غه‌ریبترین كه‌سی سه‌رگۆی ئه‌م زه‌وییه منم !
ئه‌و كۆته‌ڵێكه له به‌فر
له نێو دوو كه‌وانه‌ی مۆری خۆرنشینا
نوقمی بروسكه‌ی په‌نجه‌م و
چاوی هه‌ور تێزاوم ده‌بێت
ئه‌و..! له سروشتی وشه‌ما
عه‌یامێكه راهاتووه
له زستان و به‌فرانبارا , سێبه‌ری گه‌ڵام بداتێ و
له پاییزدا , جه‌سته‌م بكا به ئینجانه‌ی
به‌رپه‌نجه‌ره‌ی رێی فیراق و
له ئینجانه‌ی دڵما بروێت
ئه‌و .. ئه‌و .. ئ ه و
***
ئۆباڵی چی چاوه‌روانی
چی روانین و نه‌هاتن و
تووره‌بوونی تیغی شه‌و و تێگلانی
داهۆڵه‌كانی كه‌شیشه یه‌ك , یه‌ك هه‌مووی به‌گه‌ردنم ..
نه سێبه‌رێ داڵده‌ی وشه‌ی یاخیم ده‌دات
نه هاورێیه‌ك , نه ئازێزێ
به‌دی ده‌كه‌م لێم تێبگات
غه‌ریبترین كه‌سێ هه‌بێت له‌م دنیایه
ته‌نیا منم ..!
***
په‌یكه‌ری عه‌شقێك تێكشكاو
تۆ كه له هاژه‌ی ( با ) نه‌گه‌ی
له به‌ژنی ته‌ربوون نه‌روانی
ئیتر با هه‌ر روو له خۆربن
ده‌مامكی فرت و فێڵت و
گومانه‌كانی له‌ت له‌ت بووی گۆری سڵاو
***
چی بكه‌م خه‌جێ ؟
تۆ نیت , چرایه‌ك ناسووتێ
تروسكه‌یه‌ك به‌دی ناكرێ
له‌م نغرۆستانه‌ی رۆحی , له تونێل هه‌ڵكێشراوما
سه‌رانسه‌ری ئه‌م پێده‌شته
له خاڵێكی وه‌ك ئاره‌زووی باڵاپۆشیت
له‌ره‌ش ده‌چێ !.
***
له دووری جوگرافیماندا
كه‌وانه‌یه‌كی یاقووتی هه‌رده‌م واڵا و
ته‌لسیمی رۆحێكی فریو , له‌بن ئاسمانی ره‌هه‌ندێك
له نێوانی چاوه‌روانی و
ژاوه ژاوای عه‌كسی نه‌شۆراوه‌ی
سه‌ری ( تۆ ) شدا .. باوانی من
خه‌وی هه‌نگاوی چوونه‌وه و ..
كیشوه‌ری فۆبیای ته‌لبه‌ندێك
***
غه‌ریبی سنگت ده‌درێ
گومان په‌لت ده‌گرێ و .. من نیم
به‌سه‌ر به‌ردی دڵتا دێم و
رێگا ده‌رژێته هه‌نگاوم
چاوه‌رێم به , منیش وه‌ك خۆت
فه‌رهه‌نگێكی تۆزلێنیشتووی
پر له ژانی كوێره‌وه‌ریم
***
ده‌ست بۆ چڵی مه‌رگێكی له‌سه‌رخۆ مه‌به
تا ژیان له ریسوایدا .. پێت نه‌ڵێ , هانێ خۆكوشتنت !
ژووره‌كه‌ت ناو بنێ دۆزه‌خ
ئه‌درێسی شه‌قامێ رووتیش
بكه به داڵده‌ی نه‌فره‌ت بوون
تا ئه‌هریمه‌ن كه‌ژاوه‌ی جوانیت لوول بكا و
پاكییزه‌یی , نه‌تناسێته‌وه كه‌هاتی
ده‌ست بۆ گوڵی باخی به‌هه‌شتی من مه‌به
نه‌با یه‌ك یه‌ك وه‌ك هه‌ڵوه‌رینی ئاره‌زووت
په‌نجه‌كانیشت هه‌ڵوه‌رن
چه‌ند به كه‌نه‌فتی ده‌تبینم
كه سوار نیت و ئاورزه‌نگیت ده‌پێچیته‌وه
ته‌نیا یه‌ك رێگا ده‌تناسێ ..
تا پێت بڵێ : لێره‌دا ژیان ده‌وه‌ستێ و ..
ده‌ست پێ ده‌كات واتای مـــــــــــــــــــــردن
ده‌ست پێ ده‌كات واتای مـــــــــــــــــــــــردن ..!
***
