Skip to Content

Monday, May 23rd, 2022

پێشوازی … ستار ئەحمەد

Closed
by July 4, 2012 هۆنراوە

 

 

 

 

 

به‌یانیان له‌ رێگاتا راده‌وه‌ستم

چاوه‌ڕوان نیم گوڵێكی سوور

بخه‌یته‌ نێو گۆشه‌ی ده‌ستم

به‌ڵام یه‌جگار به‌ په‌رۆشم

به‌ نیگایه‌ك به‌ڕێمبخه‌ی

ئه‌و كاتانه‌ شادمانم

پڕ به‌ دڵت بڵێی ئۆخه‌ی

نیوه‌ڕوانیش كه‌ دێیته‌وه‌

دڵه‌ خورپێ توند دامده‌گرێ

چه‌نده‌ ووشه‌ی ئاڵ‌و جوانه‌

له‌سه‌ر زاری ماتم ده‌مرێ

باكم نییه‌ له‌سه‌ر رێتا

وه‌كو گوڵێكی هه‌ڵپروكاو

بژاكێم‌و هه‌ڵبوه‌رێم

بۆیه‌ له‌گه‌ڵ ناسۆریا

هه‌موو رۆژێك بۆ ژوانت دێم

به‌ڵام شه‌وان

داخ له‌م ساته‌ بێئامانه‌ 

رووم تێده‌كه‌ن

هه‌رچه‌نده‌ جه‌للادی خه‌ون‌و

پێمه‌رده‌ی ئازارو ژانه‌

له‌گه‌ڵ گریه‌ی نیوه‌ شه‌وا

من‌و ته‌نهایی‌و هۆنراوه‌

چوار چێوه‌مان

به‌ خۆڵه‌مێشی ناكامی ته‌نراوه‌

هه‌رچه‌ند ده‌كه‌م شێوه‌ی مه‌نگت

ده‌ریایه‌كی بێپایانه‌

لێشاوی كۆتایی نایه‌

ده‌كه‌ومه‌ به‌ر شه‌پۆلی

داڵده‌ ده‌به‌م بۆ په‌نایه‌

له‌ سروه‌ی به‌یانیان زیاتر

دڵخۆشكه‌رێ به‌دیناكه‌م

هه‌موو شه‌وێك شه‌ڕێكی توند

له‌گه‌ڵ ناخم به‌رپا ده‌كه‌م

له‌گه‌ڵ جریوه‌ی ئه‌ستێره‌

له‌ دیده‌ی رۆژ ئاوا ده‌بێ

بۆ به‌یانی جارێكی تر

له‌ رێگاتا راده‌وه‌ستم

چاوه‌ڕوان نیم گوڵێكی شه‌نگ

بخه‌یته‌ نێو گوڵدانی ماتی هه‌ڵبه‌ستم

به‌ڵام گیانه‌ بزه‌یه‌كی نابه‌دڵی لێوه‌كانت

وه‌كو مناڵ ده‌مخاته‌ باڵ

ئه‌ی شاگوڵی چوار وه‌رزی ساڵ

 

Previous
Next