Skip to Content

Saturday, May 25th, 2024
هه‌یبه‌تی كورسیه‌كه‌ت ناشیرین مه‌كه‌….حه‌مه‌ی ئه‌حمه‌د ره‌سوڵ

هه‌یبه‌تی كورسیه‌كه‌ت ناشیرین مه‌كه‌….حه‌مه‌ی ئه‌حمه‌د ره‌سوڵ

Closed
by March 12, 2009 گشتی

هه‌یبه‌تی كورسیه‌كه‌ت ناشیرین مه‌كه‌
حه‌مه‌ی ئه‌حمه‌د ره‌سوڵ

كه‌ ده‌ڵێین كورسی، مه‌به‌ستمان له‌ پله‌وپایه‌ی به‌رپرس و كارمه‌ند و مامۆستایانه‌ له‌ گشت داموده‌زگا فه‌رمی و ئه‌هلیه‌كاندا به‌ تایبه‌ت ئه‌و جێگایانه‌ی كه‌ هه‌ستیارن و گرێدراون به‌ خزمه‌تگوزاری پێشكه‌شكردنه‌وه‌ به‌ هاووڵاتی و هاونیشتمانیه‌وه‌. به‌ڵام ئه‌وه‌ی جێی سه‌رنج و تێبینیه‌ ئه‌وه‌یه‌ كه‌ له‌م وڵاته‌ هه‌ناسه‌سارده‌ی ئێمه‌دا و به‌ درێژایی مێژوو زۆرینه‌ی ئه‌وانه‌ی كه‌ كورسی و پله‌وپایه‌ ده‌گرنه‌ ده‌ست پاش ماوه‌یه‌ك ده‌بنه‌ كه‌سێكی بوغرا و خۆپه‌رست و خۆسه‌پێن. لێره‌ و له‌وێش ده‌نگۆ و مقۆمقۆی گه‌نده‌ڵی و ده‌ستپیسی و داوێن پیسییان باسده‌كرێت.
له‌ راستیدا ئه‌م دیارده‌یه‌ له‌ زۆرێك له‌م وڵاتانه‌ی رۆژهه‌ڵات و ئاسیا و ئه‌فریقادا بڵاو و باوه‌. هۆكارگه‌لێكی كولتووری و كۆمه‌ڵایه‌تی و یاسایی له‌ پشته‌وه‌یه‌ و له‌ خۆوه‌ڕا نه‌هاتۆته‌ ئاراوه‌. له‌ سه‌رووی هه‌موویانه‌وه‌ هه‌بونی جۆری حوكمڕانیه‌ كه‌ له‌ فه‌رمانڕه‌وایه‌تی تاكڕه‌وی و شمولی و دیكتاتۆریدا خۆیان ده‌بیننه‌وه‌، هۆكاری سیاسی یه‌كه‌مین هۆكارێكه‌ كه‌ دروشمی (كه‌سی شیاو بۆ جێگه‌ی شیاو) ئاوه‌ژوو ده‌كاته‌وه‌، به‌دوای ئه‌ودا ناسه‌روه‌ریی یاسا ده‌هێنێت، كه‌واده‌كات به‌پرسێكی سیاسی له‌ سه‌رووی یاساوه‌ دابنێ، چونكه‌ حیزب و ده‌سه‌ڵاتی شمولی خۆی له‌ سه‌ر عه‌رشی خواوه‌ند ده‌بینێ و هاووڵاتیش به‌ بونه‌وه‌ری گرگن و گزگل ده‌بینێت. بڕوای به‌ یاسا و ده‌ستور و مافی هاوڵاتی و حوكمی دیموكراسی نیه‌. خۆی كورسیه‌كان دابه‌شده‌كات و هه‌ڵبژاردنیش داخراو و كارتۆنی ده‌بێت. هه‌ربۆیه‌شه‌ له‌ وه‌زیره‌وه‌ بۆ گزیر خۆی فه‌رمانی له‌ سه‌ر ده‌دات و ئیمزای له‌ سه‌ر ده‌كات.
بۆیه‌ له‌ وڵاتێكدا كه‌ حیزبی نادیموكراسی و خۆسه‌پێن حوكمبكات، كورسی ده‌دات به‌و كه‌سه‌ حیزبیانه‌ی كه‌ خۆی متمانه‌ی پێیانه‌، ئیتر بڕوانامه‌ و زانایی و خزمه‌ت و شاره‌زایی له‌ به‌ڕێوه‌بردن و دڵسۆزی له‌ ده‌ستپاكیدا نابێته‌ هیچ پێوه‌رێك و دروشمه‌ ستاندارده‌كه‌ پێچه‌وانه‌ ده‌بێته‌وه‌، ده‌بێته‌ "كه‌سی ناشیاو بۆ شوێنی ناشیاو". هۆكارێكی دیكه‌ی گرنگ له‌م دیارده‌یه‌دا، نه‌بوونی ئه‌قڵییه‌تی ره‌خنه‌گرانه‌ی هاووڵاتی و میلله‌ته‌ له‌مجۆره‌ وڵاتانه‌دا. كه‌ به‌ پێچه‌وانه‌وه‌ ده‌بێته‌ هانده‌ر بۆ تۆختركردنه‌وه‌ و دوباره‌كردنه‌وه‌ی دیارده‌ی كورسی په‌رستن و گه‌نده‌ڵكردنی به‌رپرسی سه‌ر كورسیه‌كه‌. هاووڵاتی خۆی دانیشتوی سه‌ر كورسییه‌كانی وڵات فوو تێده‌كات و بوغرایان ده‌كات، هاووڵاتی خۆی شیعری غه‌زه‌لی و په‌خشانی ستایشكردنیان به‌ سه‌ردا ده‌هۆنێته‌وه‌. هاووڵاتی مه‌ڕی قه‌ڵه‌و و فه‌رشی كاشان و ویسكی سكۆتله‌ندی و ژنی شۆخ و گۆشتنیان بۆ ده‌باته‌ ماڵه‌وه‌ و مه‌سینه‌یان بۆ داده‌نێت و كه‌وشه‌كانی پێیان بۆ ده‌سڕنه‌وه‌.
ئیدی به‌رپرسی سه‌ر كورسی خۆی لێ ده‌بێته‌ فریشته‌ و خواوه‌ندی باڵگرتووی حه‌وت نهۆمی ئاسمان. ورده‌ ورده‌ چاوی كز ده‌بێت و خواروخێچییه‌ زۆره‌كانی خۆی و هاوه‌ڵه‌كانی نابینێ، گوێی كز ده‌بێت و هاوار و داد و سكاڵای میلۆنه‌ها هه‌ژاری وڵاته‌كه‌ی نابیستێ. ده‌میشی ده‌بێته‌ ته‌ڵه‌ی ته‌قیو، كه‌ ناتوانێ ره‌خنه‌ له‌ خۆی و له‌ حیزبه‌كه‌ی و له‌ ستایڵی حوكمڕانی وڵاته‌كه‌ی بگرێت. گیرفانه‌كانی كون ده‌بن و قاسه‌كانی ماڵه‌وه‌ و بانكه‌كانی ناوه‌وه‌ و ده‌روه‌ش هه‌ر پڕ نابنه‌وه‌. خۆپه‌رستی و چاوچنۆكی ئه‌م خواوه‌نده‌ی سه‌ر رووی زه‌وییه‌ هه‌تاكو مه‌حشه‌ر و قیامه‌ت هه‌ر نابڕێنه‌وه‌..به‌ڵام بێگومان له‌و ده‌ڤه‌رانه‌ی رۆژئاوای گۆی زه‌میندا ئه‌م دیارده‌یه‌ كه‌متر و به‌ رێژه‌ی زۆر كه‌متر ده‌بیندرێن، چونكه‌ ئه‌و كه‌سه‌ی كورسی پێده‌درێت پێی نابه‌خشرێت (به‌ گوته‌ی جۆن ستیوارت میل) به‌ڵكو به‌ خزمه‌تی به‌رده‌وام و به‌ ماندووبوون و به‌ وه‌ده‌ستهێنانی بڕوانامه‌ و به‌ دڵسۆزی و به‌ كارامه‌یی خۆی وه‌ده‌ستی دێنێ و هیچ جۆره‌ به‌خشش و مه‌كره‌مه‌یه‌ك نییه‌ له‌ پادشا یان له‌حیزبه‌وه‌ پێشكه‌ش به‌م كارمه‌نده‌ی سه‌ر كورسیه‌ كرابێت.
كاتێك كورسی هه‌یبه‌ت و شكۆداریه‌كه‌ی ون ناكات كه‌ ره‌قیبێكی یاسایی و ده‌ستوری به‌ سه‌ره‌وه‌ بێت و له‌ هه‌ڵه‌كانی بپرسێته‌وه‌ و له‌ تاوان و له‌گه‌نده‌ڵییه‌كانی بپێچێته‌وه‌ و سزای بدات. دانیشتوی سه‌ركورسیه‌كه‌ش خۆی له‌ سه‌رووی یاساوه‌ دانانێت و خۆی لێ نابێت به‌ خواوه‌ند و به‌ فیرعه‌ون..
هه‌ركاتێك دروشمی كورسیدار و پایه‌دار ئه‌وه‌ بوو كه‌ ته‌نها بۆ خزمه‌تی خه‌ڵك و بۆ خزمه‌تگوزاری پێشكه‌شكردن ته‌رخانه‌ و سوێندی شه‌ره‌فی پیشه‌كه‌ی خوارد، كه‌ ده‌ستپاك و دڵسۆز و داوێنپاك و خزمه‌تكاری نیشتمانه‌كه‌ی بێت ئه‌وا هه‌یبه‌تی كورسی و ره‌ونه‌قی كاروئیشی حیزبایه‌تی و به‌ڕێوه‌بردنی داموده‌زگا فه‌رمی و حكومی و ئه‌هلیه‌كانیش جوان و شكۆدارتر ده‌بێت. ئه‌گه‌ر كورسیش له‌ سه‌روی یاسا و ماف و هه‌یبه‌تی هاووڵاتی و نیشتمانه‌وه‌ بوو، ئه‌وا زۆر چاك بزانه‌ كه‌ گه‌نده‌ڵی دانیشتوی سه‌ر كورسیه‌كه‌ گه‌یشتۆته‌ چاڵی چاومان…!

Previous
Next
This site is registered on wpml.org as a development site.