به‌یــانی بوو…هێمن بـابـان
Closed
به‌یــانی بوو
هێمن بـابـان
له وه‌ختێكی ناوه‌ختێكا
له پڕێكا
له‌گه‌ڵ زیڕه‌ی مناڵێكا
چاوه‌كانم هه‌ڵفڕین و
نیشتنه‌وه سه‌ر ئامێزێكا
ئه‌و ئامێزه‌ی به‌ر له دوو ساڵ
وه‌ك تیله مار
له شه‌وێكی وه‌رزی به‌هار
ده‌ستی مه‌رگی پێ نیشاندام
دزێوترین ووشه‌ی دونیای به گوێ دادام
كه ماڵئاوایی لێ كردم
هێشتا ته‌مه‌ن زۆری مابوو
ئاخر هه‌رزه‌كاری ته‌مه‌ن
هێشتا سه‌ری هه‌ڵنه‌دابوو
لێوی ووشكم
هێشتا تێنوێتی نه‌شكابوو
زۆری مابوو
كه تۆ ماڵئاواییت لێم كرد
پێكی خه‌مت له جامم كرد
له‌وڕۆژه‌وه
به پێكی ئه‌و خه‌مه مه‌ستم
ئێستاكه‌ش من
چاوه‌كانت ده‌په‌رستم
بۆیه منیش له دوای تۆدا
بڕیارمدا
ڕازی نابم گه‌ر جوانترین كچی ووڵات
بێت و له ده‌رگای دڵمدا
گه‌ر ڕازی بووم
توخوا وه‌ره
له‌شه‌وێكی وه‌رزی به‌هاردا
له خاچمده
له ناو گۆڕه‌پانی شاردا…
hemnbaban@yahoo.com
