چه‌ند سه‌رنجێک له‌مه‌ڕ که‌وتنی یه‌کێتی نیشتمانی کوردستان
یه‌کێک له جوانیه‌کانی دونیای دیمۆکراسی ئه‌ستووربوون و باریکبوون و لاوازی و به‌هێزی و قه‌ڵه‌وی و په‌رپوتی هێزه سیاسی و لایه‌نه کێبڕکێ کاره‌کانی گۆڕه‌پانه‌که‌ن. ئه‌وه دیمۆکراسیه‌ته توانای گۆڕینی شێوه و قه‌باره‌ی لایه‌نه‌کان و دووباره داڕشتنه‌وه‌یان ده‌گرێته ئه‌ستۆ. زۆر سه‌رتان نه‌یه‌شێنم ڕه‌نگه ئه‌و قسانه ڕۆژانه وه‌ک باران له ڕاگه‌یاندنه‌کان به گوێ و چاوماندا ببارن و هه‌رکه‌سێ ده‌می ده‌کاته‌وه و زمانی بجوڵێنێ، باسی ئه‌لف و بێ دیمۆکراسیه‌ت و مه‌ده‌نیه‌تمان بۆ ده‌کات.
هه‌ڵبژاردنی 21 ئه‌یلول، توانی گؤڕانکاری له تابلۆی سیاسی 40 ساڵی ڕابردوودا بکات به قۆناغی شار و شاخ. له‌م نێوه‌نده‌شدا یه‌کێتی وه‌ک هێزێکی زیندوو، پشکی شێری به‌رکه‌وت له داکه‌وتن و داته‌پینی پێگه‌ی جه‌ماوه‌ری. ئه‌گه‌ر به ئه‌ژماره مێژووییه‌که‌ش بێت، یه‌کێتی هه‌ر هێزی دووه‌م بووه، جا به جیاوازییه‌کی گه‌وره بووبێت یان بچووک. به‌ڵام هه‌ڵبژاردنی 21 ئه‌یلول، په‌رده‌ی زیاتری به‌سه‌ر یه‌کێتی دا داماڵی و هێزی ڕاسته‌قینه و ڕووی یه‌کێتی به ته‌واوی و به شه‌فافی پیشاندا.
ئه‌م هه‌ڵبژاردنه په‌یامی ئه‌وه‌ی بۆ ناردین، که هیچ هێزێک وه‌ک خۆی نه‌ماوه‌ته‌وه و به‌جۆرێک له جۆره‌کان هه‌موو پارته‌کان له کورتیان داوه.به‌ڵام یه‌کێتی دووجار له کورتیدا و مه‌ودای چوونه ئاوی زۆرتربوو. ئه‌وه‌ی یه‌کێتی به‌م جۆره و به‌م ڕێگه سه‌خته برد له سێ ئاستی سه‌ره‌کیدا کۆ ده‌بێته‌وه:
ئاستی یه‌که‌م: غیابی تاڵه‌بانی برینه‌که‌ی قوڵترکرد، ناڵێم کاریگه‌ری هه‌بوو، چونکه خودی یه‌کێتی له وجودی تاڵه‌بانی هه‌ستی به‌م بچووکبوونه‌وه‌یه کردبوو. به‌ڵام له‌به‌ر هۆیه‌ک بووبێت خۆیان دوورخسته‌وه له هه‌ڵسانه‌وه و ڕاستکردنه‌وه‌ی یه‌کێتی له‌و کات و له‌کاتی خۆیدا. ده‌رچوونی بزووتنه‌وه‌ی گۆڕانیش له هه‌ناوی یه‌کێتی ئاماژه‌یه‌کی دیاری بابه‌ته‌که بوو.
ئاستی دووه‌م: فره کوێخایی، وونبوونی تاڵه‌بانی ئه‌م وه‌بیرهێناینه‌وه که تاڵه‌بانی وه‌ک خاوه‌ن ماڵ و هێمای ئارامی و سه‌قامگیری بوو، بۆ یه‌کێتی. چاوتێنه‌بڕینی تاڵه‌بانی بۆ یه‌کێتی ئه‌گه‌ر بۆ ساتێکیش بێت، یه‌کێتی ده‌کاته پارتێکی فره جه‌مسه‌ر و فره کوێخا و فره ڕه‌هه‌ند، به‌جۆرێک که پێکدادانێکی فکری و مه‌عنه‌وه‌ی بۆ یه‌کێتی دروست کرد ئه‌مه‌ش له ناوه‌نده‌کانی بڕیاری ئه‌م پارته شۆڕبۆوه بۆ بچووکترین یه‌که‌ی ڕیکخستنی یه‌کێتی.
ئاستی سێ یه‌م: ونبوونی ئایدێنتیتی و شوناس، ئه‌مه هۆکارێکی جه‌وهه‌ری یه‌کێتی بوو وه‌ک پارتێکی خاوه‌ن شوناس و سیسته‌مێکی فکری و هزری له چڵ ساڵی ڕابردوودا. یه‌کێتی وه‌ک پارتێکی (سۆسیاڵ دیمۆکرات) له‌م چه‌ند ساڵه‌ی دواییدا به‌ته‌واوه‌تی له‌م شوناس و له‌م فۆڕمه‌ی پارتایه‌تی خۆی ده‌رچوو، دوور و نزیک که‌وته تێرۆرکردنی کۆمه‌ڵێک چه‌مک و ئایدۆلۆژی که زیاتر له 30 ساڵ هه‌ڵگری بوو.
په‌یڕه‌و ئه‌نوه‌ر
به‌کالۆریۆس له زانستی سیاسه‌ت
