راگەیاندنی كوردی عێراقی تێكداوە….ئاسۆ عەلی فەرەج
راگەیاندنی كوردی عێراقی تێكداوە
ئاسۆ عەلی فەرەج
عێراق شتێكی نەماوە بە ساغی مابێتەوە یاخود رەنگی ئاسایی خۆی پێوە دیار بێت، تەنیا ناوەكەی مابووە كە ئەویش(عێراق) بوو، بەڵام ئەسەف ئەویشیان تێكدا و ئێستا هەست دەكەی لە نێو راگەیاندنی خۆماندا جۆرێك لە نارێككەوتنێك هەیە لەسەر ناوەكەی.
بۆ نموونە رۆژنامەی خەبات كردوویەتی بە(ئێراق) واتا خەبات كار لەسەر نەهێشتنی(ع)دەكات كە پێوایە پیتی(ع) لە كوردیدا نیە و خەڵكانێكیش دەپرسن ئەمەیان ماقوڵە، بەڵام بۆ عەلیەكانیش ناكەن بە(ئەلی)؟
لەولایشەوە لە رۆژنامەی (هەولێر) نووسراوە(عێڕاق) و و تەنیا حەوتێكی لە ژێر(ر)كەدا بەكارهێناوە. زۆرجاریش لێم پرسیون دەبێت سڕی ئەم(عێڕاق)ەی ئەوان چی بێت؟ وەڵامم دەست نەكەوتووە.
لە هەفتەنامەی(چاودێر)یش ئەو عێراقەی كە باسمان كرد بەشێوازێكی دیكە دەنووسرێتەوە ئەوان دەنووسن(عراق). لێرە(ێ)كەشیان لێكردۆتەوە! دەبێت نهێنی ئەم جۆرە دەستكارییە لەچیدا بێت، تۆ بڵێت: هەموومان لە خەمی خوێنەر و زمانەكەیداین بۆ ئەوەی تێبگات بە كاتێكی كەمتر؟
خۆشتر ئەوەیە رۆژنامەكانی دیكەش هەوڵی دۆزینەوەی جۆرێكی نوێ(عێراق) دەدەن. وەك بڵێت دەیانەوێ تایبەتمەندی بدەنە رۆژنامە و هەفتەنامەكانیان بە گۆڕینی(عێراق) بەبێ رەچاوكردنی لایەنی زمانەوانی. لێرە من دەردەچم لە باسكردنی زمانەوانی بۆ خەڵكی پسپۆڕی ئەو بوارە جێ دەهێڵم كە بە هیوام بەجیددیتر بیری لێبكەنەوە و هەڵوەستەی لەسەر بكرێت.
رۆژنامەی(ئاسۆ)یش خۆی دۆزیەوە لە دانانی(عێراق) بۆ ئەوەی تایبەتمەندی خۆی دیاری بكات و دەستی هەبێت لەو تێكدانەی(عێراق)دا. ئەویش هاتووە تەنیا حەوتی سەر(ێ)كەی لاداوە و دەنووسێت(عیراق) بەبێ حەوت واتا تەنیا ئەو حەوتەی لابردووە.
گریمان پێكهاتە سیاسیەكانی عێراق كۆك نەبوون لە بونیادنانی ئەو عێراقەی كە ببێتە دەوڵەتێكی دەستووری و دیموكراسی، بەڵام ناكرێت ئێمە ناوی(عێراق)مان پێ رێك نەخرێت و بە میزاجی شەخسی ناوەكە یاری پێوە بكەین وەك زۆر ناوی دیكەی كەسایەتی و وڵاتی دیكە كە راگەیاندنەكانی كوردستان بەئارەزووی خۆیان بڵاوی دەكەنەوە.تێبینی:
ئەم بابەتەم بۆ پرۆفایلی خەبات نووسی، بەڵام بەهۆی لابردنی ناوی رۆژنامەكانەوە رەتم كردەوە بڵاو بكرێتەوە، دواجار رۆژنامەی ئاسۆ لە رێگای رۆژنامەنووسێكیانەوە داوایان كرد كە بڵاوی دەكەنەوە ئەوانیش بڵاویان نەكردەوە.
aso_ali2003@yahoo.com
