هه‌ڵه‌بجه شارێك له‌په‌راوێزی ئازادیدا….یاد به‌رزنجی
هه‌ڵه‌بجه شارێك له‌په‌راوێزی ئازادیدا
یاد به‌رزنجی
هه‌ڵه‌بجه ئه‌و شاره بوو كه به درێژایی مێژوو بۆ ساتێكیش خه‌م سارد و كه‌م ته‌رخه‌م نه‌بووه له خه‌بات و تێكۆشان و قوربانیدان بۆ ئازادی و سه‌رفرازی نه‌ته‌وه‌كه‌ی , وه هه‌ر له‌م پێناوه‌شدا رۆڵێكی گرنگ و كاریگه‌ری له‌سه‌رجه‌م شۆڕش و راپه‌ڕینه‌كاندا بینیوه و قوربانی و ماڵ وێرانی زۆریشی پێشكه‌ش كردووه , زۆر كاره‌سات و مه‌رگه‌ساتی گه‌وره و ترسناكی بینیوه , دواین كاره‌ساتێك كه چاره‌نوسی ئه‌م شاره‌ی به‌ره‌و تونێله ترسناكه‌كانی مه‌رگێكی ده‌سته جه‌معی و كه‌م وێنه له جیهاندا راپێچ كرد كاره‌ساتی كیمیابارانكردنی بوو , كه ئه‌مه‌ش رووداوێكی هێنده ترسناك و تراژیدی بوو به جۆرێك ویژدانی نه‌ك ته‌نها كورد به‌ڵكو زۆربه‌ی زۆری جیهانی مرۆڤایه‌تی هه‌ژاند و توشی شۆكی كردن له ترسناكی ئه‌و كاره‌ساته و دڵ ره‌قی و سته‌مكاری رژێمی به‌عس.
به‌درێژایی مێژوو كورد ده‌چه‌وسێنرایه‌وه‌و كوشت وبڕو جینۆساید ده‌كراو ده‌نگیشی به هیچ شوێنێك نه‌ده‌گه‌یشت و كه‌س هاواری پڕ له ئازاری نه‌ده‌بیست , به‌ڵام كاره‌ساتی هه‌ڵه‌بجه ئه‌و بارودۆخه داخراوه‌ی شكاند و ده‌نگ و هاواری كوردی له‌قه‌تیس بوون ڕزگار كردو به‌شێوه‌یه‌كی فراوان و كاریگه‌ر دای به‌گوێی ته‌واوی مرۆڤایه‌تیدا و فرمێسكی له‌چاوی ته‌واوی مرۆڤه ویژدان زیندوه‌كانی جیهاندا قه‌تیس كرد , ئه‌مه‌ش وه‌رچه‌رخانێكی زۆر گه‌وره بوو له مێژووی پڕ زوڵم و سته‌می كورد دا و بۆ یه‌كه‌م جاریش بوو كه بزوتنه‌وه‌ی ڕزگاریخوازی كورد توانی له‌ڕێی ئه‌م كاره‌ساته مه‌زنه‌وه‌و له‌ڕێی ئه‌و بارودۆخ و هاو سۆزیه جیهانیه‌ی هه‌ڵه‌بجه درووستی كردبوو ڕه‌وایی به‌خه‌باتی خۆی بدات و پاڵپشتی گه‌وره به‌ده‌ست بێنێت و وه‌ك سه‌رمایه‌یه‌كی زۆر گه‌وره‌و سه‌نگین به‌كاری بهێنێ بۆ شۆڕشه‌كه‌ی .
هه‌ڵه‌بجه گه‌وره‌تریین قوربانی به‌خشیه ئازادی و سه‌رفرازی بۆ كورد به‌درێژایی مێژوو , هه‌ردڵۆپه خوێنێك له‌م شاره‌دا ڕژابێت ته‌نهاو ته‌نها بۆ ئازادی و سه‌رفرازی بوه , ئازادی و سه‌رفرازیش گه‌وره‌تریین و به‌نرختریین ده‌سكه‌وتی هه‌ڵه‌بجه‌ییه‌كانه و تاقانه‌تریین ئاواتیشیان بوو, بۆیه ده‌بوو له‌ئازادیدا پێش هه‌موو شوێنێك هه‌ڵه‌بجه بگه‌شێته‌وه‌و هه‌ناسه‌ی ئۆخه‌ی هه‌ڵمژێت و به‌رگی ماته‌م و خه‌م و پرسه فڕێبدات و به‌رگی ئازادی و به‌خته‌وه‌ری بپۆشێت و بكه‌وێته سه‌ر ڕێگای ژیانێكی به‌خته‌وه‌رو ئاسوده‌و بێ كه‌م و كوڕی , به‌ڵام به‌داخه‌وه دوای 21 ساڵ هێشتا هه‌ڵه‌بجه به‌ئاشكرا وێرانه‌یی پێوه دیاره , هێشتا خه‌ڵكه‌كه‌ی بێتاقه‌ت و بێزارو توڕه‌ن له كه‌می خزمه‌تگوزاریه‌كان و كه‌مته‌رخه‌می حكومه‌ت و حیزب و به‌رپرسان , هه‌رچه‌ند زۆر شت بۆ ئه‌م شاره كراوه ئه‌بێت به‌ویژدانه‌وه ئاماژه‌ی بۆ بكرێت به‌ڵام ئه‌وه‌ی بۆی كراوه له‌چاو قه‌باره‌ی قوربانیه‌كانی ئه‌م شاره‌و گه‌وره‌یی كاره‌ساته‌كه‌دا و چاوه‌ڕوانی خه‌ڵكه‌كه‌یدا هیچ نیه .
ده‌بوو حكومه‌ت گرنگی زیاتر به‌م شاره‌و خه‌ڵكه‌كه‌ی بدات و ده‌ستی ئاوه‌دان كردنه‌وه‌و درووست كردنه‌وه‌ی درێژتر و پڕتر بوایه بۆ ئه‌م شاره .
ده‌بوو له‌هه‌موو ڕوه‌كانی درووست كردن و جوان كردنی شه‌قام و پارك و باخچه‌و قوتابخانه‌و نه‌خۆشخانه‌و ڕواندنی دارو دره‌خت و بوژاندنه‌وه‌ی ژێرخانی ئابووری و درووست كردنه‌وه‌ی خانوه ڕووخاوه‌كان و چاره‌سه‌ركردنی نه‌خۆشه‌كانی كیمیاباران و ..هتد , حكومه‌ت سه‌خی تر و ده‌ست كراوه‌تر و به‌ده‌ست و برد تر بوایه .
هه‌ڵه‌بجه به كاره‌ساتێكی گه‌وره‌و تراژیدیایه‌كی ترسناكدا تێپه‌ڕیوه , هه‌تا ئێستاش خه‌ڵكی ئه‌و شاره ترسی ئه‌و كاره‌ساته له‌گیانیاندا ماوه‌و بۆنی مه‌رگ و كیمیایی و دوكه‌ڵی كاره‌ساته‌كه‌یان لێ دێت , بۆیه ئه‌ركی حكومه‌ت گه‌وره‌ترو ئیلتیزامی ئه‌خلاقی و نه‌ته‌وه‌یی زۆر له‌وه زیاتره كه‌ئێستا هه‌یه‌تی به‌رانبه‌ر به‌و شاره‌و خه‌ڵكی مه‌ینه‌تی دیوی ئه‌و شاره .
نابێت هه‌ڵه‌بجه دوای ئه‌و هه‌موو مه‌رگه‌سات و ماڵوێرانی و ئازاره په‌راوێز بخرێت و به‌سه‌ر خه‌ڵكه كه‌یدا به‌جێ بهێڵدرێت و ئیهمال بكرێت , نابێت هه‌ڵه‌بجه له دوای دواوه‌ی ڕیزی سودمه‌ندان و به‌خته‌وه‌رانی ئازادی و ڕزگاری بێت , ده‌بێت هه‌ڵه‌بجه له‌پێشی پێشه‌وه‌ی ڕیزی سودمه‌ندان و به‌خته‌وه‌ران بێت له‌ئازادی و به ئازادی , چونكه خوێنی زۆری پێ به‌خشیوه‌و باجی زۆری بۆ داوه و مه‌رگه‌سات و ماڵوێرانی و ئازارو خه‌می زۆری بۆ چه‌شتوه .
پێویسته حكومه‌تی هه‌رێمی كوردستان له‌ئاینده دا پلان و به‌رنامه‌ی باشترو به‌رفراوانتری هه‌بێت بۆ ئه‌و شاره , ده‌بێت بودجه‌یه‌كی تایبه‌تی و جیاوازی بۆ ته‌رخان بكات و به‌شێكی زۆر له پڕۆژه ستراتیژیه‌كان و پڕۆژه ئابووریه‌كان به‌رێته ئه‌و شاره‌وه ,پێویسته شوێنه گه‌شتیاریه‌كانی ئاوه‌دان بكاته‌وه‌و شوێنی گه‌شتیاری تری تێدا درووست بكات و ساڵانه زۆر له ڤیستیڤاڵه‌كان به‌رێته ئه‌و شاره‌وه تا ئه‌و شاره له‌ڕووی ئابوریه‌وه ببوژێنێته‌وه‌و له‌ڕووی هونه‌ری و ڕۆشنبیری و كۆمه‌ڵایه‌تی و جم و جوڵیشه‌وه له‌و په‌راوێز خراویه ڕزگاری بكات .
ده‌بێت حكومه‌ت ده‌یان پاركی گه‌وره‌و باخچه‌و كافتریاو ئوتێل و چێشتخانه‌و شوێنی گه‌شتیاری له‌وشاره‌دا درووست بكات تا میوانانی هه‌ڵه‌بجه‌و خه‌ڵكانی بیانی و گه‌شتیاران ڕووی تێ بكه‌ن و بتوانن تێیدا بمێننه‌وه.
هه‌ڵه‌بجه شارێكی جیهانیه وه‌ك چۆن هێرۆشیماو ناكازاكی دووشاری جیهانین و له ئاینده‌دا خه‌ڵكانێكی زۆری بیانی به‌مه‌به‌ستی له‌نزیكه‌وه بینینی سه‌ردانی ده‌كه‌ن و حه‌زده‌كه‌ن تێیدا بگه‌ڕێن و وێنه‌ی تێدابگرن و كه گه‌ڕانه‌وه به هاوڕێ و دۆست و كه‌س و كاریان بڵێن ئه‌وه ئه‌و شاره‌یه كه به‌چه‌كی كیمیایی بۆردومان كراو ناوی چۆته مێژوه‌وه , بۆیه ڕه‌نگه ئه‌و كات ئیحراجیه‌كی زۆر توشی كورد و حكومه‌تی هه‌رێم ببێت كاتێك ئه‌و خه‌ڵكانه بێن و به‌وشێوه‌یه‌ی ئێستا هه‌ڵه‌بجه ببینن .
پێویسته حكومه‌تی هه‌رێمی كوردستان ته‌واوی نه‌خۆشه‌كانی هه‌ڵه‌بجه بخاته ناو به‌رنامه‌ی چاره‌سه‌ر كردنی یه‌كجاره‌كیه‌وه و له‌و بارودۆخی تلانه‌وه‌ی ناو ئازارو نه‌خۆشیه ڕزگاریان بكات .
هه‌تا هه‌ڵه‌بجه ئاوه‌دان نه‌كرێته‌وه و نه‌خۆشه‌كانی چاره‌سه‌ر نه‌كرێن و ژێرخانی ئابوریه‌كه‌ی نه‌بوژێته‌وه و نه‌كرێته شوێنێكی گرنگی بازرگانی و گه‌شتیاری و خه‌ڵكه‌كه‌ی له‌و حاڵه‌تی ماته‌مینی و بێزاری و توڕه‌ییه ڕزگار نه‌كرێت هیچ مرۆڤێكی به‌ویژدانی كورد ئاسوده نابێت و هیچ كوردێكیش له‌ڕووی ئه‌خلاقی و ئینسانیه‌وه ڕووی نایه‌ت شانازی به ئازادی و ڕزگاری و دام و ده‌زگا خۆماڵیه‌كانیه‌وه بكات كه‌هه‌موویان به‌رهه‌می خوێنی شه‌هیدانن به‌گشتی و قوربانیانی شاری هه‌ڵه‌بجه‌ن به‌تایبه‌تی .
