Skip to Content

Monday, April 15th, 2024
ژن لە سیوپێنج تابلۆی شیعریدا … فەتاح حەسەن

ژن لە سیوپێنج تابلۆی شیعریدا … فەتاح حەسەن

Closed
by September 5, 2013 هۆنراوە

 

 

 

 

 

-١-

خۆشترین سات

ئەو ساتانەن

کە، باس لە جیهانی ژن دەکەم.

-٢-

سبەینان

لەبری بتهۆڤن

گوێبیستی ژنێك دەبم.

-٣-

پەرچەمی ژن

ئاڵای

مەملەکەتی دڵمە.

-٤-

چەندین ساڵ بوو

لە خودی خۆم بزر بووبووم

ژنێك هاتو دۆزیمیەوە.

-٥-

ژنێك، پاسپۆرتەکەی دڕاندمو،

دڵی خۆی

کردە پێناسەم.

-٥-

گڵۆپی ماڵەکەم بکوژێتەوە

تابلۆی ژنێك

هەڵدەواسم.

-٦-

چاوەکانم کزبوون، ئەوە هەورە ؟

یا، چارشێوی ژنە

بەئاسمانەوە ؟

-٧-

مەیگێڕ واوە بڕۆ

ئەمشەو،

من بەبۆنی ژنێك مەستم.

-٨-

سۆمای چاوی من ژنێکە

باران پرسی پێدەکات

کەی ببارێ.

-٩-

نازی ژنێك، بۆ نەکێشم ؟!

کە ( سۆز ) ی

کردۆتە گەردانە.

-١٠-

وا هەستدەکەم

چەقی بازنەی، بوون و نەبوون

کەوا ژن بێ.

-١١-

تەپڵی شەڕ، هەرگیز

بەپەنجەی ژن،

لێنادرێ.

-١٢-

باشترین تێشوو

بۆ رێگەی دوور

خەندەی ژنە.

-١٣-

نیگای ژن،

وەك مۆسیقا

زمانێکی جیهانییە.

-١٤-

بڵێی لە ژن میهرەبانتر

لەسەر زەوی

بوونی هەبێ ؟

-١٥-

ئاسەواری ژین نەمێنێ

گەر ژن

نەبێتە پەرستگای.

-١٦-

دنیا بێ ژن

وەرزی هیچە ..

کە کۆتایی وەرزەکانە.

-١٧-

سەرنج راکێشانی ژنێك

بەهێزترە

لە هێزی کێشکردنی زەوی.

-١٨-

چیا دەبێت:

سەری نزمی بڵندبکا

تاماچ بکا، تەوێڵی بەرزی ژن.

-١٩-

هەورەتریشقە

دەنگی تووڕەبوونی ئاسمانە

کە، زوڵم لە ژنێك دەکرێ.

-٢٠-

شەوی یەڵدا،

شەوگاری بەهارە

ئەودەمەی ژن، هاودەمت بێ !

-٢١-

گوڵ و خونچەش، گەر بپشکوێ

بێ بوونی ژن

بەهار نایە.

-٢٢-

گوڵ و رێحانە، ئیرەیی بە

جوانیو بۆنخۆشی،

ژن دەبەن.

-٢٣-

تۆ بڵێی فریشتە

گرەوی جوانی

لە ژن بباتەوە ؟!

-٢٤-

لە ژن جوانتر

ئەگەر هەبێ

دەبێ ژن بێ.

-٢٥-

ئاوێنە

روخساری خۆی

لە چاوی ژنێکدا، دەبینێ.

-٢٦-

هەبێ و نەبێ

تریفەی مانگەشەو

بریسکەی چاوی ژنێکە.

-٢٧-

کانییە روونەکان

ژنان

تریفەیان بۆ دێنن.

-٢٨-

خۆر

لەگەڵ چاوی ژنا هەڵدێو

بەکوشتنی ئاوا دەبێ.

-٢٩-

گەواڵە هەور

کە ئەشکی ژنێك دەبینێ

باران، لەباریخۆیدەبا.

-٣٠-

کە بەفر، دەبێت بە تەرزە

پێش بارینی

داوای بووردن، لە ژن دەکا.

-٣١-

چاوم لێبوو

روبار ئاوی، خۆی خواردەوە

تا بوار خۆشکا، بۆ پەڕینەوەی ژنێك.

-٣٢-

روبار، دەڕژێتە ناو دەریا

دەریا، دەڕژێتە ناو زەریا

دواهەواری، زەریاش، ژنە.

-٣٣-

هەر کەشتییەك

کاپتنەکەی ژن بێ

بەئاسانی، لەنگەردەگرێ.

-٣٤-                                                       

چڵە گوڵەباخی ژن

لەسەر گڵکۆ،

لە رۆژی حەشرا، سیس دەبێ.

-٣٥-

بەهەشت، دەرگاوانی

ئەگەر هەبێ

دەبێ ژن بێ.

……………………

 

فەتاح حەسەن   

دانیمارك/ ڤالبی  

 

 

Previous
Next
This site is registered on wpml.org as a development site.