Skip to Content

Sunday, May 29th, 2022

بەرداشەكانی كۆمەڵگەی حزبی

Closed
by January 7, 2014 گشتی

 

 

 

ئەوەی خەڵك دەهێنێتە سەر شەقام لەكوردستاندا، هەژموونی دنیای نوێ‌ و چەكرەكردنی ئەو كەلتوورە هاوبەشەی مرۆڤگەلی ئەم سەردەمە نییە، چونكە هێشتا ڕاڕەوەكە لەكوردستاندا بەدەست كۆیلەگەرەكانەوەیەو، ڕێڕۆیش هەر بەرەو خود كیلەگەركارییە، بەڵكە وەك پێویست نەبوونی خزمەتگوزرای و ڕەتكردنەوەی نابەرابەرییە لەژیانكردندا بەمانا سادەكەی، درككردنە بەناشەفافییەت و بەلاڕێدەبردنی دەسەڵات بەمانا حزبییەكەی، دژایەتیكردنی ئاپارتمانێكە لەكات و درۆی بەسەریەكدا ترشاو بەمانا كۆمەڵایەتییەكەی، بۆ بەرگرتنە بەشێلانی گیرفان لەسەر قوت و كەوڵی ئەوانی دی بەمانا بابەتییەكەی، بۆ ڕێگرتنە لەغروری و جێگۆڕكێ‌ بێ‌ ماناكانی شەیتان بەمانا سوننەتگەراكەی، ئەوەتا وەك هەمیشە میدیا وروژێنەرە بەئەنقەست و بەمەبەستەكانیش، بێباكانە ئاڕاستەی هێزە مەزنە وروژاوەكەی خەڵك، لەمرازی خۆی دەترازێنێت و ناڕەزایەتییە بێ‌ ڕتووشەكانیان بەڕتووشكراوی دەیخاتەوە خزمەت موزایەداتە جۆراو جۆرە قازانج ویستە قێزەونەكانی خۆی و سەرچاوەكانی ئاڕاستەكردنیانەوە، بەنمونە:

 دروشمەكانی ڕۆژانی دووەم و تا كۆتایی وروژاوان جگە لە” ئازادی، ئازادی ” غەیب دەیبات، وەك ئەوەی ئازادی لەسایەی “ئەلف”ـدا كەوتبێتە ژێر پرسیارو مەترسییەكانی لەناوچوونەوە بەڵام لەسێبەری “با”ـدا، دونیا شامی شەریف بێت، بەدبەختییەكە ڕەنگە لەوەدابێ‌، چۆن داری ئازادیمان بەخوێن ئاودا، ئیدی دەبێ‌ بەری دیموكراسییەتیش هەر بەوەها خوێنێك پاراو بكەین، ئەگەر نا، لەڕاستیدا، نەخزمەتگوزاری وەك ئەوەی دەبێ‌ هەبێ‌ هەیەو، نەئازادیش دروست بەمانای ئازادی بوونی هەیە، بەڵام ئەگەر هاتنە سەر شەقامی ئەم خەڵكە تەنها پەیوەستە بەدروستكردنی فشار لەپێناو هێنانە ئاراوەی خزمەتگوزارییەكی زیاترو شایستەتر بەهەبوونی ئەو خەڵكە، ئەدی وتنەوەی “ئازادی، ئازادی” لەوەها دۆخێكدا جگە لە”پارادۆكس”ـی حزب و یەكە بڕیار بەدەستەكانی ئەم كۆمەڵگەیە، بڵێن تا بڵێم شوێنگەی چییە لەوەها شەتەكدانێكدا؟، ئەدی ئەگەر هاتنە سەر شەقامی ئەم خەڵكە لەبەر نەبوونی ئازادییە، بڕو بیانوی نەبوونی خزمەتگوزاری جگە لەكار تێكەرێكی فریودەرانەی وروژێنەر، بێژن تا بێژم بەهای چییە لەوەها جوینەوەیكدا ؟..

ئەم نابەتیبوون و ناتەباییە هەمەكییەی لەژینگە سیاسیەكەی ئەم وڵاتەی خۆماندا بووە بەواقیع و خەریكە بەكۆمەڵایەتیش دەكرێت، ڕەنگە لەهەر شت زیاتر زادەی نەبوونی زمانی بەموختابگرتنی شەقام و ئەو ناهۆشیاری و زانیارییە هەڵەو باوانە بێت سەبارەت بەدیاردەو دەركەوتە جیاكانی ناوكۆی كۆمەڵگە وەك تاك و یەكە پێكهێنەرەكانی هەمانە، ڕەنگە لەبەر ئەوەیش بێت پرسیار گەلە هەستیارو سەرەكییەكە وەك تاك هێشتا لەزیهنییەتماندا بەمانا نەبووەو، لەبەرامبەردا یەكە گوتاربێژو بڕیار بەدەستە باڵاكانی كۆمەڵگەیش ئەوەتا دڵخوازانە ئەم نائامادەگییە لەقازانجی هاوسەنگكرنەوەی ململانێكانی نێوان خۆیاندا لاڕێ‌ و ئیستغلا دەكەن، یانی نایانەوێ‌ بۆشاییەكانی هەبوونمان بەهەڵوێست نواندنە ڕاست و دروستەكان تەژی بكەینەوە، چونكە ئەگەر خەمە قوڵەكەی خەڵك هەبوونی ژیانێكی شایستەترە بێ‌، ئەوە بەدڵنیاییەوە خەونە گەورەكەی حزب، شوێنپێكردنەوەی زیاتری خۆی و جومگەكانی خۆیەتی لەسەر كەوڵی ناڕەزایەتییەكانی ئەم خەڵكە، هەر لەبەر ئەمەیشە نایانەوێ‌ فێرە ئەوەبین پرسیاری جیددی دروستبكەین لەخۆماندا، بەنمونە ئەو پرسیارانەی:

” خۆم وەك تاك بۆ دەستەبەركردنی ماف و ئازادییەكانم دەبێ چیبكەم؟.. ئایا پتەوكردنی دیمۆكراسییەت دەتوانێ ماف و ئازادییەكانم وەك تاك تاچەند دەتوانێ‌ دەستەبەر بكاو بپارێزێت؟.. ئەی ئایا كەوتنە دوای هەڵڵای ئەم و ئەوێك دەتوانێ لەمندا ئەگەر بێماناییەك هەبێ‌ بەمانای بكاتەوە؟.. ئەی ئایا ئەگەر بەهێز كردنی پیگەو پایە یاساییەكانم وەك پارێزەری ماف و ئازادییە خودییەكانم بەلاوە گرینگەو بەخاتری ئەوە هاتوومەتە سەر شەقام، ئەزانم وڵاتەكەم ئینگڵاند نییەو لەغیابی دەستورێكی هاوچەرخدا وەها بەهێز بوونێك زاڵگەرایی حكومەتێكی تەواو مەركەزی دەهێنێتە ئاراوە؟.. جەستەی خۆم موڵكی كێیە؟.. ئەی دیدو ڕوانینەكانم دەستكردی كێن؟.. ئەی ئیستغلاكردن و پێشێلكردنی ئەم بنەمایانە لەژێر ناوی چاكەی گشتی و پاراستنی بەرژەوەندییە گشتییەكانەوە دەچێتە خانەی خزمەت بەكێ‌ ؟.. ئایا خۆم وەك مرۆڤ ئازادم لەوەی دەسكردو داهات و موڵكایەتییەكانی خۆم وەك ماف و ئازادییەكانی خۆم گەشە پێبدەم و بپارێزم بەو مەرجەی تەجاوز نەكەمە سەر ماف و ئازادی و موڵكایەتیكردنی ئەوانی دییەوە؟..” .

ئەمانەو زۆر پرسیاری تریش، دەتواندرێ‌ لەدو ئاستدا وڵام بدرێنەوە، یەكەم، وەك ئەوەی سروشت دەڵێت” تۆ وەك تاك ئازادی و مافی تەواوەتی موڵكداریەتی تایبەت بەخۆتت هەیە، یانی بۆت هەیە ماف و ئازادییە خودییەكانی خۆت ئەزمونبكەی، ئەمە بەبێ‌ ئەوەی كەس بۆی هەبێت ئەم ئازادی و مافە خودییانەت لێ زەوت بكات و لەبەرژەوەندی خۆیدا وەك ئەوەی ئێستا لەكوردستاندا بەكار دەبردرێت، بەكاری ببات، ئاشكرایە خودا بەر لەهێنانە ئاراوەی ئاینەكان، جەستەو هزرو ئاكاری بەخشیووەتە هەر مرۆڤێك، هێنانە ئاراوەی ئاینەكانیش هەر لەخزمەت مرۆڤدا بەمانا كردن، نەك مرۆڤەكانی خستبێتە خزمەت ئاینەكانەوە، یانی ئەگەر ئەمە سەبارەت بەخوداو ئاینەكان وابێ‌، ئەوە حزب و ئایدیۆلۆژیاو فەلسەفەكان هەرگیز مافی ئەوەیان نییەو نابێ‌ مرۆڤ بخەنە خزمەت هەڵكشانی جێگەو پێگەو ڕێگەی خۆیانەوە، دووەم، بەمانابوونی ئەم ماف و ئازادییە خودییانەو پارێزگاری لێكردنیان، لەبەر ئەوەی لەم لەسەردەمە دیجیتاڵییەدا ڕەنگە هەروا سادەو سانەیش نەبێت، بەڵكە لەبنەڕەتدا ڕەنگە پێویستییان بەهەبوونی ئۆرگانێك هەبێ‌، بەڵام ئەوە هەر حكومەت و دەوڵەت نییە بتوانێ‌ وەها وەك ئۆرگانێك ئەو ماف و سەلامەتییانە بپارێزێت، لەدنیای پێشكەوتودا ئەگەر نەوترێ‌ ئەمە ئەوەندەی حكومەت ئەركی كۆمەڵگەی مەدەنی و كەرتی تایبەتە، ناشتواندرێ‌ نكۆڵی لەڕۆڵییان بكرێت، وتم كۆمەڵگەی مەدەنی و كەرتی تایبەت، نەك كۆمەڵگەی حزبی و كەرتی قۆرغكراوی تایبەت، هەروەك ئەوەی لەژێر ئەم ناوەدا ئێستا لەكوردستاندا بوونەتە بەرداش و كەرامەتی مرۆڤی كورد دەهاڕن و لەخۆڵەمێشەكەیشیان كۆیلەی حزبی و پاسەوانی پارێزگاریكاری بێدەربەستی سەروماڵی ناشەرعی بابای خاوەنشكۆی لێدروست دەكەنەوە، وابزانم ئیدی كاتی ئەوە هاتووە ماف و ئەركە تایبەتی و جڤاكییەكانی خۆمان وەك تاك، لێرەوە بەر لەهەر شتێك لەخۆماندا تەتەڵەو دەردەشە بكەین و هەنگاو باوێینە دەروەی ئەم زیهنەتە باوگەراو فراوانخوازییەو ببینەوە بەخۆدێكی خاوەن نەخش.

ئەرسەلان مەحمود
Previous
Next