Skip to Content

Monday, June 24th, 2024
شەوێك لە دۆزەخ دا…. ناڵە حەسەن

شەوێك لە دۆزەخ دا…. ناڵە حەسەن

Closed
by November 14, 2008 ئەدەب

 
 شەوێك لە دۆزەخ دا…. ناڵە حەسەن
              1         
 
 سەفەرێك لەو سەفەرانەی
 بەدوای خۆم دا دەگەڕام       
 خۆم لە خۆم وون ببووم
 خەونەكانم لێ وون ببوون
 منداڵیم لێ وون ببوو
 بەدوای خۆم و منداڵیم دا دەگەڕام
 بە دوای زەردەخەنەكانی سەرسیمام و
 وشە فێنكەكانی عەشق .
 لە نێو وون بوونەكانی
  خۆم و منداڵیم و خەونەكانم دا
 دەرگای غەریزە چەپێندراوەكانم بەسەردا داخرابوو
 پەنجەرەكانی هەستە بێئاگاییەكانم  ,
 ژەنگیان هەڵێنابوو , نەدەكرانەوە .
 هێندەی دەمكرد ,
 نەمدەتوانی گوڵ و پەپوولەكانی ناوەوەی خۆم
 وەقسە بهێنمەوە .
 خۆم لە نێو خۆم دا ,
 تابڵۆیەكی نامۆ و پڕ لە ڕەنگی پەرش و بڵاو بووم
 خۆم لە نێو خۆم دا ,
 كاتژمێرێكی حەپەساو بووم ,
 
 لە نێو ئۆقیانووسەكانی زەمەن
 مانگێكی سەرگەردان بووم 
 لە نێو بیابانەكانی شەو
 خاچێكی داتاشراو بووم
 بە قەد دیوارەكانی چارەنووس دەگەڕام و
 لە نێو شەوەكانم
  مۆمێكم پێ نەبوو بۆ بینین
 وشە و ئاوازێكم پێ نەبوو بۆ گۆرانی
 دەگەڕام و ببووم
 بە نیشتیمانێكی تاریك
 گەڕەك و شەقام و ڕێگاوبانێكی تاریك
 ڕۆح و جەستە و ناخم : نامۆ بوون بە ڕوناكی
 دەگەڕام و ببووم
 بە كیشوەرێكی بێناونیشان
 بە دەریاچەیەكی خەوتوو
 بە سروشتێكی یاخی
 دەگەڕام و دەگەڕام و دەگەڕام
 خۆم لە نێو گۆڕستانێك دا بینیەوە
 گۆڕستانێكی تاریك تاریك …
 لەوێندەرێ ,
 مرۆڤەكان بە مردوویی
 پیاسەیان دەكرد و گۆرانیان دەگوت
 شەپۆڵەكانی دەریا بە مردوویی دەڕۆیشتن
 باڵندەكان بە مردوویی دەفڕین
 باران بە مردوویی مەمكەكانی گیای ماچ دەكرد
 هەموو شتێك مردوو بوو .
  كاتژمێرەكان , وەرزەكان , سەدەكان , ڕووبارەكان ,
 باخچەكان , شەقامەكان …
 لەوێدا
 
 لە نێو ئەم گۆڕستانە تاریكەدا
 منداڵی خۆمم دۆزییەوە
 لە نێو ماڵێكی تاریكی نێو گەڕەكی مردووەكان
 بەڵام ,
 هێندەی بەدوای خۆم دا گەڕام
 خۆمم نەدۆزییەوە
 هێندە بەدوای ڕوناكی دا گەڕام
 ڕوناكیم نەدۆزییەوە
 هێندە بەدوای زمانێك دا گەڕام
 تا قسە لەگەڵ خۆم و مردووەكان دا بكەم
 نەمدۆزییەوە و نەمدۆزییەوە و نەمدۆزییەوە .
 
 
                 2
 
 سەفەرێك لەو سەفەرانەی
 بەدوای خۆم دا دەگەڕام
 خۆم لە خۆم وون ببووم
 شەوێكیان ,
 ڕێم كەوتە دووڕگەكانی دۆزەخ
 وەكو ئاگر لە نێو شەوەكانی ڕوناكی دا
 كڵپەم دەكرد .
 لە ژێر كەپرێكی پڕ لە گەڵا لێی ڕاكشام
 ژنێكی ناسكۆڵە و جوان
 وەك نەمامە بڵێسەییەكانی هەتاو
 وەك سروشتە بەهەشتیەكەی
 نێو چاوەكانی خودا
 خۆی خزاندە نێو جێگاكەم
 هەڵم لە چاوەكان و
 لە پەنجەكان و لە كانیەكانی ڕۆحم هەڵدەستا
 
 ماچەكانی پڕبوون لە بەفر
 گۆنا و دڵ و سیەكانمی فێنك دەكردەوە
 لەژێر ئاسمانێكی شینی ئاوریشمینی
 لەگەڵ , ڕەنگەكان و سەمفۆنیاكانی ئەڤینی
 تا بەیانی ,
 نەرم نەرم دەیشێلام .
 دەیشێلام و نەرم نەرم ,
 چیڕۆكی وەرزەكانی نێو دۆزەخی خۆی
 بۆ دەگێڕامەوە .
 دەیشێلام و نەرم نەرم .. ئاوێزانم ببوو .
 وەك ئاوێزانبوونی بەفر و گەڵا
 ئاوێزانم ببوو
 هەموو جەستەم ببوو بە مەشخەڵێكی شین شین
 بە ماچ
 وەڵامی ڕوانینەكانم و پرسیارەكانمی دەدایەوە .
 بە ماچ
 سەمای بۆ نیگەرانیەكانی نێو چاوەكانم دەكرد .
 ئەو پرسیار و نیگەرانیانەی
 جەستە و ڕۆح و خودێكی سەرشێت و وونی
 ڕەسم دەكرد .
 ئەو پرسیارانەی نامۆ بوون
 بە تخوبەكانی كات و
 بە كتێبە ڕۆشناییەكانی شەو
 بە مەرگی كۆڵانە ئاوێنەییەكانی خەون  .
 ئەو پرسیارانەی پڕاوپڕ بوون
 لە سەفەر و گەڕان بەدوای خودێكی وون .
 پراوپڕ بوون
 لە مەستبوونەكانی ئاو
 لە سەمای مانگەشەوەكانی خۆكوشتن
 
 ماچ ماچ ماچ ماچ ماچ
 ئەوە چ دۆزەخێكی
 ئیرۆسی و ئەڤینی و سیحراوییە ئەی خودا … ؟
 كە مەوداكانی لە دایكبوونەوە و فڕینەكانم
 پڕدەكات لە باران .
 ئەوە چ جووتە مەمكێكی لیمۆییە ئەی خودا … ؟
 كە دەمارەكانی ڕۆحم و
 نێو دەمم پڕدەكات لە لیك .
 لیك لیك لیك لیك لیك
 من لەمەودوا
 وەك خودێكی وون و یاخی
 وەك عاشقێكی سەوداسەر
 دۆزەخ دەكەم بە ماڵم و بەهەشتیش بە جێگەی ژووان .
 هەر ئەو شەوە
 ئەو شۆخەژنەی تا بەیانی نەیهێشت
 بۆ یەك چركەش چاوەكانم بچێتە خەو
 بەر لە ڕۆیشتن ,
 زەردەخەنەكانی خۆی
 وەك چەند ماسیەكی ووردیلە
 لە نێو لیكی نێو دەمم ,
 ماچەكانی لە نێو نیشتیمانی هەناسە و
 مەمكەكانی لە نێو
 باخچەكانی تەنیاییم , جێهێشت … !
 
         كەنەدا : ئاداری 2008
 

Previous
Next
This site is registered on wpml.org as a development site.