Skip to Content

Sunday, June 16th, 2024

ژنێک لە ترێ…. وریا

Closed
by December 6, 2013 هۆنراوە

 

 

 

 

ژنێک هەیە

دڵتەنگ یەکانم

 لە گوڵدانی 

سەرمێزی ژوورەکەیدا دائەنێت

تەنیاییم ،

وەک جوانترین کراسی خۆی

لەبەر ئەکات.

 

ژنێک هەیە

گەردی سەر دڵی من

لەگەڵ شوشەی پەنجەرەی ماڵەکەی

ئەسڕێتەوە.

 

بێتاقەتی  یەکانم

بەدەم شۆردنی قاپەوە 

ئەدا بەدەم ئاوی لەبیرچونەوەوە.

 

ئەو 

ژنێکە لە ترێ

کاتێ ئەدوێ،

شەراب لە دەنگی ئەڕژێ .

 

ژنێکە لە هەور

گەر تینوم بێت

بۆم ئەبارێت .

 

ژنێکە لە میهر،

گەر سەرمام بێت

لایەک لە دڵی دەردێنێ و

پیاما ئەدات .

 

گەر تایەکی کەمم لێبێت

دەسڕێک بە فرمێسکەکانی 

تەڕ ئەکات و

لەسەر نێوچەوانمی دائەنێت.

 

ئەو ژنێکە

 لە بۆنی هەناسەی ناهێڵێ،

شوشەی عەترەکانم بەتاڵ ببن.

 

ئەو ژنێکە

بەدەستی خۆی فێرم ئەکات، 

شیعر چۆن ئەنوسرێت.

 

وریا

سوید

11/2013

لە گۆڤاری هەنار ژمارە 94 دا بڵاوبووەتەوە

 

Previous
Next
This site is registered on wpml.org as a development site.