن
هود هوده‌كان په‌یامێكیان نه‌دا
كه‌سوله‌یمانه‌كان به‌سه‌ر گۆچانه‌كاندا نوشتانه‌وه
ئامێزت مه‌كه‌وه فریشته به‌ڕوی ئه‌م كوناهانه‌دا
خۆت مه‌ده ده‌س سه‌وڵه‌كانی ئه‌م كه‌شتێوانه غه‌واره‌یه‌و بێڕه‌حمه‌دا
په‌موی ژانه‌كانت مه‌سوه له‌دڵڕه‌قی چقڵه‌كانم
ئێی به‌سته‌زمان
وه‌تده‌زانی په‌رسیله‌ی كامه‌رانی ده‌چنی
هێشوه‌كانیش بۆنی خه‌رده‌لی خیانه‌تیان گرتبوو
كه‌وه‌كان له‌ژێر تارای دێوه‌جامه‌كاندا بانگی خیانه‌تیان ده‌دا
گۆمه‌كانی ئاسووده‌ییش قوڵا قوڵا كه‌فی خیانه‌تیان ده‌كرد
كه‌نیشكه‌كان له‌پاڵا كوڕه ده‌س زبره‌كانه‌وه
موماره‌سه‌یان له‌گه‌ڵا ره‌شه‌بادا ده‌كرد
خیانه‌تكار خۆمان
ته‌زویه‌كمان وه‌له‌شدا نه‌هات له‌پاككردنی لاله‌نگی نیشتماندا
به‌سوێره‌شكی عیشق غوسڵێكمان ده‌رنه‌كرد
له‌باسكه مه‌له‌ی ژیاندا
نوێژێكمان دانه‌به‌ست له‌ته‌قسی حوجره‌ی سوتاندا
حاڵی نه‌بووین چ كه‌یفێكه شین‌و ئه‌وین له‌شه‌واندا …!
خودایه
تازه دڵی چۆله‌كه‌یه‌كمان پێ ئاشت ناكرێته‌وه
به‌لێواری گوێسه‌بانه‌كه‌وه بووبه چلووره
ئیدی فرمێسكی ئه‌ومناڵه لێمان خۆش نابێ
بێ گوناه له‌ڕه‌حمی زه‌مه‌ندا مه‌یی
نوزه‌ی ئه‌و مێرووله‌یه نابڕێته‌وه به‌گه‌وره‌یی پێمان لێنا
شه‌وكوێر بووین له‌هاوه‌ڵی (یوسف)وگورگان خوارد چووین
خودایه
چ حیكمه‌تێكه ئه‌م بوونه
چ سڕێكه ئه‌م گه‌ردوونه
واین به‌لوتكه‌ی ئۆرگازمی ته‌نهایی
به‌چڵه‌پۆپه‌ی ژانه‌وه
كۆتایی چ مه‌رگه‌ساتێكمان به‌شبوو
(كڵاشه‌كانمان دڕاو چمان پێنه‌بڕا)
ژیان: كناچه‌یه‌كی چاو قه‌رسیلی بوو ئیغتصاب كرا
نیشتمان: حه‌رفێك بوو نه‌خوێنرایه‌وه
عیشق: نوشته‌یه‌ك بوو به‌تاڵكرا
زینده‌گی له‌حیكایه‌ته‌كانی نه‌نكم ده‌چوو نیوه شه‌وان
له‌گه‌ڵا نه‌رمه (با) یه‌كی ڕچیو به‌نێو لچی خشته قوڕینه‌كانه‌وه ده‌هاته ژوور
هه‌رده‌ڕۆیشتین و، نه‌ده‌گه‌یشتین
جاچۆن كچی پاشای به‌خته‌وه‌ری ماره‌بكه‌ین ؟
هێی به‌سته‌زمان
هێشتا نه‌مانزانیوه سه‌رابه ڕێی ئه‌م غوربه‌ته نامانگه‌ێنێته هیچ
له‌نزای چه‌پڵه‌كانیش نه‌گه‌یشتین
ئومێدی گوڵه دالیاكان به‌هه‌ڵه‌تی هه‌ڵدێریا بردین
كڵاشه‌كانمان دڕاو چمان پێنه‌بڕا
وه‌ره هاوڕێ له‌ژێر ئه‌م (بی)یه ره‌زا قورسه‌دا
دیژله‌مه‌یه‌كی كامه‌رانی فڕكه‌ین
كامه‌رانی له‌نوكته‌ئیكسپایه‌ره‌كانی ژیان ده‌چێ
وه‌ره له‌زه‌ماوه‌ندی بوكێنی نیشتماندا سه‌رچۆپی كێش به
شاتووه‌كانی فیراق لێره به‌ر ده‌گرن
دره‌خته‌كانی موعانات هه‌میشه سه‌وز
ئێره وێسگه‌ی كاڵبوونه‌وه‌یه
وه‌ره ماڵێ له‌نێو قامیشه‌ڵانی په‌نجه‌كانما چێكه
ببه نه‌رمه (با) یه‌كی ته‌زیو خۆڵه‌مێشی ئه‌م روحه‌م بڕه‌قسێنه …
ورد بنواڕه
له‌هه‌ر كوێیه‌ك ساوایه‌كی پێخواست دی بۆم بگه‌ڕێ
له‌كام ڕه‌زا به‌ر چنه‌یه‌ك ژانی یاقوتیت چنی لێم بگه‌ڕی
كه به‌سه‌ر كه‌لاوه‌یه‌كی سوتاوی گه‌رمێندا كه‌وتی من ڕاژه چاو خۆڵه‌مێشییه‌كه‌م
باڵام شه‌نگه (بی)یه‌كی له‌رزیوو ته‌زیوو تۆقیوو ڕچیوه
مه‌مله‌كه‌تێكم له‌كۆس‌و قۆچ
وه‌ره‌و له‌نێو گۆڕێكی به‌كۆمه‌ڵدا بمناسه‌وه. . . وه‌لێ
(ناسكۆڵه گیان بگری، به‌ر خۆڵه‌گیان بگری
لێره په‌یدا نابێ شه‌ده‌و گواره‌و هه‌وری)
له‌ده‌رگاوه مه‌یه‌ره ژوور
نه‌با ورده شوشه‌ی زه‌مه‌ن نێڵه‌ی هه‌ناسه‌كانت له‌تكا
من تۆزی ئه‌ودیو مێژووم پێوه‌یه
خۆڵه‌مێشی دوای ئه‌نفالم
وڵاتێكم عه‌ینه‌ن له‌داره مه‌یت ده‌چم …!
ئیدی دیوارێك له‌گوڵه به‌یبوون‌و په‌نجه‌ره‌یه‌ك له‌تریفه‌و
سابیته‌یه‌ك له‌رێحانه‌و كارێزێكی سه‌خی له‌توربه‌ی كام عه‌تاردایه
ئه‌ی شۆخ . . . دوا نوزه‌م له‌پیاڵه‌یه‌كی لێوشكاودا بخۆره‌وه‌و
به‌مه‌رگێكی هێمنترم بسپێره
خودایه له‌گیرفانی كام عه‌وداڵی خه‌رامان
صوره‌ێێ نیشانی خورشیده‌كان ده‌ین ؟
ئه‌وانیش ده‌ره‌قه‌تی دێوان نه‌هاتن
ئه‌وه‌تا له‌تاقه‌كاندا ئابڕوی شیرینان ده‌تكێ
ئیدی كڵاوڕۆژنه‌یه‌ك بۆ ئۆخژنێ
مه‌گه‌ر له‌ماچه گه‌رمه‌كانی هه‌نیه‌و خاكدا
بزه‌یه‌ك بۆ ژیان له‌سوحبه‌تی شه‌وه گرینۆكه‌كاندا
زنه‌یه‌ك بۆڕاموسین له‌چاوی تێڕامانی كه‌وندا
واین به‌چڵه‌پۆپه‌ی گوناهه‌وه
به‌لوتكه‌ی ئۆرگازمی تاوان
وای خودایه گیری چ مه‌رگه‌ساتێكین؟!
چۆن ده‌توانین ماراسا به‌سه‌ر رایه‌خی دڕكه‌زیا بخزێینه نێو پێچه‌كانه‌وه
كه‌شه‌ڵاڵی برینانین
چۆن له‌تاریكستانی ئه‌م ده‌ڤه‌ره هه‌ڵچووه ڕی ده‌ركه‌ین
غه‌ریقی به‌حری تاوانین
سواخم ده تاقه‌تی بینینی ئه‌م هه‌موو درزه‌ت نییه
دامپۆشه ئه‌م له‌رزینه‌م زگماكیه
____________________
(*) پێكوڵه‌و قالۆر: دووجۆره دڕكن
